ދިވެހި ފިލްމު 'ބީވީމާ' އަކީ ރީމޭކެއް ކަމަށާއި 'ދައުރު' ނޫހުން ފިލްމުގެ އަގު ވައްޓާލަން އާޓިކަލް ލިޔުނީ ޒާތީގޮތުން ޖައްސާލައިގެން ކަމަށް ޑާކް ރެއިން އެންޓަޓައިންމެންޓްއިން ބުނެފިއެވެ.

ޑާކް ރެއިންއިން މިފަދައިން ބުނެފައި ވަނީ، މިދިޔަ ބުރާސްފަތި ދުވަހު "ދައުރު އޮންލައި"ގައި 'ބީވީމާ' ފިލްމާ ގުޅޭގޮތުން ލިޔެފައިވާ ލިޔުމަކާ ގުޅިގެންނެވެ.

ޑާކް ރެއިން އިން ބުނީ 'ބީވީމާ' ފިލްމުގެ މަސައްކަތް ފެށި ހިސާބުންވެސް މި ފިލްމަކީ ތަމަޅަ ފިލްމު '96' އަސްލަކަށް ބަލައިގެން ތައްޔާރުކުރާ ފިލްމެއްކަން ފިލްމުގެ ކާސްޓުންނަށާ އަދި މި ފިލްމާ ގުޅޭގޮތުން ނޫސްތަކަށް ދީފައިވާ ބަސްދީގަތުންތަކުގައިވެސް ފާހަގަކޮށްފައިވާނެ ކަމަށެވެ.

"މި ފިލްމު ހެދުމަށް ފިލްމުގެ ޕްރޮޑިއުސަރު ބޭނުންވީވެސް ތަމަޅަ ފިލްމު ބަލާ އެ ފިލްމަށް ހިތުގައި ދެވުނު ލޯތްބެއްގެ ސަބަބުންކަމުގައިވެސް އާންމު ޕްލެޓްފޯމުތަކުގައި ޑައިރެކްޓަރ އަދި ޕްރޮޑިއުސަރުވެސް ވަނީ އެކި ފަހަރު މަތިން ފާހަގަކޮށްފައި. އެހެންކަމުން މިފިލްމަކީ އާންމުންނަށް އޮޅުވާލާ, އޮރިޖިނަލް ޚިޔާލެއްގޮތުގައި ދައްކައިގެން ހަދާފަ އޮތް ކޮޕީއެއްގެ ގޮތުގައި އަހްމަދު ނަދީމްގެ އާޓިކަލްގައި ފާހަގަކޮށްފަ އޮތް އޮތުން މި ކުންފުނިން ކުއްވެރިކުރަން. " ޑާކް ރެއިންގެ ބަޔާނުގައި ވެއެވެ.

ޑާކްރެއިން އިން މިފަދައިން ބުނެފައިވާއިރު، ބީވީމާގެ ޕޯސްޓަރ ނެރުމަށް ބޭއްވި ހަފްލާގައި ވެސް ވަނީ ފިލްމަކީ ރޭމޭކެއް ކަމަށް ބުނެފައެވެ. އަދި ރާއްޖޭގެ ދުވަހު ނޫސްތަކަށް ދީފައިވާ އިންޓަވިއުތަކުގައިވެސް މިފަދައިން ބުނެފައިވާކަން ފާހަގަކޮށްލަންޖެހެއެވެ.

މީގެ އިތުރުން ޑާކް ރެއިން އިން ބުނީ، އާޓިކަލް ލިޔުނު އިރު ދޮގު މައުލޫމާތު ހިމަނައިގެން ފިލްމާއި ފިލްމުގެ ޑައިރެކްޓަރު އަދި ޕްރޮޑިއުސަރުންގެ އަގު ވައްޓާލުމުގެ ނިޔަތުގައި މިފަދަ އާޓިކަލްއެއް ލިޔެފައިއެވަނީ ޒާތީގޮތުން ކުންފުންޏާ ދޭތެރޭ ލިޔުންތެރިޔާ ނަދީމްގެ ހިތުގައި އޮތް ތަޢައްސުބަކުންކަމުގައި ބެލުމުގެ ޖާގަ އެބައޮތް ކަމަށެވެ.

ސަބަބަކީ އަހްމަދު ނަދީމްގެ ވާހަކައެއް ފިލްމަކަށް ހެދުމަށްޓަކައި މީގެ އަހަރުތަކެއް ކުރިން އެ ކުންފުންޏަށް ގެންދިއުމުން އެދުވަސްވަރު އެކުންފުނިން ހަދަން ބޭނުންވާ ޒާތުގެ ވާހަކަޔަކަށް އެ ނުވާވާހަކަ ބުނެ އެކަމަށް އިންކާރު ކުރި ހިސާބުން ނޫސްމަޖައްލާ ތަކުގައި ތަފާތު އެކި ގޮތްގޮތަށް ޑާކް ރެއިން އެންޓަޓެއިންމަންޓްގެ އަގު ވައްޓާލުމަށް އަހްމަދު ނަދީމް އެކި ދުވަސްވަރު މަސައްކަތް ކޮށްފައިވާތީ ކަމަށެވެ.

"ފިލްމް ކްރިޓިކުން ނުވަތަ ފިލްމުތަކަށް ފާޑުކިޔާ އެ ފިލްމުތަކުގެ މޮޅު ދެރަ ފާހަގަކޮށް ފިލްމުތަކުގައި އިތުރަށް ރަނގަޅުކުރަންޖެހޭ ކަންކަމާ ރަނގަޅަށް ކޮށްފަ ހުރި ކަންކަން ފާހަގަ ކޮށްދޭ ލިޔުންތެރިންނަކީ މިއަދު ދިވެހި މުޖުތަމަޢުއަށް ކޮންމެހެންވެސް ބޭނުންވާ ބައެއް. ސަބަބަކީ ދިވެހި ފިލްމް އިންޑަސްޓްރީގެ ކުރިމަގު ބިނާވެފައިވަނީ މިފަދަ ބިނާކުރަނިވި ފާޑުކިޔުންތަކުގެ މައްޗަށް ކަމަށް ވާތީ. އެހެން ނަމަވެސް ފިލްމެއްގެ ހަގީގީ ފެންވަރަށް ފާޑުކިއުމުގެ ބަދަލުގައި އެ ފިލްމު ހެދި ފަރާތްތަކާ ޒާތީގޮތުން އޮތް ހިތްހަމަ ނުޖެހުން, ނޫސްވެރިކަމުގެ ބާރު ބޭނުންކޮށްގެން, ހަގީގަތާ މުޅުން ޚިލާފު ވާހަކަ ހިމަނައިގެން, ބޭރުކޮށްލުމަކީ އަޅުގަނޑުމެންނަށް ބަލައިގަނެވޭނެ ކަމެއް ނޫން" ޑާކް ރެއިންއިން ބުންޏެވެ.

އެ ކުންފުނިން ބުނީ ޒިންމާދާރު ނޫސްވެރިކަމަކީ ޒާތީ ގޮތުން އުފެދިފައިވާ ރުޅިވެރިކަން, ނޫސްވެރިކަމާ ތެދު މައުލޫމާތު ހާމަކުރުމުގެ މުގައްދަސް ވަސީލަތް ބޭނުންކޮށްގެން ފުޅާކުރަން މަސައްކަތް ނުކުރުމުގެ މަތީގަ ބިނާވެފައިވާ ކަމެއްކަމުގައި އެ ކުންފުނިން ގަބޫލުކުރާ ކަމަށެވެ.

ފިލްމު '96' އަކީ ވަރަށް ގިނަ ބަޔަކު ރީމޭކްކޮށްފައިވާ ފިލްމެއްކަން ފާހަގަ ކުރަމުން ޑާކް ރެއިން އިން ބުނީ 'ބީވީމާ' ފިލްމަކީ ދިވެހި މުޖުތަމަޢުއަށް ފައްތައިގެން ތައްޔާރުކޮށްފައިވާ ދިވެހި ރީމޭކެއް ކަމަށެވެ. އެއީ ޑާކް ރެއިން އަދި ލިޔުންތެރިޔާގެ އޮރިޖިނަލް ޚިޔާލެއް ނޫން ކަމަށާއި އެވާހަކަ އެކި ފަހަރު އެކި ޕްލެޓްފޯމްތަކުގައި ވަރަށް ސާފުކޮށް ކިޔާދެވިފައި ވާނެ ކަމަށް ޑާކް ރެއިން އިން ބުންޏެވެ.

ޑާކް ރެއިން އެންޓަޓެއިންމަންޓުން އަބަދުވެސް އެންމެ އިސްކަމެއް ދީ އެންމެ ގަދަރު ކުރާ ބަޔަކީ ފިލްމު ބެލުންތެރިންކަން ފާހަގަ ކުރަމުން އެ ކުންފުނިން އެ ކުންފުނިން އެއްވެސް އިރަކު ބެލުންތެރިންނަކީ ތަންދޮރުނޭނގޭ ބައެއްގެ ގޮތުގައި ދެކިފައެއް ނުވާނެ ކަމަށެވެ. އެހެންކަމުން ހުރިހާ ސްޓްރީމިންގ ޕްލެޓްފޯމަކުން ބަލާލެވެން އޮތް ފިލްމެއްގެ ރީމޭކެއް ހަދާ އެއީ އަމިއްލަ ޚިޔާލެއްގެ ގޮތުގައި ދެއްކުމަށް މަސައްކަތް ކުރަން ދުވަހަކުވެސް ވިސްނާފައި ނުވާނެ ކަމަށެވެ.