ކޮވިޑް-19 އާއި ގުޅިގެން އެޅި ހަރުކަށި ފިޔަވަޅުތަކަށްފަހު، ރާއްޖެ އައި ފުރަތަމަ ޗައިނާގެ ފަތުރުވެރިންގެ ގުރޫޕަށް ހޫނު މަރުހަބާއެއް ކިޔައިފިއެވެ. 

މިއަދު ޗައިނާއިން ފަތުރުވެރިން ރާއްޖެ އައިސްފައިވަނީ ބެއިޖިންގ ކެޕިޓަލް އެއަރލައިނުން ނެވެ. 

ޗައިނާގެ ފަތުރުވެރިންނަށް ރާއްޖެއިން މަރުހަބާ ކިޔާފައި ވަނީ ޗައިނާއން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ވަން ލީޝިން އާއި ޓޫރިޒަމް މިނިސްޓްރީއާއި އެމްއެމްޕީއާރުސީގެ އިސްވެރިންނެވެ. 

ގާތްގަނޑަކަށް، 3 އަހަރު ދުވަހުގެ މެދުކެނޑުމަކަށްފަހު ރާއްޖެއަށް ޗައިނާގރ ފަތުރުވެރިން އަންނަން ފަށާފައިވާއިރު، އެކަމާއި ގުޅިގެން ވާހަކަ ދައްކަވަމުން ވަން ލީޝިން ވަނީ، ދިވެހި ސަރުކާރުންނާއި، ޓޫރިޒަމް މިނިސްޓްރީއާއި އެމްއެމްޕީއާރުސީގެ ފަރާތުން ފަތުރުވެރިންނަށް ކިޔުއްވި ހޫނު މަރުހަބާ އަށް ވަރަށް ބޮޑަށް ޝުކުރު އަދާކުރައްވާފައެވެ.  

"އަހަރެން ގަބޫލު ކުރާގޮތުގައި، ދިވެހި ސަގާފީ ވަންތަކަން ހިމަނައިގެން ޗައިނާގެ ފަސިންޖަރުންނަށް ރާއްޖެއިން ކިޔާފައިވާ ހޫނު މަރުހަބާ، ހުރިހާ ފަސިންޖަރުން ވެސް ވަރަށް ބޮޑަށް ބަލައިގަންނާނެ. އަދި މި މަރުހަބާގެ ވާހަކަ އެ ފަތުރުވެރިން އެމީހުންގެ އާއިލާ އާއި ރަހުނަތްތެރިންނަށްވެސް ކިޔައިދޭނެ ކަމަށް އަހަރެން ދެކެން. އެހެންކަމުން އޭގެ ސަބަބުން ވެސް ރާއްޖޭގެ ފަތުރުވެރިކަން އިތުރަށް ޕްރޮމޯޓް ވެގެންދާނެ. އަދި ޗައިނާގެ އެންމެހައި ފަތުރުވެރިންނަށް ވެސް ވަރަށް ރަނގަޅު ޚިދުމަތް ތަކެއް ރާއްޖެއިން ލިބިގެންދާނެ ކަަމަށް އަހަރެން ގަބޫލުކުރަން." ވަން ލީޝިން  ވިދާޅުވިއެވެ. 

މީގެ އިތުރުން، ވަން ލީޝިން ވަނީ، ކުރިއަށް އޮތްތަނުގައި ޗައިނާއިން އިތުރު ޑައިރެކްޓް ފްލައިޓްތައް ރާއްޖެއަށް އަންނާނެ ކަމަށް ގަބޫލު ކުރައްވާ ކަމަށާ، އެއާއި އެކު، އޭގެ ސަބަބުން ރާއްޖޭގެ ފަތުރުވެރިކަން އިތުރަށް ކުރިއަރައި، އިގްތިޞާދީ ގޮތުންނާއި އެނޫން ގޮތް ގޮތުންވެސް ރާއްޖެ ކުރިއަރައިގެންދާނެ ކަމަށް ދެކެވަޑައިގަންނަވާ ކަމަށް ވިދާޅުވެފައެވެ. 

އަދި، ޗައިނާގެ ފަތުރުވެރިންނަށް އުފާވެރި އަދި ހިތްހަމަޖެހޭ ދުވާސްތަކެއް ރާއްޖޭގައި ހޭދަކުރުމަށް މަގުފަހިކޮށްދިނުމަށްޓަކައި، ޓޫރިޒަމް މިނިސްޓްރީއާއި ޓޫރިޒަމް އެޖެންސީތަކަަށް ވެދެވެން އޮތް ހުރިހާ ގޮތަކުން އެހީ ވެދެއްވާނެ ކަމަށްވެސް ވަން ލީޝިން ވިދާޅުވި އެވެ. 

ޗައިނާއަކީ ކޯވިޑްގެ ކުރިން ރާއްޖެއަށް އެންމެ ގިނަ ފަތުރުވެރިން އަންނަ ޤައުމެވެ. ނަމަވެސް ކޯވިޑާއިއެކު ޗައިނާގައި ދަތުރުކުރުމަށް އެޅި ފިޔަވަޅުތަކާއިއެކު މިވީ 3 އަހަރުގެ ތެރޭގައި ރާއްޖެއަށް ޗައިނާއިން އެއްވެސް ވަރަކަށް ފަތުރުވެރިން އައިސްފައެއް ނުވެއެވެ.