ދިވެހިރާއްޖެއަށް މަސްތުވާތަކެތި އެތެރެކުރާ ބިދޭސީން ވަގުތުން އަނބުރާ ފޮނުވައިލެވޭ ގޮތަށް އެކުލަވާލައިފައިވާ މާއްދާ އުވައިލަން ގޮވާލައި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވައިފިއެވެ.

މި މައްސަލަ ހުށަހަޅާފައިވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަޠީފެވެ.

ހަސަން މަޖިލީހަށް ހުށަހެޅުއްވި މައްސަލައިގައި ވަނީ އެމްޑީޕީގެ މައިގަނޑު ސިޔާސަތުތަކުގެ ތެރޭގައި ހިމެނޭ އެއް ސިޔާސަތަކީ “މަސްތުވާ ތަކެއްޗަށް ހުޅުވި ދޮރުތައް ބަންދު ކުރުން" ކަމަށެވެ.

އެ ގޮތުން ދިވެހި ޒުވާން ޖީލު މަސްތުވާތަކެތީގެ ޝިކާރައަށްވެ, އެ ޖީލު ހަލާކުވެ ނެތިދިއުމުން ސަލާމަތް ކުރަން މަސައްކަތް ކުރުމާއި, މަސްތުވާތަކެތި ޓްރެފިކްކޮށް އޭގެ ވިޔަފާރި ކުރާ ފަރާތްތައް ހޯދައި, އެ ފަރާތްތަކަށް އަދަބު ދެވޭނޭ ހަރުދަނާ ނިޒާމެއް ގާއިމުކޮށް އެ ސިޔާސަތު ތަންފީޒުކުރަން ވޭތުވެދިޔަ ތަނުގައި އެމްޑީޕީން އެކުލަވައިލި މެނިފެސްޓޯތަކުގައި ބަޔާންކޮށްފައިވާ ކަމަށް އޭނާ ހުށަހެޅުއްވި މައްސަލައިގައިވެއެވެ.

ނަމަވެސް ޕާޓީގެ ސިޔާސަތާ ދިމާ އިދިކީއްޔަށް ސަރުކާރުން މަސްތުވާތަކެތި ޓްރެފިކްކުރާ ބިދޭސީންނަށް ފަސޭހަކަމާއެކު ބިރެއް ނެތި އެ ވިޔަފާރި ކުރެވޭނޭ ގޮތަށް އަދި އެ ވިޔަފާރިއަށް ހިއްވަރު ލިބޭނޭ ގޮތަށް ސިޔާސަތު ކަނޑައަޅައި ދިވެހިސަރުކާރުގެ ގެޒެޓްގައި ޝާއިއުކޮށްފައިވާ ކަން ހަސަން ވަނީ ފާހަގަ ކުރައްވާފަ އެވެ.

މީގެ އިތުރުން ޙަސަން ވިދާޅުވީ މަސްތުވާތަކެއްޗާބެހޭ ޤާނޫނުގައި މަސްތުވާތަކެތި ޓްރެފިކްކުރަން އުޅުމަކީ ނުވަތަ ޓްރެފިކްކުރަން އެހީތެރިވެދިނުމަކީ ނުވަތަ ޓްރެފިކްކުރުމުގައި އެއްވެސް ސިފައެއްގައި ބައިވެރިވުމަކީ ކުށެއް ކަމަށް އަދި އެ މަސްތުވާތަކެއްޗެއްގެ ބާވަތަށް ބަލައި އެންމެ ބޮޑު އަދަބުގެ ގޮތުގައި 18 އަހަރު ދުވަހުގެ މުއްދަތަށް ޖަލަށްލުމާއެކު 10,000,000 ރުފިޔާއިން ޖޫރިމަނާ ކުރުމަށް ވެސް އެ ޤާނޫނުގައި ބަޔާންކޮށްފައިވާ ކަމަށެވެ. 

"ޤާނޫނުން ކުށާއި އަދަބު ކަނޑައަޅާފައިވާ ކަމެއް ނަފީވާ ގޮތަށް ޤަވާއިދެއް ހަދައި އެޤަވާއިދު ތަންފީޒު ކުރުމަކީ ޤާނޫނީ ގޮތުން ކުރެވޭނޭ ކަމެއް ނޫން." ޙަސަން ލަތީފްގެ މައްސަލާގައިވެއެވެ.

އެހެންކަމުން އޭނާ ވަނީ އިމިގްރޭޝަނުން މިހާރު ގެޒެޓް ކޮށްފައިވާ ޤަވާއިދުގައިވާ މަސްތުވާތަކެއްޗާ ބެހޭ ޤާނޫނާ ފުށުއަރާ ބައިތައް އުނިކުރުމަށް ގޮވާލާފައެވެ.

އިމިގްރޭޝަނުން ގެޒެޓްކުރި ޤަވާއިދުގައި ބުނެފައިވަނީ، ވައިގެ މަގުން ރާއްޖެއަށް އަންނަ ބިދޭސީއަކު މަސްތުވާއެއްޗެއް އެތެރެކުރަން އުޅޭކަމަށް ޝައްކުކުރެވޭނަމަ އެ މީހަކު ރާއްޖެއަށް އެތެރެވުމުގެ ހުއްދަނުދީ އަނބުރާ ފޮނުވާލުމުގެ އިޚްތިޔާރު، ކޮންޓްރޯލާ އޮފް އިމިގްރޭޝަނަށް ލިބިގެންވާ ކަމަށެވެ.

އެ ޤަވާއިދުގެ ދަށުން ކަސްޓަމްސުން ވަނީ، މިމަހުގެ 7 ވަނަ ދުވަހު ގަތަރުގެ ދޯހާއިން ރާއްޖެ އައި ބްރެޒިލްގެ އުމުރުން 23 އަހަރުގެ އަންހެނެއްގެ އަތުން 2.6 ކިލޯގެ ކޮކެއިން އަތުލައިގަތުމަށްފަހު، އެމީހާ ހައްޔަރުނުކޮށް އަނބުރާ ފޮނުވާލާފައެވެ. އެމީހާ އަނބުރާ ފޮނުވާލާފައިވަނީ، ތަންފީޒީ އިދާރާތަކުގެ މަޝްވަރާއާއެކު ކަމަށްވެސް ކަސްޓަމްސުން ވަނީ ބުނެފައެވެ.