އެމްޑީޕީ އަކީ ދުވަހަކުވެސް ދޫކޮށްފައިދާން ގަސްތުކުރާ ޕާޓީއެއް ނޫން ކަމަށް އެޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހޮނިހިރު ދުވަހު ބޭއްވި އެމްޑީޕީގެ ރިޔާސީ ޕްރައިމަރީގައި ރައީސް ނަޝީދަށް ކެންޕެއިން ކޮށްދިނުމުގައި ހަރަކާތްތެރިވި ޓީމާއި ބައްދަލު ކުރައްވައި ނަޝީދު ވަނީ، އެމަނިކުފާނު ދުވަހަކުވެސް އެމްޑީޕީ ދޫކޮށް ނުލައްވާނެ ކަމުގެ ޔަގީންކަން ސަޕޯޓަރުންނަށް ދެއްވާފައެވެ.
އެގޮތުން ނަޝީދު ވިދާޅުވީ، އެމްޑީޕީއިން އެމަނިކުފާނު ވަކިނުވާނެ ކަމަށާއި އެއީ ރޫޅޭނެ ޕާޓީއެއް ވެސް ނޫން ކަމަށާ، އެމަނިކުފާނު ދަންނަ ޕާޓީ އަކީވެސް އެމްޑީޕީގެ އެކަނިކަމަށެވެ.
"އަޅުގަނޑު ދަންނަ ސިޔާސީ މަސައްކަތް ހިނގަނީ އިންތިޒާމް ވެގެން، އަޅުގަނޑު ދަންނަ ސިޔާސީ ޕާޓީ، އެމްޑީޕީ އެކަނި އަޅުގަނޑު ދަންނަނީ އަދި އަޅުގަނޑު ދެކޭ ގޮތުގައި އެއީ ރޫޅޭނެ ޕާޓީއެއް ވެސް ނޫން، އަދި ބަލިވާނެ ޕާޓީއެއް ވެސް ނޫން، އެއީ ގަދަ ޕާޓީއެއް، އަދި އެއީ އަޅުގަނޑު ދޫކޮށްފައިދާން ދުވަހަކު ވެސް ގަސްތުކުރާ ޕާޓީއެއް ނޫން" ނަޝީދު ވިދާޅުވި އެވެ.
މިއާއެކު ނަޝީދު ވަނީ، އެމްޑީޕީ ތެރޭގައި "ފިކުރެއްގެ ދިރުން" ނަމުގައި ގޮތްޕެއް އުފައްދަވަން އެމަނިކުފާނު ހުށަހަޅުއްވާ ހުށަހެޅުއްވުމަށް، އެ ޕާޓީގެ ގަވައިދު ތަކާއި އުސޫލުތައްވެސް ޖާގަ ދޭނެ ކަމަށް ވިދާޅުވެފައެވެ.
"އެމްޑީޕީ ހަދާފައި އޮތީ ވެސް މީހަކު ޖާގަ ދީގެން ނޫން، އެއީ ހަމަ އަޅުގަނޑުމެން ހަމަ ހެދި ޕާޓީއެއް އެއީ، އަޅުގަނޑުމެންގެ ފިކުރެއްގެ ދިރުން އެމްޑީޕީގެ ތެރޭގައި ހުއްޓުވޭނެ އެއްވެސް ގޮތެއް ނޯންނާނެ، އެއީ އަޅުގަނޑުމެން ހިންގާ އަޅުގަނޑުމެންގެ އަމިއްލަ މަސައްކަތެއް އެއީ،" ނަޝީދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
