ޕަބްލިކް ސާވިސް މީޑިއާ(ޕީއެސްއެމް)ގެ މެނޭޖިން ޑައިރެކްޓަރުގެ މަގާމަށް، އެންމެ ފަހުން އެމަގާމުގައި ހުންނެވި، މ. ފިނިފަރު، އަލީ ހާލިދު އަނެއްކާވެސް އައްޔަންކޮށްފި އެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން އިއްޔެ ނެރުނު ނޫސްބަޔާނެއްގައި ބުނީ، ޕަބްލިކް ސަރވިސް މީޑިއާގެ ޑިރެކްޓަރުންގެ ބޯޑުގެ މެންބަރުކަމާއި މެނޭޖިންގ ޑިރެކްޓަރކަމުގެ މަޤާމުގެ ދެވަނަ ދައުރަކަށް ޢަލީ ޚާލިދު، ޢައްޔަންކޮށްފައިވާ ކަމަށެވެ.
އަލީ ހާލިދު އަލުން ޕީއެސްއެމްގެ އެމްޑީއަކަށް އައްޔަންކުރީ ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމާއި ކޯޕަރަޓައިޒް ކުރުމާއި މޮނިޓަކޮށް، އިވެލުއޭޓް ކުރުމުގެ ގާނޫނުގެ ދަށުން ކަމަށްވެސް ޕީސީބީ އިން ބުނެފައިވެއެވެ.
އަލީ ހާލިދު، ޕީއެސްއެމްގެ އެމްޑީގެ މަގާމުގެ ދެވަނަ ދައުރަކަށް އައްޔަންކުރި ކަމުގެ ލިޔުން އޭނާއާ ހަވާލުކުރީ ފިނޭންސް މިނިސްޓްރީގައި އިއްޔެ ބޭއްވި ރަސްމިއްޔާތެއްގަ އެވެ.
އަލީ ޚާލިދުގެ މަގާމުގެ ދައުރު މިދިޔަ ޑިސެމްބަރު މަހުގެ 24 ވަނަ ދުވަހަށް ހަމެވެ، މަގާމުން ވަކިވެފައިވާ އިރު، އޭނާގެ ދައުރު އާ ނުކުރުމަށް ޕީސީބީ އިން ނިންމާ އެކަން ޕީއެސްއެމް އަށް މީގެ ކުރިން ވަނީ އަންގާފައެވެ.
ނަމަވެސް، ޕީއެސްއެމްގެ އެމްޑީގެ މަގާމަށް، ދެވަނަ ދައުރަކަށް އަލީ ހާލިދު އިއްޔެ އައްޔަންކޮށްފައިވާކަން ޕީސީބީ އިން ވަނީ ހާމަކޮށްފައިވާ އިރު، ލިއުން ހަވާލުކުރުމުގެ ރަސްމިޔާތުގައި، ޕީސީބީ އިން ވަނީ ޕީއެސްއެމްގެ ފައިނޭޝިއަލް އަދި ގަވާނަންސް ރިވިއުތައުތަކުން ފާހަގަވެފައިވާ ކަންކަން ހިއްސާކޮށް، އެކަންކަން ހައްލުކޮށްދެއްވުމަށް އަލީ ހާލިދުގެ އަރިހުގައި އެދިފައިވެއެވެ.
އަދި ޕީސީބީ އިން ފާހަގަކުރި ކަންކަން ހައްލުކޮށްދެއްވާނެކަމުގެ ފުރިހަމަ ޔަގީންކަން އަލީ ޚާލިދު ދެއްވާފައިވާ ކަމަށްވެސް ޕީސީބީ އިން ބުންޏެވެ.
Advertisement
This content is created and paid for by advertisers and does not involve Voice Journalists
