ރައްޔިތުންގެ މަޖިލީހުގެ ބޭރުގައި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން ކުރި މުޒާހަރާގެ ތެރެއިން 11 މީހުން ހައްޔަރުކޮށްފި އެވެ. 

އިދިކޮޅުގެ މުޒާހަރާ ފެށިގެން އައި އިރުވެސް މުޒާހަރާ އަށް ހުރަސް އެޅުމަށް ފުލުހުން ވަނީ މަޖިލިސް ކުރާ ގެ ހުންނަ ސަރަހައްދަށް ނުވަދެވޭގޮތަށް ވަށައިގެން ބެރިކޭޑު ޖަހާ ބަންދުކޮށްފަ އެވެ. 

އެހެން ނަމަވެސް އިދިކޮޅުގެ މުޒާހަރާގެ ބައިވެރިން ވަނީ ފުލުހުންގެ ބެރިކޭޑުތައް ޖަހާފައިވާ ސަހަރައްދުގައި މަޑުކޮށްގެން ތިބެ އަޑުއުފުލަން ފަށާފައެވެ. 

ގިނަ އަދަދެއްގެ ބަޔަކު މިއަދުގެ މުޒާހަރާގައި އަޑުއުފުލަމުން ދަނިކޮށް ފުލުހުން ވަނީ މުޒާހަރާ ރޫޅާލުމަށް މަސައްކަތް ފަށާފައެވެ. އަދި ހާލަތާއި ނުބައްދަލު ބާރުގެ ބޭނުންކޮށްފަ އެވެ. 

އިދިކޮޅުގެ އިހްތިޖާޖުގެ ތެރެއިން: ފޮޓޯ/ވޮއިސް

އެގޮތުން މުޒާހަރާ ރޫޅާލުމަށް ޖުމުލަ 11 މީހުން ފުލުހުންގެ ބެލުމުގެ ދަށަށް ގެންގޮސްފައިވާއިރު އޭގެ ތެރޭގައި ހުރާ ކައުންސިލްގެ ރައީސާއި ނޮޅިވަރަމްފަރު ކައުންސިލްގެ ރައީސް ހިމެނިވަޑައިގަންނަވަ އެވެ.

މީގެ އިތުރުން، ފުލުހުން މުޒާހަރާ ރޫޅާލުމުގެ ތެރޭގައި ބާރުގެ ބޭނުން ކުރުމާއި ގުޅިގެން ގިނަ ބަޔަކަށް އެކިވަރުގެ އަނިޔާވެފައި ވާއިރު އޭގެ ތެރޭގައި 2 ނޫސްވެރިންވެސް ހިމެނެއެވެ. އެގޮތުން އަނިޔާވި މީހުންގެ ތެރެއިން 4 މީހުންނަށް ހޮސްޕިޓަލުގައި ފަރުވާ ދޭންޖެހެނު ކަމަށްވެސް އިދިކޮޅުގެ ތަރުޖަމާނު ހީނާ ވަލީދު ވަނީ ވިދާޅުވެފަ އެވެ.