އިދިކޮޅުގެ ރިޔާސީ ކެނޑިޑޭޓެއްގެ ގޮތުގައި މާލެ ސިޓީ ކައުންސިލްގެ މޭޔަރ ޑރ މުހައްމަދު މުއިއްޒު ހަމަޖައްސައި، ނައިބެއްގެ މަގާމަށް މަޖިލީހުގެ ތ ގުރައިދޫ ދާއިރާގެ މެންބަރު ޣައްސާން މައުމޫން ހަމަޖައްސަވާނެކަމަށް މިހާރު ފެންނަން ހުރި ކަންކަމަށް ބެއްލެވެމުން ގަބޫލުކުރެއްވޭކަމަށް މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ) ވިދާޅުވެއްޖެއެވެ.

އިދިކޮޅުގެ ރިޔާސީ ކެނޑިޑޭޓެއްގެ ގޮތުގައި މިހާރު ކަނޑައަޅާފައިވަނީ އެ ކޯލިޝަންގެ ލީޑަރު އަދި ކުރީގެ ރައީސް ޔާމީން އަބްދުލް ގައްޔޫމެވެ.

އެހެން ނަމަވެސް, ވ އާރަށުގެ މައްސަލައިގައި އެމަނިކުފާނުގެ މައްޗަށް ކޮށްފައިވާ ދައުވާތައް ސާބިތުވާ ކަމަށް ކަނޑައަޅައި ކްރިމިނަލް ކޯޓުން ވަނީ އެމަނިކުފާނުގެ މައްޗަށް 11 އަހަރުގެ ހުކުމެއް އިއްވާފައެވެ. 

Advertisement

އެކަމާއި ގުޅިގެން ކުރިއަށް އޮތް ރިޔާސީ އިންތިހާބުގައި ބައިވެރިވެވަޑައިގެންނެވޭނެ ކަމާއިމެދު ސުވާލު އުފެދިފައިވާއިރު، ޝަރީފް ކުރެއްވި ޓްވީޓެއްގައި އޭނާ ވަނީ، ޕީޕީއެމްގެ ކެނޑިޑޭޓުގެ ގޮތުގައި ޑރ ވަހީދު ހަމަޖައްސަފާނެކަމަށް އެނާ އަށް ނުބެލެވޭކަމަށް ވިދާޅުވެފައެވެ.

"އެންމެ ފަހު ވަގުތު ހަމަޖައްސާނެކަމަށް ފެންނަން ހުރި ކަންކަމަށް ބަލާއިރު ގަބޫލު ކުރެވެނީ ޑރ މުއިއްޒު ކަމަށް، ނައިބަކަަށް ޣައްސާން ކަމަށް. ބަލަން ތިބެމާ." ޝަރީފު ވިދާޅުވިއެވެ. 

އެހެންނަމަވެސް އެފަދަ ނިންމުމެއް ނިންމުމުގެ އިހްތިޔާރު އޮންނާނީ ހަމައެކަނި ރައީސް ޔާމީންގެ އަތްފުޅުމަތީގައިކަމަށްވެސް އެނާ ވިދާޅުވިއެވެ.

ކުރިއަށް އޮތް ރިޔާސީ އިންތިޚާބުގައި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރިޔާސީ ޓިކެޓު ލިބިވަޑައިގަންނަވާނީ ޕާޓީގެ ރައީސް ޔާމީން އަބްދުލްގައްޔޫމަށްކަމަށް އިދިކޮޅު ކޯލިޝަންގެ އިސް ލީޑަރުން ވަނީ ހާމަކުރައްވާފައެވެ. އެގޮތުން، ރޭ "ދުއްޕާން ޖަލްސާއިން ނިންމާލި އިދިކޮޅުގެ ހޯޕް ކޮންފަރެންސްގެ ހުރިހާ މެންބަރުން ވަނީ ރައީސް ޔާމީނަށް ދެވަނަ ދައުރެއް ހޯދާދިނުމަށް އެ ބޭފުޅުންގެ ލެވެލްގައި ކުރެވެން ހުރި ހުރިހާކަމެއް ކޮށްދިނުމަށް އަހުދުވެފައެވެ. 

އަދި އެ ޖަލްސާގައި ވާހަކަ ދައްކަވަމުން ޕީއެންސީގެ ނައިބް ރައީސް މުހައްމަދު ސައީދުވެސް ވަނީ ޕީޕީއެމްގެ ރިޔާސީ ކެންޑިޑޭޓް ކަމުގެ ޓިކެޓް ރައީސް ޔާމީން ނޫން އެހެން ފަރާތަކަށް ނުދޭނެކަމަށް ވިދާޅުވެފައެވެ. 

"މި ޕާޓީގެ ރައީސް އަކީ ރައީސް ޔާމީން.. މި ޕާޓީގެ ޓިކެޓެއް އެއްވެސް ފަރާތަކަށް، ދޫންޏެއް ބާޒެއް އެހެންއެއްޗެއް ކިޔާނެކަމެއް ނެތް ނުލިބޭނެ، އަޅުގަނޑުމެންގެ ޓިކެޓު ލިބޭނީ ރައީސް ޔާމީންއަށް" ސައީދު ވިދާޅުވި އެވެ.