ޑެންމާކުގެ ކޯޕަންހޭގަނުގައި ހުންނަ މިސްކިތެއް ކުރިމަތީގައި ކީރތި ޤުރުއާން އެންދި އެންދުން ދިވެހި ސަރުކާރުން ކުށްވެރިކޮށްފިއެވެ.

ސްވިޑެންގެ ސްޓޮކްހޯމުގައި ހުންނަ ތުރުކީ އެމްބަސީ ކުރިމަތީގައި ކީރިތި ޤުރުއާން އެންދި ޑެންމާކުގެ ސިޔާސީ ލީޑަރު ރަސްމުސް ޕެލުޑާން، ޑެންމާކުގެ މިސްކިތެއް ކުރިމަތީގައި ކީރިތި ޤުރުއާން އެންދީ ފާއިތުވި ހުކުރުދުވަހުއެވެ. 

ޕެލުޑާންއަކީ މުސްލިމުންނަށް ފުރައްސާރަކުރުމާއި، މުސްލިމުންނާ މެދު ނަފްރަތު އުފެއްދުމުގެ ރެކޯޑެއް އޮންނަ މީހެކެވެ.

ޕެލުޑާން ފުރަތަމަ މުޞްޙަފުގައި ރޯކޮށްލާފައި ވަނީ ޑެންމާކުގެ ވެރިރަށް ކޯޕެންހާގަންގައި ހުންނަ މިސްކިތެއްގެ ކުރިމަތީގައެވެ.

އެހޮތުން، ހުކުރު ނަމާދުން މުސްލިމުން ފައިބާ ވަގުތާ ދިމާކޮށް ހެލްމެޓެއް އަޅައިގެން މިސްކިތް ކުރިމަތީގައި ހުރެ އޭނާ މުޞްޙަފެއް އަންދާލައި، ކީރިތި ރަސޫލާ ޞޢވ އަށާއި، މުސްލިމުންނަށް އޭނާ ވަނީ ފުރައްސާރަކޮށްފައެވެ.

އެއަށްފަހު އޭނާ ވަނީ ކޯޕެންހާގަންގައި ހުންނަ ތުރުކީވިލާތުގެ އެމްބަސީ ކުރިމަތީގައި އިތުރު މުޞްޙަފެއްގައި ހުޅުޖަހާފައެވެ.

މި އަމަލު ހިންގާފައި ވަނީ، ސްވިޑެން ނޭޓޯއާ ގުޅުމަށް ކުރަމުންދާ މަސައްކަތަށް ތުރުކީވިލާތުން ހުރަސްއަޅާތީ ކަމުގައި އޭނާ ބުނެއެވެ.

މިކަމާއި ގުޅިގެން ދިވެހި ހާރިޖިއްޔާއިން ނެރުނު ބަޔާނުގައި ވިދާޅުވީ، ޚިޔާލުފާޅުކުރުމުގެ މިނިވަންކަމުގެ ނަމުގައި ހިންގޭ މިފަދަ ޢަމަލުތަކަކީ ދުނިޔޭގެ އެކި ކަންކޮޅުތަކުގައި ތިބި އެތައް މިލިއަން މުސްލިމުންގެ ދީނީ އިޙްސާސްތަކަށް ގެއްލުންދޭ ވަރަށް ދަށު ދަރަޖައިގެ ޢަމަލުތަކެއްކަމަށެވެ. އަދި އިސްލާމް ދީނަށް ފުރައްސާރަކުރުމަށް ހިންގޭ މިފަދަ ޢަމަލުތަކުގެ ސަބަބުން ކެތްތެރިކަމާއި އެއްބައިވަންތަކަމުގެ އަސާސްތައް ދަމަހައްޓަން ކުރާ ހުރިހާ މަސައްކަތްތަކަށް ބުރު އަރާކަމަށްވެސް ދިވެހި ސަރުކާރުގެ ބަޔާނުގައިވެއެވެ.

އަދި މިފަދަ މުސްލިމުންނާއި މެދު ނަފުރަތު އުފެއްދުމުގެ އަމަލުތަކަކީ ތަހައްމަލުކުރުމުގެ އަގުކުރުންތައް ނެތިކޮށްލާ ކަންކަން ކަމަށާއި، އެކަމުގެ ސަބަބުން މުސްލިމުންނަށް ރުޅިއައުމާއި ނަފުރަތުކުރުން އިތުރުވާ ކަމަށް ސަރުކާރުން ބުންޏެވެ.