މިއަހަރަށް ރައްޔިތުން މަޖިލިސް ހުޅުވުމަށް ބޭއްވި ޖަލްސާގައި، އިހްތިޖާޖް ކުރި އިދިކޮޅު މެމްބަރުން މަޖިލީހުގެ ތަޅުމުން ބޭރުކުރަން ފިރިހެން ސެކިޔުރިޓީންގެ ބަދަލުގައި އަންހެން ސެކިޔުރިޓީން ނެރުމުން ފާޑުކިޔުން އަމާޒު ވެއްޖެއެވެ. 

މިއަދުގެ ޖަލްސާ ފަށްޓަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ރިޔާސީ ބަޔާން އިއްވަވަން ފެށްޓެވުމާއެކު ޕީޕީއެމްގެ ނައިފަރު ދާއިރާގެ މެންބަރު އަހްމަދު ޝިޔާމް ތެދުވެވަޑައިގެން އިހްތިޖާޖު ފެށްޓެވިއެވެ. އަދި އެއާއެކު އިދިކޮޅު އެހެން މެންބަރުން އެ އިހުތިޖާޖުގައި ބައިވެރިވެ ރިޔާސީ ބަޔާން އިއްވަވަން ހުރަސް އެޅިއެވެ.

އިދިކޮޅު މެންބަރުން އިހްތިޖާޖާއި ގުޅިގެން ޖަލްސާ ކުރިއަށް ނުގެންދެވިގެން ބައެއް މެމްބަރުންގެ ނަން އިއްވައި މަޖިލީހުގެ ތަޅުމުން ނުކުތުމަށް ރިޔާސަތުގައި އިންނެވި މަޖީލީހުގެ ރައީސް މުހައްމަދު ނަޝީދު އެންގެވިއެވެ. 

އޭގެ އިތުރުން ނަން އިއްވި މެންބަރުންގެ ތެރޭގައި ޝިޔާމްގެ އިތުރުން ފަރެސްމާތޮޑާ ދާއިރާގެ މެންބަރު ހުސެން މުހައްމަދު ލަތީފް، ފެލިދޫ ދާއިރާގެ މެންބަރު އިބްރާހިމް ފަޒުލް ރަޝީދު އަދި މާވަށު ދާއިރާގެ މެންބަރު މުހައްމަދު ސައީދު ހިމެނިވަޑައިގަންނަވައެވެ.

އެހެންނަމަވެސް އެމެންބަރުން ނުނުކުތުމާއެކު ޖަލްސާ މެދުކަނޑާލައި ބާރުގެ ބޭނުން ކޮށްގެން މެންބަރުން ވަނީ ނެރެފަ އެވެ. 

އެގޮތުން މެންބަރުން މަޖިލީހުން ބޭރުކުރުމަށް އަންހެން ސެކިޔުރިޓީން ނެރެފައިވާއިރު، ދެ އަންހެން ސެކިޔުރިޓީން ވެގެން އެއް މެންބަރެއް ކޮންޓްރޯލް ކުރުމަށް މަސައްކަތް ކުރާތަން ދައުރު ވަމުންދާ ވީޑިއޯ ތަކުން ވަނީ ފެނިފައެވެ. އެ ސެކިޔުރިޓީންނަށް މެންބަރު ކޮންޓްރޯލް ނުވެގެން އުޅޭ މަންޒަރު ވެސް ވީޑިއޯ ތަކުން ވަނީ ފެނިފައެވެ. 

އެއަށްފަހު، ފިރިހެން ސެކިޔުރިޓީން އައިސް ބައެއް މެންބަރުން ނެރޭ މަންޒަރު ވެސް ވަނީ ފެނިގެން ގޮސްފައެވެ.

ފިރިހެން މެންބަރުންތަކެއް ނެރުމަށް އަންހެން ސެކިޔުރިޓީން މަޖިލީހުން ނެރުނު ސަބަބު ހާމަވެފައި ނުވި ނަމަވެސް، މީގެ ކުރިން މިފަދަ ކަންކަމުގައި އާއްމުކޮށް ނެރެފައިވަނީ ފިރިހެން ސެކިޔުރިޓީންކަން ފާހަގަކޮށްލަން ޖެހެ އެވެ.