މިހާތަނަށް އަތުލައިގަނެވުނު އެއްވެސް ބާވަތެއްގެ މަސްތުވާތަކެތި ކަސްޓަމްސްގެ ބެލުމުގެދަށުގައި ހުއްޓާ ގެއްލިފައިނުވާނެކަމަށް އެ އިދާރާއިން ބުނެފިއެވެ. 

މިމަހު 8 ވަނަ ދުވަހު ރާއްޖެ އައި ޕާކިސްތާނު މީހެއްގެ ލަގެޖުގައި މަސްތުވާތަކެތި އެތެރެކުރި ކަމުގެ ތުހުމަތުގައި ކަސްޓަމްސްއިން އޭނާ ފުލުހުންނާ ހަވާލުކޮށްފައިވާ ކަމަށާ، ނަމަވެސް އޭނާގެ ލަގޭޖު ހަވާލުކޮށްފައި ނުވާ ކަމަށް ފުލުހުން ބުނެފައިވެއެވެ. 

މިކަމާއި ގުޅިގެން ކަސްޓަމްސް އިން ނެރުނު ނޫސްބަޔާނެއްގައި ބުނީ، ކަސްޓަމްސްއަށް ލިބޭ އިންޓެލިޖެންސް މަޢުލޫމާތުންނާއި، ކަސްޓަމްސްގެ ސަރވެއިލެންސް ނިޒާމުގެ ތެރެއިން ޝައްކުކުރެވިގެން ބަލާފާސްކޮށް، އަތުލެވޭ މަސްތުވާތަކެތި ފުރަތަމަ މަރުޙަލާގައި ޓެސްޓްކުރުމަށްފަހު، މަސްތުވާތަކެއްޗާއި އެކަމުގައި ޝާމިލުވާ ފަސިންޖަރު ދިވެހި ފުލުހުންގެ ޚިދުމަތަށް ވަގުތުން ހަވާލުކުރާ ކަމަށެވެ.

Advertisement

"އަދި މިހާތަނަށް އަތުލައިގަނެވުނު އެއްވެސް ބާވަތެއްގެ މަސްތުވާތަކެތި ކަސްޓަމްސްގެ ބެލުމުގެދަށުގައި ހުއްޓާ ގެއްލިފައިނުވާނެކަމުގެ ފުރިހަމަ ޔަޤީންކަން ދިވެހި އެންމެހާ ލޮބުވެތި ރައްޔިތުންނަށް އަރުވަމެވެ." ކަސްޓަމްސް އިން ބުނެފައިވެއެވެ.

މީގެ އިތުރުން، ކަސްޓަމްސް އިން ބުނީ، އެ އިދާރާއަށް ލިބޭ އިންޓެލިޖެންސް މަޢުލޫމާތާއިގުޅިގެން ބަލާފާސްކުރެވޭ ކޮންމެ ފަހަރަކީ މަސްތުވާތަކެތި އަދި ޤާނޫނާ ގަވާއިދާ ޚިލާފް ތަކެތި ފެންނަ ފަހަރެއްނޫންކަންވެސް އެހެންނަމަވެސް، ލިބޭ ކޮންމެ މަޢުލޫމާތެއްގެ މައްޗަށް ބިނާކޮށް ބަލާ ފާސްކުރުމުގެ މަސައްކަތް ކޮންމެ ދުވަހަކުވެސް ވަރުބަލިކަމެއްނެތި ކަސްޓަމްސް އޮފިސަރުންކުރަމުންދާކަމަށެވެ. 

ކަސްޓަމްސްގެ ޤާނޫނުން ދިވެހިރާއްޖޭގެ ބޯޑަރުތައް ބެލެހެއްޓުމަށް ކަސްޓަމްސްއަށް މަތިކޮށްފައިވާ ޤާނޫނީ ޒިންމާ އަދާކުރުމަށް ހުރަސްއެޅޭފަދަގޮތަކަށް އެއްވެސް ފަރާތަކުން މަސައްކަތްކުރުމަކީ ބަލައިގަންނާނެކަމެއްނޫން ކަން ފާހަގަކޮށް އެ އިދާރާއިން ވަނީ އެކަން ހަރުކަށި ޢިބާރާތުން ކުށްވެރިކޮށްފައެވެ. 

"ދިވެހިރާއްޖެއަށް މަސްތުވާތަކެތި އެތެރެވުން ހުއްޓުވުމުގައި ސަރުކާރުގެ ސިޔާސަތުތަކާއި އެއްގޮތަށް ކަސްޓަމްސްއިން ތަންފީޒްކުރަންޖެހޭ ޤާނޫނުތަކާއި ގަވާއިދުތައް ތަންފީޒްކުރުމުގައި ސާބިތުކަމާއެކު ދެމިތިބޭނެކަމުގެ ޔަޤީންކަން އެންމެހައި ދިވެހި ލޮބުވެތި ރައްޔިތުންނަށް މި ފުރުސަތުގައިވެސް އަރުވަމެވެ." ކަސްޓަމްސްއިން ބުނެފައިވެއެވެ.