ދިވެހިރާއްޖެއަށް އެތެރެކުރާ ޑްރަގް ހިފެހެއްޓުމަށްފަހު އެތަކެތި އެތެރެކުރި މީހާ ދޫކޮށްލުމަކީ މަސްތުވާތަކެތި އެތެރެކުރުމަކީ ހުއްދަކުރުމާއި އެއްފަދަ ކަމެއްކަމަށް މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
ބޮންޑާ މިފަދައިން ވިދާޅުވެފައިވަނީ މިއަހަރުގެ މަޖިލީހުގެ ފުރަތަމަ ދައުރުގެ 3 ވަނަ ޖަލްސާގައި ވާހަކަދައްކަވަމުން ނެވެ.
ބޮންޑާގެ ވާހަކަފުޅު ފެއްޓެވީ އެމްޑީޕީގެ ޕްރައިމަރީގެ ފޯރިގަދަ ކެމްޕޭނުގެ ތެރޭގައި މެމްބަރުން މަޝްއޫލުވެ އުޅުއްވި ދަނޑިވަޅެއްގައި އިމިގްރޭޝަންގެ ތެރެއިން ހިނގައިދިޔަ ހާދިސާއެއް ހިއްސާކުރައްވަމުން ނެވެ.
ބޮންޑާ ވިދާޅުވި ގޮތުގައި ރާއްޖެއަށް ޑްރަގް އެތެރެކުރި މީހެއް އިމިގްރޭޝަނުން ވަނީ ޑީޕޯޓުކޮށްލާފަ އެވެ. އެކަން ކޮށްފައިވަނީ ފުލުހުންނާއި އިމިގްރޭޝަނާއި ކަސްޓަމްސްއާއި ގުޅިގެން ގަވައިދެއް އުފަންކޮށް، އެ ގަވައިދުގެ ދަށުން ފޯކަލް ޕޮއިންޓެއް ކަނޑައަޅާ އޭނާގެ ނިންމުމަކަށް ކަމަށް ބޮންޑާ ވިދާޅުވި އެވެ.
"ކުއްލިއަކަށް ފޯކަލް ޕޮއިންޓެއް ހަދަނީ ފުލުހުންނާއި އިމިގްރޭޝަނާއި ކަސްޓަމްސްއާއި، އެ ފޯކަލް ޕޮއިންޓު ހަދާފަ ގަވައިދެއް އެކުލަވާލާފަ ދިވެހިރާއްޖެއަށް މަސްތުވާތަކެތި އެތެރެކުރާ މީހާ މި ފޯކަލް ޕޮއިންޓުން ބޭނުމިއްޔާ ބޭރުކޮށްލެވޭ ގޮތަށް، މި ޑެލިވަރީ މިހާރު ޑީ.އެޗް.އެލް އިން ޝިޕްމަންޓު އައިމަ ޝިޕްމަންޓު ނަގާފަ ބޭރުކުރެވޭ ގޮތަށް ކާޓެއިލެއް އުފައްދާފަ މި އޮތީ"
މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ)
ބޮންޑާ ވިދާޅުވިގޮތުގައި މި ދެންނެވި އުސޫލުން އުފަންކުރި ފޯކަލް ޕޮއިންޓު ވަނީ 26 ޖެނުއަރީގައި ރާއްޖެއަށް ޑްރަގު އެތެރެކުރި މީހެއްގެ އަތުން އެ މަސްތުވާތަކެތި އަތުލުމަށްފަހު މީހާ ޑީޕޯޓުކޮށްލާފަ ކަމަށެވެ.
އެކަން ފާހަގަކުރައްވާ ބޮންޑާ ވިދާޅުވީ ރާއްޖެއަކީ ޑްރަގް ޓްރެފިކިން ހުއްޓުވުމަށް ވަރަށް ގިނަ މުއާހަދާތަކުގައި ސޮއިކޮށްފައި އޮތް ގައުމެއްކަމަށް ވާއިރު، މިފަދަ އުސޫލުތައް ހަދައި ޑްރަގް އެތެރެކުރާ މީހުން ދޫކުރުމަކީ އެ މުއާހަދާތަކާއިވެސް ކަނޑައެޅިގެން ޚިފާލުވުންކަމަށެވެ.
އޭގެ އިތުރުން އޭނާ ވިދާޅުވީ މިފަދައިން އެކަން ކުރެވޭނަމަ އެއީ ރަސްމީކޮށް ރާއްޖެއަށް ޑްރަގް އެތެރެކުރުން ހުއްދަ ކަމަށް ކަނޑައެޅުންފަދަ ކަމެއް ކަމަށެވެ.
"ޖިނާއީ ކުށެއް ދިވެހިރާއްޖޭގެ ސަރަހައްދުގައި ކޮށްފިކަމަށް ވާނަމަ ޕްރޮސެކިއުޓާ ޖެނެރަލް އެ މައްސަލަ ބަލަން އަމުރު ނެރެން ޖެހޭނެ، ޕްރޮޖެކިއުޓާ ޖެނެރަލް ނެތް މި ފޯކަލް ޕޮއިންޓެއްގަވެސް. މިހާރު ރާއްޖެއަށް މަސްތުވާތަކެތި އެތެރެކުރުން ހުއްދަކުރީއޭ! ދެން ކޮންވާހަކައެއްތޯ މިތާ ތިބެގެން ދައްކަން އޮތޯ؟ "
މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ)
ބޮންޑާ ވިދާޅުވީ ކަސްޓަމްސްއިން އަތުލައިގަނެވޭ މަސްތުވާތަކެއްޗާއި ދެމު އަމަލުކުރަންޖެހޭ ވަކި ގޮތެއް ގާނޫނުގައި ކަނޑައަޅާފއިވާ ކަމަށެވެ. އަދި ކަސްޓަމްސްއާއި ހަވާލުކުރެވިފައިވާ މަސްއޫލިއްޔަތުތަކެއްވެސް އޮންނަކަމަށެވެ.
އެހެން ނަމަވެސް މިހާރު އެ ހުރިހާ ގާނޫނާއި ގަވައިދެއް މުގުރާލާފައިވާކަމަށް އޭނާ ވިދާޅުވިއެވެ. އަދި މިއަދު ދިވެހިރާއްޖޭގެ ގާނޫނު އަސާސީގެ ބާރު އެއްކޮށް ކަނޑުވާލާ، މިތަނުގައި އޮތީ އެބަޔަކަށް ފެންނަ ގޮތަކަށް ކަންކަން ކުރުމުގެ އުސޫލުކަމަށް ވިދާޅުވިއެވެ.
މަސްތުވާތެތި އެތެރެކުރާ ފަރާތްތަކަށް ފިޔަވަޅު ނާޅާ ދޫކޮށްލާނަމަ، އެއީ މުސްތަގުބަލުގައި އެއަށްވުރެ ނުރައްކާތެރި ތަކެތި ރާއްޖޭގެ މައި ދޮރޯށިން އެތެރެކުރުމަށް ދެވޭ ފުރުސަތަކަށް ވެދާނެކަން ފާހަގަކުރައްވާ ބޮންޑާގެ ވާހަކައިގައި ވަނީ ބޮޑެތި ކަންބޮޑުވުންތަކެއް ފާޅުކޮށްފަ އެވެ.
Advertisement
This content is created and paid for by advertisers and does not involve Voice Journalists
