ފ.ބިލެއްދޫއަށް އުފަން، އެރަށުގެ ފުރަތަމަ ހާފިޒާ އައިމިނަތު އައިފާއަަށް، ޤުރުއާން ހިތުދަސްކޮށް ހާފިޒުކަމުގެ ސަނަދު ނަގައިގެން ރަށަށް އައުމުން ކިޔާފައިވާ ހޫނު މަރުހަބާއަަށް ގިނަ ބައެއްގެ ސަމާލުކަން ހުއްޓިއްޖެއެވެ. 

އުމުރުން އެންމެ 17 އަހަރުގެ އައިފާ އަކީ ބިލެއްދޫގެ ފުރަތަމަ ހާފިޒާއެވެ. 2022 ވަނަ އަހަރު އައިފާ ވަނީ ޤުރުއާން ހިތުދަސްކޮށްފައެވެ. އެކަމަކު އިސްލާމިކް މިނިސްޓްރީން ދޭ ޓެސްޓުތަކަށް ފަހު، ހާފިޒު ކަމުގެ ސަނަދު ހިފައިގެން އޭނާ ރަށަށް ދިޔައީ ބުރާސްފަތި ދުވަހު އެވެ. 

އެފަދަ ބޮޑު ކާމިޔާބީއެއް ހޯދި ނަމަވެސް، ރަތް ދޫލައިން އޭނާއަށް މަރުހަބާ ކިޔުމަށްޓަކައި ރަށު އެންމެން ބަނދަރުގައި އެއްވެ ތިބޭނެކަން އޭނާއަށް ނޭނގޭނެއެވެ. 

އައިފާގެ އެ ކާމީޔާބީގެ އަގު ވަޒަންކޮށް، މަރުހަބާ ކިޔުމަށް މުޅިރަށުން ކޮށްފައިވާ އިންތިޒާމް ފެށި އޭނާއަށްވެސް ވަނީ އުފަލުން ރޮވިފައެވެ. 

މި ފުރިހަމަ މަރުހަބާގެ ވީޑިއޯތައް މީސްމީޑިއާގައި މިހާރު ދައުރުވަމުންދާއިރު، އައިފާ ރަށަށް އައުމުން ރަތް ދޫލައަކުން އޭނައަށް މަރުހަބާ ކިޔަން ރަށު އެންމެން ބަނދަރުމައްޗަށް ޖަމާވެ ތިއްބާ ފެނުމުން އޭނާ ހުރީ ގަބޫލުކުރަންވެސް ދަތިވެފައި ކަން ފާހަގަކޮށްލަންޖެހެއެވެ. 

ބިލެއްދޫގެ ފުރަތަމަ ހާފިޒާ، އައިފާ އަށް މަރުހަބާ ކިޔުން--ފޮޓޯ: ބިލެއްދޫ ކައުންސިލް

ރަށުގެ ކުދި ބޮޑު އެންމެން މާބޮނޑިއާއި، ފައިސާގެ މާފަތިތަކުން އައިފާއަށް މަރުހަބާ ކިޔައި، ހޫނު ތަރުހީބު ދެމުންދިޔައިރު އެމީހުންގެ މޫނުމަތިންވެސް ފެނިގެން ދިޔައީ އައިފާއަށްޓަކައި މުޅި ރަށްވެސް ފަޚްރާއި ޝަރަފުން ފުރިފައިވާ ކަމެވެ. 

ބިލެއްދޫ އިން އައިފާއަަށް ކިޔާފައިވާ މި ހޫނު މަރުހަބާ އާއި ގުޅިގެން "ވޮއިސް" އަށް މައުލޫމާތު ދެއްވަމުން ބިލެއްދޫ ކައުންސިލްގެ މެންބަރ އާސިފާ ސުލައިމާނު ވިދާޅުވީ، ބިލެއްދޫ އިން ހާފިޒް ކަމުގެ ސަނަދު ހޯދާ ކޮންމެ ދަރިވަރަކަށްވެސް އެ ރަށުގެ ކައުންސިލްގެ ފަރާތުން 25,000 ރުފިޔާގެ ފައިސާގެ އިނާމު ދޭނެ ކަމަށް ފާއިތުވެދިޔަ ރަމަޟާން މަހު އެ ކައުންސިލުން އިންތިޒާމްކޮށްގެން ބޭއްވި ގުރުއާން މުބާރާތުގެ ތެރެއިން އިއުލާން ކުރެވިފައިވާނެ ކަމަށެވެ. 

ބިލެއްދޫގެ ފުރަތަމަ ހާފިޒާ، އައިފާ އަށް މަރުހަބާ ކިޔުން-- ފޮޓޯ: ބިލެއްދޫ ކައުންސިލް

އަދި އެފަދައިން އިއުލާން ކޮށްފައިވަނިކޮށް، މިފަދަ ބޮޑު ކާމިޔާބީއެއް އައިފާ ހޯދުމުން އެކަމުގެ އަގު ވަޒަން ކުރުމަށް ކައުންސިލުން ބޭނުންވިކަމަށާ، އެކަމުގައި ބިލެއްދޫގެ ސަރުކާރުގެ ހުރިހާ މުއައްސަސާތަކަކާއި ޖަމިއްޔާ ޖަމާއަތްތަކާއި މުޅި ރަށުގެ ހުރިހާ ރައްޔިތުންގެ ކިބައިންވެސް ވަރަށް ބޮޑު އެހީތެރިކަމަކާއި އެއްބާރުލުން ލިބިގެން ގޮސްފައިވާ ކަން އާސިފާ ފާހަގަކުރެއްވިއެވެ. 

ބިލެއްދޫގެ ފުރަތަމަ ހާފިޒާ، އައިފާ އަށް މަރުހަބާ ކިޔުން-- ފޮޓޯ: ބިލެއްދޫ ކައުންސިލް

"އަޅުގަނޑު ވަރަށް ބޮޑަށް ޝުކުރުވެރިވަން މިކަމުގައި ރަށުގެ ހުރިހާ މުއައްސަސާތަކާ ރައްޔިތުންގެ ފަރާތުން ލިބުނު އެއްބާރުލުމަށް. މަރުހަބާ ކިޔުމަށްފަހު މުޅި އައިފާ އަށާއި މުޅި ރަށުގެ އެންމެނަށް ހަވީރު ސައެއްވެސް ވަނީ ތައްޔާރު ކުރެވިފަ. އެކަމުގައިވެސް އެންމެންގެ އެހީ ވަރަށް ލިބުނު. އައިފާ އަށްވެސް ނޭނގޭނެ އޭނާއަށް މިހާ ހޫނު މަރުހަބާއެއް ކިޔަން ތައްޔާރުވާ ކަމެއް. އަޅުގަނޑުމެންގެ އުއްމީދަކީ މިފަދަ ގޮތް ގޮތުން ރަށަށް ރީތި ނަން ހޯދައިދޭ ހުރިހާ ކުދިންގެވެސް އަގު ވަޒަން ކުރުމަށް މިގަފަ ކުލަ ގަދަ ހަރަކާތްތައް ކުރިއަށް ގެންދިޔުން. ކުރިއަށް އޮތް ތަނުގައިވެސް ގުރުއާން ހިތުދަސްކުރާ ހުރިހާ ދަރިވަރަކަށް ކައުންސިލްގެ ފަރާތުން 25,000 ރުފިޔާ ލިބިގެންދާނެ." އާސިފާ ވިދާޅުވި އެވެ.