އޮސްޓްރޭލިޔާގެ އިރުމަތީ ކުއީން އައިލެންޑް އިން ފާއިތުވެދިޔަ ހަފްތާ ގައި ފެނުނު ބޮޑު ބިޔަ ބޮކަށް "ޓޯޑްޒިލާ" ގެ ނަމުން ނަން ދީފިއެވެ. 

ރޭންޖާ ކައިލީ ގްރޭ ނަމަކަށް ކިޔާ މީހަކު، ފާއިތުވި ހަފްތާގައި އޮސްޓްރޭލިޔާގެ ކްއީން އައިލެންޑް ސަރަހައްދުން ދަތުރު ކުރަމުން ދަނިކޮށް، އޭނާގެ އުޅަނދު މަޑު ކޮށްލަން ޖެހުނީ ކުރިމަތިން ހަރުފައެއް ފެނިގެންނެވެ. އެގޮތުން، ހުއްޓާލުމަށްފަހު އުޅަނދުން ފޭބި ގަޑީގައި އޭނާ އަށް ފެނުނު ބޮޑު ބޮކުން ބަސް ހުއްޓިފައި ވެސް ހުންނަން ޖެހުނު ކަމަށް އޭނާ ބުނެފައިވެއެވެ. 

"އަހަރެން އެ ބޮޑު ބޮއް ކައިރިއަށް ގޮސް އޭތި ނެގިން. އެ ބޮކުގެ ބޮޑު ކަމާއި ބަރުކަމަކީ އަހަރެންނަށްވެސް ގަބޫލު ކުރަން ދަތިވި ކަމެއް. އެހެންވެ އަހަރެން އެއަށް ގޮވާލީ ޓޯޑްޒިލާ ގެ ނަމުން. ދެން އަހަރެން އަވަހަށް އޭތި ފޮށްޓަކަށް ލައިފިން. އެއީ އެ ޖަންގަލި ނޫން އެހެން ތަނަކަށް އޭތި ގެންދަން " ކައިލީ ގްރޭ ބުޏްނެވެ. 

މީގެ އިތުރުން، ކައިލީ ގްރޭ ބުނީ، އެއީ އަންހެން ބޮކެއް ކަމަށާ، އޭގެ އަނގަޔަށް ލެވޭ ސައިޒުގެ ކޮންމެ ސުއިއްޕެއް، ނުވަތަ ރެޕްޓައިލް އެއް ނޫނީ މެމަލްއެއް އޭތި ކާނެއެވެ. 

"ޓޯޑްޒިލާ" ގެ ނަމުން ނަން ދީފައިވާ ބޮޑު ބޮއް

ބޭރުގެ މީޑިއާތަކުން ރިޕޯޓް ކޮށްފައިވާ ގޮތުގައި މި ބޮކުގެ ބަރުދަނުގައި ގާތްގަނޑަކަށް 2.7 ކިލޯ ހުރެއެވެ. އަދި މި ބޮކުގެ ބަރުދަނަކީ ދުނިޔޭގެ އައު ރިކޯޑަކަށް ވުމަކީވެސް ވަރަށް ބޮޑަށް އެކަށީގެންވާ ކަމެއް ކަމުގައި ބުނެފައިވެއެވެ. 

"ކުއީންސްލޭންޑް މިއުޒިއަމް އަށް އެ ބޮއް ނަގަން ބޭނުންވާ ކަމަށް އެމީހުން ބުނެފައިވޭ. އެއީ މިހާތަނަށް ދުނިޔެއިން ފެނުނު އެންމެ ބޮޑު ބޮކަށް ވެދާނެ ކަމަށް ވާތީ." ގާތްގަނޑަކަށް 15 އަހަރު ވަންދެން އެ ބޮކަށް ދިރިއުޅެވޭނެކަން ފާހަގަ ކުރަމުން ކައިލީ ގްރޭ ބުނެފައިވެއެވެ. 

ކައިލީ ގްރޭ އަށް ފެނުނު ބޮކަކީ ކޭން ޓޯޑް ގެ ނަސްލަށް ނިސްބަތްވާ ބޮކެކެވެ. އެ ނަސްލުގެ ބޮއް އޮސްޓަރުލިޔާ އަށް ގެނެސްފައިވަނީ މެދު އަދި ދެކުނު އެމެރިކާއިން 1935 ވަނަ އަހަރު ތެރޭގައެވެ. އެފަދަ ބޮކަކީ، އެއަށް ހަމަލާދޭން މަސައްކަތް ކުރާ ޖަނަވާރުން ގަޔަށް ވިހަލައި އުޅޭ ބޮކެކެވެ.