އެމްޑީޕީ ރިޔާސީ ޕްރައިމަރީގައި ގދ. ރަތަފަންދޫގައި ވޯޓުލުން ކުރިއަށް ދިޔައިރު ހަމަނުޖެހުން ހިންގައިގެން ހައްޔަރު ކުރި ދެމީހުން ދޫކޮށްލައިފިއެވެ.
އެ ދެމީހުން މިއަދު ހައްޔަރުކުރީ އެރަށުގައި ބަހައްޓާފައިވާ ވޯޓު ފޮށި ފަޅާލިކަމަށް ތުހުމަތު ކޮށްފައެވެ.
ފުލުހުން ބުނީ، މިހާރު އެ ދެމީހުން ދޫކޮށްލާފައި ވާކަމަށެވެ. އެ ދެމީހުންނަކީ ނަޝީދު ޓީމުގެ އޮބްޒާވަރުން ކަމަށް އެ ޓީމުން މައުލޫމާތުދިނެވެ.
ވޯޓު ފޮށިތަކަށް ގެއްލުންދޭ މީހުންނާއި ދޭތެރޭގައި އަޅަން ޖެހުނު ކޮންމެ ފިޔަވަޅެއް އަޅައިގެންވެސް މި އިންތިޚާބު ކުރިއަށް ގެންދާނެކަމަށް އެމްޑީޕީން ވަނީ ބުނެފައެވެ.
މިއަދު ކުރިއަށް ގެންދިޔަ އެޕާޓީގެ ރިޔާސީ ޕްރައިމަރީގެ އިންތިޚާބު ބޮޑު ތަފާތަކުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަނީ ކާމިޔާބު ކުރައްވާފައެވެ.
އެގޮތުން އެމްޑީޕީގެ ރިޔާސީ ޕްރައިމަރީގެ މިހާތަނަށް ގުނި ވޯޓު ފޮށިތަކުގެ ޖުމުލަ ނަތީޖާ ދައްކާގޮތުން ރައީސް ޞާލިހަށް ލިބިފައިވަނީ %63 ވޯޓެވެ. އަދި ރައީސް ނަޝީދަށް ލިބިފައިވަނީ %37 އިންސައްތަ ވޯޓެވެ.
Advertisement
This content is created and paid for by advertisers and does not involve Voice Journalists
