ކިންގްސް ކެޕިޓަލް ހޯލްޑިންގްސްގެ ބޯޑް މެމްބަރު އަދި ރައްޔިތުން މަޖިލީހުގެ ކުރީގެ މެމްބަރު އަލްހާން ފަހުމީގެ އޮފީހާއި ދިރިއުޅޭ ތަން ބަލައި ފާސްކޮށްފި އެވެ.

ކިންގްސް ކެޕިޓަލް ޕްރައިވެޓް ލިމިޑެޓް އިން އާންމުކޮށް ހުޅުވާލައިގެން ރާއްޖޭގައި މާލީ ސެކިއުރިޓީޒްގެ ގާނޫނާއި ގަވާއިދާ އުސޫލުތަކާއި ހިލާފަށް އިންވެސްޓްމަންޓް ސްކީމެއް ތައާރަފުކޮށް އިންވެސްޓަރުންނަށް މަންފާ ލިބޭނެ ކަމަށް ދައްކާ މަކަރާއި ހީލަތުން ގިނަ އަދަދެއްގެ ފައިސާ ހޯދައި އެ ފައިސާ ލޯންޑާ ކުރި ކަމަށް ތުހުމަތު ކުރެވޭ މައްސަލާގައި ނިމިދިޔަ އަހަރުގެ ކުރީކޮޅު އަލްހާން ވަނީ ފުލުސް އޮފީހަށް ހާޒިކޮށްފައެވެ. 

އެކަމާއި ގުޅިގެން އިތުރަށް މައުލޫމާތު ދެމުން، ފުލުހުން ނެރުނު ބަޔާނެއްގައި ވަނީ، ގިނަ އަދަދެއްގެ ރައްޔިތުންގެ މާލީ މަސްލަހަތަށް ބުރޫއަރާ ގޮތަށް ޕޮންޒީ ސްކީމަކާ އެއްގޮތްވާގޮތަށް މުއާމަލާތުތަކެއް ހިންގަމުންދާ ކަމަށް ކަމާ ބެހޭ އިދާރާތަކުން ފުލުހުންގެ ސަމާލުކަމަށް ގެނެސްފައިވާ ކަމަށާ އެކަމާ ގުޅިގެން ފުލުހުން ބެލިބެލުމުން ޖިނާއީ ތަހުގީގެއް ކުރިއަށްގެންދަން ޖެހޭފަދަ ކަންތައްތަކެއް ފާހަގަކުރެވިފައިވާތީ މައްސަލައިގެ ޖިނާއީ ތަހުގީގެއް ހިންގަމުންދާ ކަމަށް ބުނެފައެވެ. 

އަދި ކިންގްސް ފޮރެކްސް ޓްރޭޑިންގުން ހިންގާ އިންވެސްޓްމަންޓް ފަންޑުގެ މައިގަނޑު މުއާމަލާތްތައް ކުރަމުން ދިޔަ އެކައުންޓްވެސް ބީއެމްއެލް އިން ފްރީޒްކޮށްފައިވެސް ވެއެވެ.

މި މައްސަލަ އާއި ގުޅޭ މާ ބޮޑު ތަފްސީލެއް ފުލުހުން ހާމަކޮށްފައި ނުވާއިރު، ފުލުހުންގެ މީޑިއާ އޮފިޝަލް މިއަދު ވޮއިސް އަށް މައުލޫމާތު ދެއްވަމުން ވިދާޅުވީ، ފުލުހުން ބަލަމުންދާ މައްސަލައަކާއި ގުޅިގެން އަލްހާން ފަހުމީގެ އޮފީހާއި ދިރިއުޅޭ ތަން ބަލައި ފާސްކޮށްފައިވާ ކަމަށެވެ.