ކ. ތިލަފުށިން، ބޭރު ފަރާތްތަކަށް 99 އަހަރަށް ބިން ވިއްކުން ހުއްޓާލުމަށް ސަރުކާރަށް ގޮވައިލައި ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބޭރުކޮށްލި މެންބަރުން އެކަމުގެ ސަބަބުން ލިބޭ ގެއްލުމުގެ ޒިންމާ ނަގަންޖެހޭނެ ކަމަށް އެމްއެންޑީއެފްގެ ކުރީގެ ކެޕްޓަން އަލީ އިހްސާން ވިދާޅުވެއްޖެއެވެ.

ތިލަފުށިން ބިދޭސީންނަށް ބިން ވިއްކުން ހުއްޓާލުމަށް ގޮވާލައިމަޖިލީހުގެ މަޑުއްވަރީ ދާއިރާގެ މެމްބަރު އަދާމް ޝަރީފް އުމަރު ވަނީ ކުއްލި މައްސަލައެއް މިއަދު މަޖިލީހަށް ހުށަހަޅުއްވާފައެވެ. 

ނަމަވެސް އާދަމް ޝަރީފް ހުށަހެޅުއްވި ކުއްލި މައްސަލަ ބަލައި ނުގަނެ މަޖިލީހުން ވަނީ ބޭރު ކޮށްލާފައެވެ. އެގޮތުން މައްސަލަ ބަލައި ގަތުމަށް ފެނޭތޯ ނެގި ވޯޓުގައި ބައިވެރިވި 45 މެމްބަރުން ގެ ތެރެއިން 36 މެމްބަރުން ވޯޓު ދެއްވީ މައްސަލަ ބަލައި ނުގަތުމަށް ނުފެންނަ ކަމަށެވެ. ފެންނަ ކަމަށް ވޯޓު ދެއްވީ 9 މެމްބަރުންނެވެ.

އެކަމާ ގުޅޭގޮތުން ކެޕްޓަން އިހްސާން ކުރެއްވި ޓުވީޓެއްގައި ވިދާޅުވީ ތިލަފުށީގެ ބިން އިންޑިއާގެ ކުންފުނިތަކަށް 99 އަހަރަށް ދިނުމާމެދު "ރައްޔިތުންގެ" މަޖިލީހުގައި ބަހުސްވެސް ކުރަން ބޭނުންނުވާ ކަމަށް ވޯޓުދިން "ރައްޔިތުންގެ" "އިއްޒަތްތެރި" މެންބަރުން އެކަމުން ގައުމަށް ލިބޭ ނިކަމެތިކަމަށް ޒިންމާވާން ޖެހޭނެ ކަމަށެވެ.

ބިން ވިއްކުން ހުއްޓުވުމަށް ގޮވާލައި މައްސަލަ ހުށަހަޅުއްްވަމުން ޝަރީފް ވިދާޅުވީ، ގްރޭޓާރ މާލޭގެ ގޮތުގައި ބެލެވޭ ތިލަފުއްޓަކީ ދިވެހި ރައްޔިތުންގެ ބައިތުލްމާލުން ހަރަދުކޮށްގެން ތަރައްގީ ކުރަމުން އަންނަ ދިވެހިރާއްޖޭގެ ސިނާއީ މަސައްކަތްތަކަށް ހާއްސަ ކުރެވިފައިވާ ރަށެއްކަމަށެވެ.

އެނާ ވިދާޅުވީ، މާލެ ސަރަހައްދުގައި ބިމުގެ ދަތިކަން ވިޔަފާރިވެރިންނަށް މިހާރު ވެސް ކުރިމަތިވެފައިވާއިރު، ބީލަމުގެ އުސޫލުން ބިދޭސީންނަށް 99 އަހަރަށް ބިން ނުއަގުގައި ވިއްކުމަކީ އެކަމުގެ ނޭދެވޭ އަސަރު ދިވެހި ވިޔަފާރިވެރިންނަށާއި ރާއްޖޭގެ އިގްތިސާދަށް ވަރަށް ބޮޑަށް ކުރާނެ ކަމެއް ކަމަށެވެ.

އަދި ބިން ގަތުމުގެ ވާދަވެރިކަމުގެ ތެރޭގައި ކުދި އަދި މެދުފަންތީގެ ވިޔަފާރިތަކަށް ބިދޭސީންނާއި ވާދަ ކުރަންޖެހޭނެ އުސޫލެއް އޮތުމުން ދިވެހިންނަށް ވިޔަފާރީގެ ފުރުސަތުތައް ހަނިވެ ރާއްޖޭގެ ވިޔަފާރިތައް ކޮންޓްރޯލް ކުރުމުގެ ބާރު ބިދޭސީންނަށް ލިބިގެންދާކަމަށް އެނާ ވިދާޅުވިއެވެ.