އަދާލަތު ޕާޓީއާ ކޯލިޝަން ހަދަން ބޭނުން ނުވާ ކަމަށް އެމްޑީޕީ މެމްބަރުން ބުނެފިއެވެ.

އެމްޑީޕީ މެމްބަރުން މިކަން ހާމަކޮށްފައި ވަނީ ޓުވިޓަރގައި ކުރިއަށް ދިޔަ ޕޯލް އެއްގައެވެ. މިދިޔަ ބުދަ ދުވަހު ހެދި މިޕޯލްގައި މިހާތަނަށް ވޯޓު ލާފައި ވާއިރު 24 ޕަސެންޓް މީހުން ބުނެފައި ވަނީ އަދާލަތު ޕާޓީއާއެކު ކޯލިޝަން ހަދަން ބޭނުން ކަމަށެވެ. ނަމަވެސް އަނެއް 76 ޕަސެންޓް މީހުން ބުނެފައި ވަނީ އަދާލަތާއެކު ކޯލިޝަން ހަދަން ބޭނުން ނުވާ ކަމަށެވެ.

އަދާލަތު ޕާޓީއަކީ މިހިނގާ ރައީސް އިބްރާހިމް މުހައްމަދު ޞާލިހުގެ ސަރުކާރުގެ ކޯލިޝަންގައި ހިމެނޭ ޕާޓީއެކެވެ. އެމްޑީޕީން ވަނީ ކޯލިޝަން ހެދި ޕާޓީތަކާއެކު މިހާތަނާ ޖެހެންދެން ވެސް  ކޯލިޝަން ދަމަހައްޓާފައެވެ.

މީގެ އިތުރުން ކުރިއަށް އޮތް ދައުރަށް އެމްޑީޕީގެ ރިޔާސީ ޕްރައިމަރީގެ ޓިކެޓް ކާމިޔާބު ކުރެއްވި ރައީސް ޞާލިހު ވިދާޅުވެފައި ސަރުކާރެއް ރަނގަޅަށް ހިންގޭނީ ކޯލިޝަން ހަދައިގެން ކަމަށެވެ.

"އިރާދަކުރެއްވިޔާ ޕްރައިމަރީ އަޅުގަނޑު ބޮޑު ތަނުން ކާމިޔާބު ކުރާނަން. އެއަށްފަހުގައި އަޅުގަނޑު ކޯލިޝަން އެއް އުފެއްދުމުގެ މަސައްކަތް ފަށާނަން. އަޅުގަނޑަށް ގަބޫލުކުރެވެނީ އަޅުގަނޑުމެންގެ ސިޔާސަތުތައް ތަންފީޒުކުރަމުން މި ދާގޮތަށް ބަލާފައި، ކޯލިޝަންގައި ހިމެނިވަޑައިގަންނަވާ ބޭފުޅުންގެ ތާއީދު އަޅުގަނޑަށް ލިބޭނެ ކަމަަށް. އަދި އެކަމު އެ މަޝްވަރާއެއް އަޅުގަނޑު ނުކުރަން. ނުރަސްމީކޮށް ވާހަކަ ދެކެވިފައި ހުންނާނެ. އެ ވާހަކައިގެ ތެރޭގައި އަޅުގަނޑުމެންނަށް ޚިޔާލު އެއްގޮތްވޭ ގިނަ ކަންތައް ތަކުގައި. އެހެންވީމާ އެ ޔަގީންކަން އަޅުގަނޑަށް ވަރަށް ބޮޑަށް އެބައޮތް" ރައީސް ޞާލިހު ވިދާޅުވިއެވެ.

ޕާޓީތަކާއި އެކު ކޯލިޝަން ހެއްދެވުމުގެ އިތުރުން، ވަކިވަކި ސިޔާސީ ފަރާތްތަކާއި ވާހަކަ ދައްކަވައިގެން އެފަރާތްތަކުގެ ތާއީދު ހޯއްދެވުމުގެ މަސައްކަތް ވެސް އެމަނިކުފާނު ކުރައްވާނެ ކަމަށާ އެ ފަރާތްތަކުގެ ތާއީދުވެސް ލިބޭނެ ކަމުގެ ޔަގީންކަން އެބައޮތް ކަމަށް ރައީސް ޞާލިހު ވިދާޅުވިއެވެ.