ރާއްޖޭ ޓްރާންސްޕޯޓް ލިންކް (އާރް.ޓީ.އެލް) އިލެކްޓްރިކް ބަހުގެ ޚިދުމަތް ވިލިމާލޭގައި މިއަދު ފަށައިފިއެވެ.

އެމްޓީސީސީން ބުނީ ވިލިމާލޭގައި އެ ކުންފުނިން ފަށާފައިވާ ބަހުގެ ޚިދުމަތުގައި ބޭނުންކުރާނީ ތިމާވަށްޓާއި ރައްޓެހި 6 އިލެކްޓްރިކް ވެހިކަލް (އީ.ވީ) ބަސް ކަމަށެވެ.

މި ބަސްތަކުގައި 11 މީހުންނަށް އިށީނދެ ތިބެވޭނެހެން ސީޓު ހަރުކުރެވިފައި ހުންނާނެއެވެ. އަދި، މީގެ އިތުރުން 4 މީހުންނަށް ކޮޅަށްތިބެވޭނެ ޖާގަވެސް ހުންނާނެއެވެ. ވީމާ، ޖުމްލަ 15 މީހުންނަށް އެއްފަހަރާ ދަތުރުކުރެވޭނެ ޖާގަ މި އީ.ވީ ބަސްތަކުގައި ހުންނާނެއެވެ.

މި ޚިދުމަތުގެ ރޫޓާއި ޝެޑިއުލް އެކުލަވާލާފައިވަނީ ޢާއްމު ރައްޔިތުންގެ ދަތުރުފަތުރުގެ ބޭނުންތަކަށް ވިސްނައި، މި ޚިދުމަތް ބޭނުންކުރުމުގައި ރައްޔިތުންނަށް ވީހާވެސް ލުއިފަސޭހަވާނެ ގޮތްތަކަށް ރިޢާޔަތް ކުރުމަށްފަހު ކަމަށް އެމްޓީސީސީން ބުނެއެވެ.

އެގޮތުން، ރޫޓައި ޝެޑިއުލް އެކުލަވާލިއިރު، ސްކޫލްތަކާއި، ބީޗު ސަރަޙައްދާއި ، އޮފީސްތަކާއި، ސިނާޢީ ސަރަޙައްދާއި، ހަސްފަތާލާއި، ފެރީ ޓާރމިނަލްއަށް  ފަސޭހައިން ދަތުރުކުރެވޭނެ ގޮތްތަކަށް ބެލިފައިވާ ކަމަށް ވެސް ބުނެފައިވެއެވެ.

"ވިލިމާލޭގެ ކޮންމެ ހިސާބެއްގައި ދިރިއުޅުނުކަމުގައި ވީނަމަވެސް، ކޮންމެ ރައްޔިތަކަށްވެސް ފަސޭހައިން ޚިދުމަތް ފޯރުކޮށްދިނުމުގެ މަޤްޞަދުގައި، ވިލިމާލޭގެ 1.52 ކިލޯމީޓަރު ދިގު އިންޓަރނަލް ރޫޓްގެ 10 ސަރަހައްދަކަށް ބަސް ހުއްޓުމަށް ވަނީ ހަމަޖެހިފައެވެ." އެމްޓީސީސީން ބުނެފައިވެއެވެ. 

ބަސް ރޫޓް: ފޮޓޯ/ އެމްޓީސީސީ

އެމްޓީސީސީން އިތުރަށް ބުނީ، އާރް.ޓީ.އެލް. ވިލިމާލޭ ބަހުގެ ޙިދުމަތް ހަފްތާއަކު 7 ދުވަހު ހެނދުނު 05:35 އިން ރޭގަނޑު 00:00 އަށް ކަސްޓަމަރުންނަށް ފޯރުކޮށްދެވޭ އިރު، ބަހުގެ ޚިދުމަތް ކޮންމެ ބަސް ހުއްޓިއަކަށް 5 މިނިޓާއި 10 މިނިޓާއި ދޭތެރޭ ވަގުތުކޮޅެއްގައި ލިބިގެންދާނެ ކަމަށެވެ.

އަދި މިއަދުން ފެށިގެން ފުރަތަމަ 2 ހަފްތާގައި މުޅިން ހިލޭ ދަތުރުކުރުމުގެ އިންތިޒާމް ހަމަޖެހިފައިވާއިރު އާރް.ޓީ.އެލް ވިލިމާލޭ ބަހުގެ ޚިދުމަތުގެ އަޖުމަ ބެލުމަށް ހަމަޖެހިފައިވާ ޓްރައިއަލް މުއްދަތުގެ ތެރޭގައި ކަސްޓަމަރުންގެ ފަރާތުން ލިބޭ މަޢުލޫމާތަށް ބެލުމަށްފަހު، ރޫޓްތަކަށް ބަދަލެއް ގެންނަންޖެހޭކަމަށް ފެންނަނަމަ، އެ ބަދަލުތަކެއް ގެނައުމުގެ ފުރުޞަތު އޮންނާނެކަމަށްވެސް އެމްޓީސީސީން ބުނެއެވެ.

މީގެ އިތުރުން އެމްޓީސީސީން ބުނީ، ވިލިމާލޭގައި އާރް.ޓީ.އެލް. ބަހުގެ ޚިދުމަތް ހިލޭ ފޯރުކޮށްދެވޭ މުއްދަތު ނިމުމުން، މާސްޓަރކާޑް/ވިސާކާޑް ބޭނުންކުރައްވައިގެންނާއި، ކިއު.އާރް. ޓިކެޓިންގެ ޒަރީޢާއިން އަދި ފައިސާ ދައްކަވާފައި ޓިކެޓް ބައްލަވައިގަނެގެން، ދަތުރުކުރުމުގެ އިންތިޒާމް ހަމަޖެހިފައިވާކަމަށާ، ޓްރައިއަލް މުއްދަތު ނިމުމުގެ ކުރިން ވިލިމާލެ އީ.ވީ ބަހުގެ ޚިދުމަތަށް ކަނޑައެޅިފައިވާ އަގު ކަސްޓަމަރުންނަށް ހާމަކުރެވޭނެ ކަމަށެވެ. 

ޓްރައިއަލް މުއްދަތަށްފަހު، ޓިކެޓް ނަގައިގެން ދަތުރުކުރަން ފެށުނަސް، 65 އަހަރުން މަތީގެ މީހުންނަށާއި، 3 އަހަރުން ދަށުގެ ކުޑަކުދިންނަށް ދިވެހި ރައްޔިތެއްކަން އަންގައިދޭ ކާޑު، އަދި ޙާއްސަ އެހީއަށް ބޭނުންފުޅުވާ ފަރާތްތަކުން، ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ދޫކޮށްފައިވާ ކާޑު ދެއްކުމުން ހިލޭ ދަތުރުކުރުމުގެ އިންތިޒާމް ވަނީ ހަމަޖެހިފައެވެ. މީގެ އިތުރުން، ޔުނިފޯރމްގައި ތިބޭ ސްކޫލް ކުދިންނަށްވެސް ބަހުގައި ހިލޭ ދަތުރުކުރުމުގެ އިންތިޒާމް ވަނީ ހަމަޖެހިފައެވެ.