ނ. މާފަރު އެއަރޕޯޓުން ތެޔޮ ވިއްކަން ފަށައިފިއެވެ.
މާފަރު އިންޓަނޭޝަނަލް އެއާޕޯޓަށް ޖައްސާ ޖެޓްތަކަށް އައިލެންޑް އޭވިއޭޝަން ސާވިސް (އައިއޭއެސް) އިން ޖެޓް ފިއުލް ވިއްކަން ފަށާފައި ވާއިރު، ދާއިމީކޮށް ތެޔޮ ލިބޭނެ ގޮތް ހެދުމަށް މަސައްކަތް ކުރަމުން ދާކަމަށް އެއާޕޯޓް ހިންގާ އައިއޭއެސް އިން ބުންޏެވެ.
އެގޮތުން އެ އެއާޕޯޓަށް އަންނަ ޖެޓްތަކަށް ބޭނުންވާ ތެޔޮ ދާއިމީކޮށް ފޯރުކޮށްދިނުމަށްޓަކައި ހަދަން ޖެހޭ ސެޓަޕްގެ މަސައްކަތް ވެސް ވަރަށް އަވަހަށް ނިމޭނެ ކަމަށް އައިއޭއެސްއިން މައުލޫމާތު ދެއެވެ.
"ޖެޓް ތަކަށް ފިއުލްގެ ޑިމާންޑް އޮތީމަ ވަގުތީ ގޮތުން އެކަން މިވަގުތު މި ފެށީ، ދާއިމީކޮށް ޖެޓް ފިއުލް ވިއްކޭނެ ސެޓަޕް ވެސް މިހާރު އަންނަނީ ހަދަމުން، ވަރަށް އަވަހަށް ނިމޭނެ،" އައިއޭއެސްގެ ޑެޕިއުޓީ މެނޭޖިން ޑިރެކްޓަރ އައިޝަތް ޖެނިފާ ވިދާޅުވި އެވެ.
މާފަރު އެއާޕޯޓުގައި މިދިޔަ އަހަރު 228 ޖެޓް ބަނދަރުކޮށްފައިވެ އެވެ.
މިދިޔަ އަހަރު އިންޓަނޭޝަނަލް ފްލައިޓް ތަކުން އެ އެއާޕޯޓަށް 1،571 ޓޫރިސްޓުން ދަތުރުކޮށްފައިވާއިރު، 1،493 ޓޫރިސްޓުން ފުރާފައިވެ އެވެ.
Advertisement
This content is created and paid for by advertisers and does not involve Voice Journalists
