މިއަހަރަށް ރައްޔިތުން މަޖިލިސް ހުޅުވުމަށް ބޭއްވި ޖަލްސާގައި، އިހްތިޖާޖް ކުރި އިދިކޮޅު މެމްބަރުން މަޖިލީހުގެ ތަޅުމުން ނެރުމަށްފަހު ރިޔާސީ ބަޔާން އިއްވަވައިފިއެވެ.
މިއަދުގެ ޖަލްސާ ފަށްޓަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ރިޔާސީ ބަޔާން އިއްވަވަން ފެށްޓެވުމާއެކު ޕީޕީއެމްގެ ނައިފަރު ދާއިރާގެ މެންބަރު އަހްމަދު ޝިޔާމް ތެދުވެވަޑައިގެން އިހްތިޖާޖު ފެށްޓެވިއެވެ. އަދި އެއާއެކު އިދިކޮޅު އެހެން މެންބަރުން އެ އިހުތިޖާޖުގައި ބައިވެރިވެ ރިޔާސީ ބަޔާން އިއްވަވަން ހުރަސް އެޅިއެވެ.
އިދިކޮޅު މެންބަރުން އިހްތިޖާޖާއި ގުޅިގެން ޖަލްސާ ކުރިއަށް ނުގެންދެވިގެން ބައެއް މެމްބަރުންގެ ނަން އިއްވައި މަޖިލީހުގެ ތަޅުމުން ނުކުތުމަށް ރިޔާސަތުގައި އިންނެވި މަޖީލީހުގެ ރައީސް މުހައްމަދު ނަޝީދު އެންގެވިއެވެ.
އޭގެ އިތުރުން ނަން އިއްވި މެންބަރުންގެ ތެރޭގައި ޝިޔާމްގެ އިތުރުން ފަރެސްމާތޮޑާ ދާއިރާގެ މެންބަރު ހުސެން މުހައްމަދު ލަތީފް، ފެލިދޫ ދާއިރާގެ މެންބަރު އިބްރާހިމް ފަޒުލް ރަޝީދު އަދި މާވަށު ދާއިރާގެ މެންބަރު މުހައްމަދު ސައީދު ހިމެނިވަޑައިގަންނަވައެވެ.
އެހެންނަމަވެސް އެމެންބަރުން ނުނުކުތުމާއެކު ޖަލްސާ މެދުކަނޑާލިއެވެ.
އެހެންކަމުން އެ މެންބަރުން ތަޅުމުން ނެރުނީ ބާރުގެ ބޭނުން ކޮށްގެންނެވެ. އެގޮތުން ނެރުމުގެ ތެރޭގައި މެންބަރު ސައީދުގެ ކޯޓުވެސް ވަނީ އިރައިގެން ގޮސްފައެވެ.
އިދިކޮޅުގެ އިހްތިޖާޖު ކުރި މެންބަރުން ނެރުމަށްފަހު އަލުން ޖަލްސާ ފެށީ އިތުކޮޅެއްފަހުންނެވެ. ދެވަނަފަހަރަށް ޖަލްސާ ފެށައި ރައީސުލްޖުމްހޫރިއްޔާ ވަނީ ރިޔާސީ ބަޔާން އިއްވަވާފައެވެ.
Advertisement
This content is created and paid for by advertisers and does not involve Voice Journalists
