ރައްޔިތުން މަޖިލީހުގެ ތުޅާދޫ ދާއިރާގެ މެންބަރު ހިސާން ހުސެއިން އިއްޔެ ބ. ތުޅާދޫއަށް ވަޑައިގަތުމުން އާއްމުންގެ ބަޔަކު ކުރި މުޒާހަރާގައި އެމްޑީޕީގެ މެމްބަރުން ނުހިމެނޭ ކަމަށް ހިސާން ވިދާޅުވެއްޖެއެވެ.
ހިސާން މިހެން ވިދާޅުވީ، އެ މުޒާހަރާގައި އެމްޑީޕީގެ މެމްބަރުންގެ ބައިވެރިވުން އޮތް ކަމަށް އަޑު ފެތުރިފައިވާ ދަނޑިވަޅެއްގައެވެ. އޭނާ ވިދާޅުވީ އޭނާއާ ދެކޮޅަށް މުޒާހަރާއަށް ނުކުތީ ޕީޕީއެމްގެ 10 މީހުން ކަމަށެވެ.
"އަޅުގަނޑު މިހުރީ ތުޅާދޫގައި، ތުޅާދޫ ޕީޕީއެމް 10 މީހުން ނުކުމެ ގަޔަށް ބޮލަށް އަރަން އުޅުނީމަ އަޅުގަނޑުވަށާ އެތިބީ އަޅުގަނޑުގެ ޓީމް މީހުން. އެމްޑީޕީ ކުއްޖެއް އެތާކުނެތް. ޕީޕީއެމް މީހުން ގޮވީ ރައީސް ނަޝީދަށް އަޅުގަނޑު ސަޕޯޓް ނުކުރާ ވަހަކަ. އަޅުގަނޑު ހިތުން މީ އެމްޑީޕީ މީހުންވެސް ވިސްނާލަން ޖެހޭކަމެއް" ހިސާން ވިދާޅުވިއެވެ.
އެ މުޒާހަރާގެ ވީޑިއޯތައް މީސްމީޑިޔާގައި އާއްމުވެފައި ވާއިރު، ވީޑިއޯއިން ފެންނަނީ، ސަރުކާރުން ވައުދުތައް ނުފުއްދާކަމަށް ބުނެ މުޒާހަރާގެ ބައިވެރިން އަޑު އުފުލާ މަންޒަރެވެ.
އެމްޑީޕީގެ ރިޔާސީ ޕްރައިމަރީގައި ކުރީގެ ރައީސް ނަޝީދާއި ރައީސް ޞާލިހު ބައިވެރިވެ ވަޑައިގަންނަވާއިރު، ހިސާން ތާއީދު ކުރައްވަނީ ރައީސް ޞާލިހަށެވެ.
Advertisement
This content is created and paid for by advertisers and does not involve Voice Journalists
