ރާއްޖެއަށް ފަތުރުވެރިން އަންނަ މިންވަރު އިތުރުވެފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

އެގޮތުން މި އަހަރުގެ ފުރަތަމަ 18 ދުވަހު ރާއްޖެ ޒިޔާރަތްކުރި ޓޫރިސްޓުންގެ އަދަދު، މިދިޔަ އަހަރުގެ އެ މުއްދަތާ އަޅާބަލާއިރު ވަނީ 22.8 ޕަސެންޓް އިތުރުވެފައެވެ.

ޓޫރިޒަމް މިނިސްޓްރީން އާންމުކުރި އެންމެ ފަހުގެ ތަފާސްހިސާބުތަކުން ދައްކާ ގޮތުގައި، މިިދިޔަ އަހަރުގެ ފުރަތަމަ 18 ދުވަހު ރާއްޖެ އައީ 79،718 މީހުންނެވެ. ނަމަވެސް މި އަހަރުގެ އެ މުއްދަތުގައި 97،873 ޓޫރިސްޓުން ވަނީ ރާއްޖެ އަހިސްފައެވެ.

މިހާރު އެވްރެޖުކޮށް ދުވާލެއްގެ މައްޗަށް 5،437 ޓޫރިސްޓުން ރާއްޖެ އާދެއެވެ. އެންމެ ގިނަ ޓޫރިސްޓުން އަހިސްފައި ވަނީ ރަޝިޔާއިންނެވެ. އެ ގައުމުން 15،218 ޓޫރިސްޓުން ރާއްޖެ އައި އިރު، ދެވަނައަށް އެންމެ ގިނަ ފަތުރުވެރިން އައި އިޓަލީއިން 10،660 މީހުން ވަނީ އަހިސްފައެވެ. އަދި މި ލިސްޓުގެ ތިންވަނައިގައިވާ އިންޑިޔާއިން ރާއްޖެ އަހިސްފައި ވަނީ 9،242 ޓޫރިސްޓުންނެވެ.

ކޮވިޑް-19 އާއި ގުޅިގެން އެޅި ހަރުކަށި ފިޔަވަޅުތަކަށްފަހު، ފުރަތަމަ ޗައިނާގެ ފަތުރުވެރިންގެ ގުރޫޕު ރާއްޖެ އަހިސްފައި ވަނީ މިދިޔަ ބުދަ ދުވަހުއެވެ. 

ޗައިނާއަކީ ކޯވިޑްގެ ކުރިން ރާއްޖެއަށް އެންމެ ގިނަ ފަތުރުވެރިން އަންނަ ޤައުމެވެ. ނަމަވެސް ކޯވިޑާއިއެކު ޗައިނާގައި ދަތުރުކުރުމަށް އެޅި ފިޔަވަޅުތަކާއިއެކު މިވީ 3 އަހަރުގެ ތެރޭގައި ރާއްޖެއަށް ޗައިނާއިން އެއްވެސް ވަރަކަށް ފަތުރުވެރިން އައިސްފައެއް ނުވެއެވެ.