ނޭޝަނަލް އާޓް ގެލެރީގައި ހަރަކާތްތައް ބާއްވަން ނޭޝަނަލް ސެންޓަރ ފޮރ ދި އާޓްސްއިން ހުޅުވާލައިފިއެވެ. 

ނޭޝަނަލް ސެންޓަރ ފޮރ ދި އާޓްސްއިން ކުރި އިއުލާނެއްގައި ބުނީ، އިއްޔެއިން ފެށިގެން އާޓް ގެލަރީ ބުކް ކުރުމަށް ހުޅޫވާލާފައި ވާކަމަށެވެ. އަދި އާޓް ގެލެރީގައި މަޢުރަޒުތައް ބޭއްވުމަށް އެދޭ ފަރާތްތަކުން މިއަދުން ފެށިގެން އާޓް ގެލެރީ ކުއްޔަށް ހިފުމަށް ހުޅުވާލާފައިވާ ކަމަށެވެ.

ނެޝަނަލް އާޓް ގެލެރީ ކުއްޔަށްދޫކުރުމުގައި ޢަމަލުކުރާނެ އުސޫލު އަދި ނެޝަނަލް އާޓް ގެލެރީ ހޯލު ކުއްޔަށްހިފުމަށް އެދި ހުށަހަޅާ ފޯމު، އެ އިދާރާގެ އިއުލާނުގައި ހިމަނާފައި ވެއެވެ.

ނޭޝަނަލް އާރޓް ގެލެރީ ބުކް ކުރަން ހުޅުވާލާފައި މިވަނީ، އެތަން މަރާމާތަށް ބަންދުކޮށް، ވަރަށް ގިނަ ދުވަސްތަކެއް ވަމުންދާތީ, 'މޯލްޑިވިއަން އާރޓިސްޓް ކޮމިއުނިޓީ'އިން ކަންބޮޑުވުން ފާޅުކޮށްފައި ވަނިކޮށެވެ.

އެ ޖަމްޢިއްޔާއިން ކަންބޮޑުވުން ފާޅުކޮށް ނެރުނު ބަޔާނެއްގައި ބުނީ، އާރޓް ގެލެރީ ގިނަ ދުވަސްތަކެއްވަންދެން ބަންދުކުރެވިފައި ހުރުމުން ރާއްޖޭގެ ގިނަ ޕްރޮފެޝަނަލް ވިޝުއަލް އާޓިސްޓުންނަށް އެކަމުގެ ދަތިތައް ކުރިމަތިވަމުންދާކަމުގެ މަޢުލޫމާތު އެ ޖަމްޢިއްޔާއަށް ލިބިފައި ވާކަމަށެވެ.

މި ބަންދާއި ގުޅިގެން އެ ޖަމްޢިއްޔާގެ ފަރާތުން ރާވާ ހިންގަން ހުރި ގިނަ އާރޓް އިވެންޓްތައްވެސް ނުބޭއްވި ގިނަ ދުވަސްތަކެއް ވަމުންދާކަން ފާހަގަ ކުރަމުން އެ ޖަމިއްޔާ އިން ބުނީ ޚާއްސަކޮށް ގިނަ ހުނަރުވެރި ޒުވާނުން ބައިވެރިވާ އެގްޒިބިޝަންތައް ނުބޭއްވި ލަސްވަމުންދާ ކަމަށެވެ. އަދި އެއީ ރާއްޖޭގެ އާރޓްގެ ދާއިރާއަށް ލިބޭ ވަރަށް ބޮޑު ނިކަމެތި ކަމެއް ކަމަށެވެ.

"ނޭޝަނަލް އާރޓް ގެލެރީ މަރާމާތައް ގިނަދުވަސްތަކެއް ބަންދުކޮށްފައި ހުރުމުން ކަމާބެހޭ ފަރާތްތަކާ ވަރަށް ގިނަފަހަރު ވާހަކަ ދަކެވި މަޝްވަރާ ކުރެވުނު. މިނިސްޓަރ އޮފް އާރޓްސް ކަލްޗަރ އެންޑް ހެރިޓޭޖް ޔުމްނާ މައުމޫން އާއި މިނިސްޓްރީގެ ބައެއް ސިޔާސީ މާގާމުތަކުގައި ތިންބެވި ބޭފުޅުންނާއި އަދި އެން.ސީ.އޭގެ ބައެއް ބޭފުޅުންނާއި މީގެކުރިން އެތައްފަހަރު ވާހަކަދެކެވުނު،" އެ ޖަމިއްޔާގެ ބަޔާނުގައި ވެއެވެ.