އިދިކޮޅު ހިނގާލުމުގެ ތެރެއަށް ސައިކަލުގައި ވަތް މީހާއަށް ފިޔަވަޅު އަޅައި އޭނާގެ ސައިކަލު ޓޯވ ކޮށްފިއެވެ.

ރިޔާސީ އިންތިހާބަށް ތައްޔާރުވުމަށް އިދިކޮޅުން އިއްޔެ ފެށި "ހޯޕް ކޮންފަރެންސް" ގެ ތެރެއިން މިއަދު ހަވީރު 4:00ގައި ފެށި "ބުންވަރު" ހިނގާލުމުން ކުރިއަށް ދަނިކޮށް ރީނދޫ ޓީޝާޓް ލައިގެން ހުރި މީހަކު ފުލުހުންނާއި، އެއްވުން އިންތިޒާމްކުރި ފަރާތްތަކުގެ ސެކިއުރިޓީ ފޫއާޅުވައި އެއްވުމުގެ ތެރެއަށް ވަނީ ވަދެފައެެވެ. 

ސެކިއުރިޓީ ފޫއަޅުވައި މިމީހާ ވަނުމުގެ ސަބަބުން ކޮންމެވެސް ވަރެއްގެ ހަމަނުޖެހުމެއް ހިނގިކަމުަގއިވިޔަސް، އެއްވުން ވަނީ ސުލްހަވެރިކަމާއެކު އާޓިފިޝަލް ބީޗައް ނިންމާލާފައެވެ. ހަމަނުޖެހުން ހިންގި މީހާއަށް ފުލުހުން ވަނީ އެވަގުތު ރައްކާތެރިކަން ފޯރުކޮށްދިނުމުގެ ގޮތުން ގެއެއްގެ ތެރެއަށް ވައްދާފައެވެ. ނަމަވެސް އޭނާ ހައްޔަރުކޮށްފައެއްނުވެއެވެ.

Advertisement

މި މައްސަލަ އާއި ގުޅިގެން ފުލުހުން ދާދި ދެންމެ އަކު ބުނީ، ސިޔާސީ ޕަޓީއަކުން މިއަދު ބޭއްވި ހިނގާލުމުގެ ތެރެއަށް ސައިކަލެއްގައި ވަތްމީހާ ފުލުހުންގެ ބެލުމުގެ ދަށަށް ގެނައުމަށްފަހު ޓްރެފިކް ގާނޫނުގެ ދަށުން ފިޔަވަޅުއަޅާފައިވާ ކަމަށެވެ.

އެގޮތުން ސައިކަލު 15 ދުވަހުގެ މުއްދަތަށް ޓޯވ ކޮށްފައިވާ ކަމަށް ފުލުހުން ބުނެފައިވެއެވެ.