އެމްޑީޕީ ރިޔާސީ ޕްރައިމަރީ، ރައީސް އިބްރާހިމް މުހައްމަދު ޞާލިހުގެ ކާމިޔާބު ކުރެއްވުމުން، އެމަނިކުފާނުގެ ސަޕޯޓަރުންގެ ޝަރަފުގައި ބާއްވާ ބޮނޑިބަތް ޖާފަތެއް މިރޭ އޮންނާނެ ކަމަށް ރައީސް ޞާލިހުގެ ކެންޕެއިން ޓީމުން ބުނެފިއެވެ. 

"ރިޔާސީ ޕްރައިމަރީ ރައީސް އިބްރާހީމް މުޙައްމަދު ޞާލިޙު ކާމިޔާބު ކުރެއްވުމާގުޅިގެން ކެމްޕެއިން ޓީމްތަކާ ސަޕޯޓަރުން ބާއްވާ ބޮނޑިބަތަކަށް މިރޭ 22:00 އަށް ޕާޓީގެ މައި ހަރުގެއަށް ވަޑައިގަތުމަށް އެންމެ ބޭފުޅުންނަށް ދަޢުވަތު އަރުވަން," ރައީސް ޞާލިހު ގެ ކެންޕެއިން ޓީމުން ކޮށްފައިވާ ޓުވީޓެއްގައި ވެއެވެ.

2023 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ފަރާތުން ކުރިމަތިލާނެ ކެންޑިޑޭޓެއް ކަނޑައެޅުމަށް މިއަދު ކުރިއަށް ގެންދިޔަ އެޕާޓީގެ ރިޔާސީ ޕްރައިމަރީގެ އިންތިޚާބު ބޮޑު ތަފާތަކުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަނީ ކާމިޔާބު ކުރައްވާފަ އެވެ. 

އެމްޑީޕީގެ ރިޔާސީ ޕްރައިމަރީގެ މިހާތަނަށް ގުނި ވޯޓު ފޮށިތަކުގެ ޖުމުލަ ނަތީޖާ ދައްކާގޮތުން ރައީސް ޞާލިހަށް ލިބިފައިވަނީ %63 ވޯޓެވެ. އަދި ރައީސް ނަޝީދަށް ލިބިފައިވަނީ %37 އިންސައްތަ ވޯޓެވެ. 

މިހާތަނަށް ނަތީޖާ އިއުލާން ކޮށްފައިވާ ދާއިރާ ތަކުގެ ތެރޭގައި އާބާދީ ބޮޑު ދާއިރާތައްވެސް ހިމެނެއެވެ. އެހެންކަމުން، މި ނަތީޖާއިން ރައީސް ޞާލިހަށް އިންތިހާބު ކާމިޔާބު ވިކަން މިވަނީ ޔަގީންވެފަ އެވެ. 

މި އިންތިޚާބުގައި ރާއްޖޭގައި މީހުން ދިރިއުޅޭ ހުރިހާ ރަށެއްގައި 286 ވޯޓު ފޮށި ވަނީ ބަހައްޓާފަ އެވެ.