މޯލްޑިވްސް ބްރޯޑްކާސްޓިންގް ކޮމިޝަން(ބްރޮޑްކޮމް)ގެ ނައިބު ރައީސްގެ މަގާމަށް މުހައްމަދު ފަޒީން ހަމަޖައްސައިފިއެވެ.
އެކޮމިޝަނުގެ ނާއިބު ރައީސްގެ މަޤާމު ހުސްވީ، ކުރިން އެ މަޤާމުގައި ހުންނެވި އަޙްމަދު ގައިސް އިސްތިއުފާ ދެއްވުމުންނެވެ. އޭނާ އެ މަގާމުން އިސްތިއުފާ ދެއްވީ އެމްޑީޕީގެ އެތެރޭގެ އިންތިހާބުގައި ރައީސް ޞާލިހުއަށް ކެމްޕޭން ކޮށްދެއްވުމަށެވެ.
އެ މަގާމަށް އައްޔަނުކުރި ފަޒީން، ބްރޮޑްކޮމްގެ މެމްބަރަކަށް އައްޔަންކުރެއްވީ 2021 ވަނަ އަހަރުގެ މާރޗް މަހުގެ ހަތް ވަނަ ދުވަހުއެވެ.
މުޙައްމަދު ފަޒީނަކީ ވިލާ ކޮލެޖުން ޑިޕްލޮމާ އިން އިންފޮރމޭޝަން ޓެކްނޮލޮޖީ ހާސިލުކުރައްވާފައިވާ ބޭފުޅެކެވެ. އެ ބޭފުޅާ ނޫސްވެރިކަމުގެ ދާއިރާއާ ގުޅިވަޑައިގަތީ 2012 ވަނަ އަހަރުގެ މާރިޗު މަހު ޗެނަލް ނިއުސް މޯލްޑިވްސް (ސީ.އެން.އެމް)ގެ ސީނިއަރ ޖަރނަލިސްޓެއްގެ ގޮތުގައެވެ.
އަދި، 2014 ވަނަ އަހަރުގެ ފެބުރުއަރީ މަހުން ފެށިގެން އަދާކުރައްވަމުން ގެންދެވީ ރާއްޖެ ޓީވީގެ ސީނިއަރ ވީޑިއޯ ޖަރނަލިސްޓްގެ މަޤާމެވެ. ފަޒީނަކީ، ހޮޓެލް އޮޕަރޭޝަންސްގެ ދާއިރާއިން ވެސް ތަޢުލީމު ހާސިލުކުރައްވާފައިވާ ބޭފުޅެކެވެ.
Advertisement
This content is created and paid for by advertisers and does not involve Voice Journalists
