ސްވިޑެން ގެ ފާ-ރައިޓް، ހަރުކަށި ސިޔާސީ ޕާޓީއެއްގެ ހަރުކަށި ފިކުރު ގެ ލީޑަރަކާއި އެ ޕާޓީގެ މެންބަރުން ތަކެއް ކީރިތި ޤުރުއާން ލިޔެފައިވާ ޚަތިމުތަކެއް އަންދާލައިފިއެވެ. 

ފާ-ރައިޓް ޕާޓީގެ ހަރުކަށި ލީޑަރަކު ކަމުގައި ރަސްމުސް ޕަލުޑާން އިސްވެ ހުރި ހިންގި މި ހަރަކާތް ހިންގާފައިވަނީ ސްވިޑެން ގައި ހުންނަ ތުރުކިޔޭ އެމްބާސީ ކުރިމަތީގައެވެ. ސްވިޑެން ގެ ފުލުހުންގެ ފުރިހަމަ ހިމާޔަތުގެ ދަށުގައި ހިންގި މި ހަރުކަށި އަމަލު ގާތްގަޑަކަށް ގަޑި އިރެއްހާ އިރުވަންދެން ކުރިއަށް ދިޔަ އިރު، މި ހަރަކާތުގެ ތެރެއިން، ހަތިމުތަކެއް އެންދުމުގެ އިތުރުން ތުރުކިޔޭ އާއި ދެކޮޅަށް އަޑު އުފުލައި އިސްލާމް ދީނަށް ފުރައްސާރަ ވެސް ވަނީ ކޮށްފައެވެ. 

ރަސްމުސް ޕަލުޑާން ގެ މިޢަމަލާއި ގުޅިގެން ސްވިޑެން ގެ އެ ސަރަހައްދަށް ގާތްގަނޑަކަށް 100 އެއްހާ މުސްލިމުން ވަނީ އެއްވެ އަޑުއުފުލާފައެވެ. 

ސްވިޑެން ގެ ސަރުކާރުގެ ހުއްދަ އާއި އެކު ކުރިއަށް ގެންދިޔަ މި ހަރަކާތަކީ ސްވިޑެން ނޭޓޯގެ މެންބަރަކަށް ވުމަށް ތުރުކިޔޭ އިން ހުރަސް އަޅަމުން ގެންދާތީ ހިންގި ހަރަކާތެއް ކަމަށް އެމީހުން ބުނެއެވެ. 

ކީރިތި ޤުރުއާން އެންދި، އިހްތިޖާޖަށް ސްވިޑިން ސަރުކާރުން ހުއްދަ ދިނުމުން ތުރުކީވިލާތުން ވަނީ ނުރުހުން ފާޅުކޮށްފައެވެ. އަދި ސްވިޑިނަށް ދަތުރުކުރަން އޮތް ތުރުކީވިލާތުގެ ވަޒީރުންގެ ވަފްދެއްގެ ދަތުރު ވެސް މިހާރު ވަނީ ކެންސަލް ކޮށްފައެވެ.

މިކަމާއި ގުޅިގެން ގިނަ އަދަދެއްގެ މުސްލިމް ގައުމު ތަކުންވެސް އަންނަނީ ނުރުހުން ފާޅުކުރަމުންނެވެ. އެގޮތުން، ތުރުކިޔޭ، ސައުދީ އަރަބިއްޔާ، ޖޯޑަން އަދި ކުވޭތުން ވަނީ އެކަން ކުށްވެރިކޮށް ބަޔާން ވެސް ނެރެފައިވާއިރު، ޚިޔާލު ފާޅުކުރުމުގެ މިނިވަންކަމުގެ ނަމުގައި ސްވިޑެން ސަރުކާރުން ހުއްދަދީގެން ކުރިއަށް ގެންދިޔަ މި ހަރަކާތަކީ ދީންތަކަށް ކުރަންޖެހޭ އިހްތިރާމް ނުކޮށް، ހަރުކަށި ކަމާއި އަނިޔާވެރިކަމަށް ގޮވާލެވޭ އަމަލެއް ކަމަށާ، އެފަދަ ކަންކަން ގަބޫލު ނުކުރާނެކަމަށް އެގައުމު ތަކުން ބުނެއެވެ.