އިންޑިއާ އިން އަވަށްޓެރި ގައުމުތަކަށް ކަރަންޓް ވިއްކުމުގައި އެގައުމުގެ ބޮޑުވަޒީރު ނަރެންދުރަ މޯދީގެ ބޮޑެތި ޚިޔާނާތް ތަކެއް ވާކަމަށް އެގައުމުގެ އިދިކޮޅު ކޮންގްރެސް ޕާޓީގެ ލީޑަރު ރާހުލް ގާންދީ ތުހުމަތު ކުރައްވައިފިއެވެ.

ނިމުނު ހަފްތާގެ ބުދަ ދުވަހު އޮތް، އިންޑިއާގެ ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން ރާހުލް ގާންދީ ވަނީ ޚިޔާނާތުގެ ބޮޑެތި ތުހުމަތު ތަކެއް މޯދީއަށް ކުރައްވާފައެވެ.

އެގޮތުން އެ ގައުމުގެ ކަރަންޓްގެ ޚިދުމަތާއި، ޕޯޓް ތަކާއި އެނޫންވެސް އެފަދަ ޚިދުމަތްތައް ފޯރުކޮށްދޭ ކުންފުންޏެއް ކަމަށްވާ އަދާނީ ގުރޫޕްގެ ފައުންޑަރ ގޯތަމް އަދާނީ އަށް ކޮރަޕްޝަންގެ ތެރެއިން ސަރުކާރުގެ އެކި އެކި ޕްރޮޖެކްޓަށް ދޭ ކަމަށް ރާހުލް ވަނީ ތުހުމަތު ކުރައްވާފަ އެވެ. 

Advertisement

އެގޮތުން އަވަށްޓެރި ބަންގްލަދޭޝް އާއި ސްރީލަންކާއަށްވެސް އިންޑިޔާ އިން ކަރަންޓް ވިއްކުމުގެ މަޝްރޫޢުތައް ކޮރަޕްޝަންގެ ތެރެއިން އަދާނީ ގުރޫޕަށް ދީފައިވާ ކަމަށާ، އެފަދަ އެތަކެއް ޕްރޮޖެކްޓް ތަކެއް 2014 ވަނަ އަހަރުގެ ފަހުން މޯދީގެ ސަރުކާރުން އަދާނީ ގުރޫޕަށް ދީފައިވާއިރު، މޯދީގެ ސަރުކާރު އައި ފަހުން އެ ކުންފުނި ބޮޑުތަނުން ކުރިއަރާފައިވަނީވެސް އެފަދަ ކޮރަޕްޝަންގެ އަމަލުތަކުގެ ސަބަބުން ކަމަށް ރާހުލް ތުހުމަތު ކޮށްފައި ވެއެވެ. 

"މޯދީ ބަންގްލަދޭޝް އަށް ދިޔަ ފުރަތަަމަ ފަހަރު އެގައުމަށް ކަރަންޓް ވިއްކުމަަށް ނިންމުމެއް ނިންމައިފި. އޭގެ ދުވަސްކޮޅެއް ފަހުން، ބަންގްލަދޭޝްގެ ޕަވާ ޑިވެލޮޕްމަންޓް ބޯޑުން އަދާނީ ކުންފުންޏާއިއެކު 25 އަހަރު ދުވަހުގެ ޕްރޮޖެކްޓެއްގައި ސޮއިކޮށްފި. ސްރީލަންކާއަށް ދާއިރަށް ސްރީލަންކާގެ އިލެކްޓްރިކް ސިޓީ ބޯޑުގެ ޗެއާމަންކައިރީ ރާޖަޕަކްސާ ބުނެފި، އެގައުމުގެ ވިންޑް ޕަވާ ޕްރޮޖެކްޓް އަދާނީއަށް ދޭން މޯދީ ބުނެފި އޭ." ރާހުލް ބުނެފައިވެއެވެ. 

މީގެ އިތުރުން ވެސް ރާހުލް ވަނީ، އަދާނީ ގެ ކުންފުންޏަށް ކުރެވިފައިވާ މަކަރާއި ހީލަތުގެ ތުހުމަތު ތަކާއި ގުޅިގެން މޯދީގެ ސަރުކާރުން އޭނާއާއި މެދު އެއްވެސް ފިޔަވަޅެއް ނާޅާތީ ވަރަށް ބޮޑަށް ފާޑުވިދާޅުވެފައެވެ. އަދި މޯދީއާއި އަދާނީއާއި ދެމެދު ނުހަނު ގާތް ގުޅުމެއް އޮންނައިރު، އެ ގުޅުމާއި ގުޅިގެން ކުރި އެއްވެސް ސުވާލަކަށް، އަދި އަދާނީ ގުރޫޕަށް ކޮރަޕްޝަންގެ ތެރެއިން ޕްރޮޖެކްޓް ދީފައިވާ ކަމުގެ ތުހުމަތު ތަކަށްވެސް އެއްވެސް ޖަވާބެއް މޯދީ ދީފައި ނުވާތީ އެކަމާއި ގުޅިގެން ރާހުލް ވަނީ ނުރުހުން ފާޅުކުރައްވާފައެވެ. 

ފާއިތުވި ޑިސެމްބަރު މަހުގައި ހޮވާފައިވާ އޭޝިޔާގެ އެންމެ މުއްސަނދި މީހާގެ މަގާމާއި ދުނިޔޭގެ ތިން ވަނައަށް އެންމެ މުއްސަނދި މިހާގެ މަގާމުވެސް ލިބިފައިވާ އަދާނީ އަކީ ނަރެންދުރަ މޯދީއާއި ވެރިކަންކުރާ ބީޖޭޕީއާއި ވަރަށް ގާތް ގުޅުމެއް އޮންނަ ބިލިއަނަރެކެވެ. އެގޮތުން ވަރަށް ގިނައިން މޯދީ އާއި އަދާނީ އެކުގައި ފެނިގެން ގޮސްފައިވާއިރު، އިންޑިއާ ގުޖުރާތުގައި ހުންނަ ސަރުކާރުގެ ހަކަތަ ވިއްކާ ކުންފުންޏަކުން ނު އަގުގައި، އަގު ހެޔޮކޮށްގެން އަދާނީއަށް ގޭސް ވިއްކުމުގައި މޯދީގެ އަތެއް ވާކަމުގެ ތުހުމަތު ތަކެއްވެސް 2012 ވަނަ އަހަރު ތެރޭގައި ކުރެވުނެވެ. 

އެއަށްފަހު، ވެސް އެފަދަ ތުހުމަތުތަކެއް ކުރެވިފައިވާއިރު، ނިމުނު ޖަނަވަރީ މަހުގައި އެމެރިކާގެ ރިސާރޗް ފާމެއް ކަމަށްވާ ހިންޑެންބާރގް ރިސާރޗް އިން އަދާނީ ކުންފުނީގެ މަކަރާއި ހީލަތާއި، ތަކެތީގެ އަގުކުރުމުގައި އޮޅުވާލުންތަކެއް އޮޅުވާލާފައިވާ ކަމަށް ބުނެ ކޮށްފައިވާ ތުހުމަތުތަކުގެ ސަބަބުން އަދާނީގެ ވާހަކަ އަނެއްކާވެސް އިންޑިއާގެ ސިޔާސީ މައިދާނުގެ ހޫނު ބަހުސްތަކުގައި މިވަނީ ހިމެނިފައެވެ. 

އިންޑިއާ އިން އަވަށްޓެރި ގައުމުތަކަށް ކަރަންޓް ވިއްކުމުގައި އެގައުމުގެ ބޮޑުވަޒީރު ނަރެންދުރަ މޯދީގެ ބޮޑެތި ޚިޔާނާތް ތަކެއް ވާކަމުގެ ތުހުމަތު ރާހުލް ކޮށްފައިވާއިރު ދިވެހިރާއްޖޭގެ ކަރަންޓު ގްރިޑާއި އިންޑިއާގެ ކަރަންޓު ގުރިޑު ގުޅުވައިލުމާ ބެހޭ ދިރާސާއެއްވެސް އިންޑިއާ އިން ހަދާފައިވާ ކަމަށް އެގައުމުގެ ހަކަތައާ ބެހޭ ވުޒާރާއިން ބުނެފައިވާކަން ފާހަގަކޮށްލަންޖެހެއެވެ. ނަމަވެސް ރާއްޖޭގެ ސަރުކާރުން އެވާހަކަތައް ދޮގު ކުރެއެވެ.