އިދިކޮޅު ޕީޕީއެމް ޕީއެންސީގެ ލީޑަރުން  ޕީއެސްއެމްގެ މެނޭޖިންގ ޑިރެކްޓަރ އަލީ ޚާލިދާއި، ޕީއެސްއެމްގެ އިސްވެރިންނާއި ބައްދަލުކޮށް އިދިކޮޅުގެ ކަންބޮޑުވުންތަކާއި ގުޅޭ ގޮތުން މަޝްވަރާ ކޮށްފިއެވެ.

އެގޮތުން އިދިކޮޅުން ކަންބޮޑުވުން ފާޅުކުރި ކަންކަމުގެ ތެރޭގައި ޕީއެސްއެމްގެ ޗެނަލްތަކުން އިދިކޮޅަށް ފުރުސަތު ނުލިބޭކަމާއި، ހަމަހަމަ ކަމާއެކު ޚަބަރުތަކުން ފުރުސަތު ނުލިބޭ މައްސަލަ ހިމެނެއެވެ.

ދައުލަތުގެ މީޑިއާއަކީ ރައްޔިތުންގެ ޓެކްސް ފައިސާއިން ހިންގާ ތަނަކަށްވެފައި ރައްޔިތުންނަށް ދެފަރާތް ފެންނަގޮތަށް ހަބަރުތައް ގެނެސްނުދެވޭކަމުގެ ކަންބޮޑުވުން އިދިކޮޅުން ފާޅުކުރިއެވެ.

"ވަކި ޕާޓީއެއް ޕްރޮމޯޓް ކުރުމާއި ޕާޓީގެ ހައިސިއްޔަތުން ރައީސް އިބްރާހީމް ކުރާކަންކަން ވެސް ޕީއެސްއެމްއިން ޕްރޮމޯޓް ކުރާތީ އެކަމުގެ ކަންބޮޑުވުން ހިއްސާ ކުރެވުނު. އަދި އިބްރާހީމް ރައީސްގެ ކެޕްމެއިން ހަރަކާތް ކުރިއަށް ގެންދިއުމަށް އެހީތެރިވާކަމާއި، އެގޮތުން ދައުލަތުގެ މީޑިއާގެ ވަސީލަތްތަކާއި މުވައްޒަފުން ބޭނުންކުރާ ކަމާއި އެމްޑީޕީގެ ޕްރައިމަރީ ތެރޭގައިވެސް ރައީސް އިބްރާހީމްގެ ހަރަކާތް ޕީއެސްއެމްގެ ޗެނަލްތަކުން ގެނެސްދޭކަން ފާހަގަކުރެވުނު،" ޕީޕީއެމްއިން މައުލޫމާތު ދިނެވެ.

ޕީއެސްއެމްގެ ގާނޫނުގައިވާ ކަންކަން ތަންފީޒު ކުރުމުގައި ޕީއެސްއެމްގެ ބޯޑާއި މެނޭޖްމަންޓް އިހުމާލުވެފައިވާ ކަމާއި، އިދިކޮޅުގެ ރިޔާސީ ކެންޑިޑޭޓެއް ހުރި އިރު އެއްވެސް ގޮތަކަށް އިދިކޮޅުގެ ވާހަކަތައް ހަބަރުގައިވެސް ގެނެސްނުދެވޭ ކަމާއި، ސަރުކާރުގެ ސިޔާސަތުތަކާއި ނިންމުންތަކާއި ގުޅިގެން އިދިކޮޅުގެ ބަހެއް ހޯދާނުލާތީ އެކަންވެސް ހިއްސާ ކޮށްފައިވާނެ ކަމަށް އިދިކޮޅުން މައުލޫމާތު ދިނެވެ.

"ތަނުގައިތިބި ފަންނީ އަދި ގިނަ ދުވަސްވީ މުވައްޒަފުން ވަރަށް ބޮޑަށް ނިކަމެތި ކޮށްލެވި، އަދި ހިދުމަތްތެރި އެތައް މުވައްޒަފުންނެއް މެނޭޖްމެންޓާއި މެދު ހިތްހަމަ ނުޖެހިގެން ކެނޑިގެން ގޮސްފައިވުމާއި މިހާރު ތިބި މުވައްޒަފުންގެ ހުރި ނުތަނަވަސްކަން ހައްލުކޮށްދިނުމަށް އެދުނު." ޕީޕީއެމްއިން އިތުރަށް ފާހަގަ ކުރިއެވެ.

މީގެއިތުރުން، ޕީއެސްއަމްއަށް ގާނޫނުން މަތިކޮށްފައިވާ ޒިއްމާ ފުރިހަމައަށް އަދާކުރުމަށް އިދިކޮޅުން ވަނީ މެނޭޖްމަންޓަށް އިލްތިމާސްކޮށްފައެވެ.