ތިލަފުށިން ބިދޭސީންނަށް ބިން ވިއްކުން ހުއްޓާލުމަށް ގޮވާލައި ހުށަހެޅި ކުއްލި މައްސަލަ ބޭރުކޮށްލައިފިއެވެ.

މި މައްސަލަ މަޖިލީހަށް ހުށަހެޅުއްވީ މަޑުއްވަރީ ދާއިރާގެ މެމްބަރު އަދާމް ޝަރީފް އުމަރެވެ. 

މައސަލަ  ހުށަހަޅުއްްވަމުން ޝަރީފް ވިދާޅުވީ، ގްރޭޓާރ މާލޭގެ ގޮތުގައި ބެލެވޭ ތިލަފުއްޓަކީ ދިވެހި ރައްޔިތުންގެ ބައިތުލްމާލުން ހަރަދުކޮށްގެން ތަރައްގީ ކުރަމުން އަންނަ ދިވެހިރާއްޖޭގެ ސިނާއީ މަސައްކަތްތަކަށް ހާއްސަ ކުރެވިފައިވާ ރަށެއްކަމަށެވެ.

Advertisement

އެނާ ވިދާޅުވީ، މާލެ ސަރަހައްދުގައި ބިމުގެ ދަތިކަން ވިޔަފާރިވެރިންނަށް މިހާރު ވެސް ކުރިމަތިވެފައިވާއިރު، ބީލަމުގެ އުސޫލުން ބިދޭސީންނަށް 99 އަހަރަށް ބިން ނުއަގުގައި ވިއްކުމަކީ އެކަމުގެ ނޭދެވޭ އަސަރު ދިވެހި ވިޔަފާރިވެރިންނަށާއި ރާއްޖޭގެ އިގްތިސާދަށް ވަރަށް ބޮޑަށް ކުރާނެ ކަމެއް ކަމަށެވެ.

އަދި ބިން ގަތުމުގެ ވާދަވެރިކަމުގެ ތެރޭގައި ކުދި އަދި މެދުފަންތީގެ ވިޔަފާރިތަކަށް ބިދޭސީންނާއި ވާދަ ކުރަންޖެހޭނެ އުސޫލެއް އޮތުމުން ދިވެހިންނަށް ވިޔަފާރީގެ ފުރުސަތުތައް ހަނިވެ ރާއްޖޭގެ ވިޔަފާރިތައް ކޮންޓްރޯލް ކުރުމުގެ ބާރު ބިދޭސީންނަށް ލިބިގެންދާކަމަށް އެނާ ވިދާޅުވިއެވެ.

"ވަގުތީ މަންފާއެއް ހޯދުމުގެ ބޭނުމުގައި ނުވަތަ ރިޔާސީ އިންތިހާބަށް ސަރުކާރުން ނުފޫޒު ފޯރުވުމަށް ބޭނުންވާ ފައިސާ ހޯދުމުގެ ނިޔަތުގައި ގްރޭޓާ މާލެއިން ބިދޭސީންނަށް 99 އަހަރަށް ބިން ނުއަގުގައި ވިއްކުމަކީ ކުރިމަގުގައި ރާއްޖޭގެ އިގްތިސާދަށް އޭގެ ނޭދެވޭ އަސަރު ވަރަށް ބޮޑަށް ކުރާނެ ކަމެއް،" ކުއްލި މައްސަލައިގައި ބުނެފައިވެ އެވެ.

އާދަމް ޝަރީފް ހުށަހެޅުއްވި ކުއްލި މައްސަލަ ބަލައި ނުގަނެ މަޖިލީހުން ވަނީ ބޭރު ކޮށްލާފައެވެ. އެގޮތުން މައްސަލަ ބަލައި ގަތުމަށް ފެނޭތޯ ނެގި ވޯޓުގައި ބައިވެރިވި 45 މެމްބަރުން ގެ ތެރެއިން 36 މެމްބަރުން ވޯޓު ދެއްވީ މައްސަލަ ބަލައި ނުގަތުމަށް ނުފެންނަ ކަމަށެވެ. ފެންނަ ކަމަށް ވޯޓު ދެއްވީ 9 މެމްބަރުންނެވެ.