މިސްކިތްތަކުގައި މަސްތުވާތަކެތި ބޭނުންކުރާ ކަމުގެ ޝަކުވާތައް ކޮވިޑަށްފަހު ލިބިފައި ނުވާ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ ފަހަކަށް އައިސް މަދުން ނަމަވެސް މިސްކިތް ތަކުގައި މަސްތުވާތަކެތި ބޭނުންކުރާ މައްސަލަ ތައް ފެންމަތިވަމުންދާ ކަމަށް އެކަންކަން ހައްލު ކުރުމަށް މިނިސްޓްރީން އެއްވެސް މަސައްކަތެއް ކުރިޔަށް ގެންދިޔަ ތޯ، ރައްޔިތުންގެ މަޖިލީހުގެ މިއަދުގެ ޖަލްސާގައި މައްޗަން ގޯޅި ދެކުނު ދާއިރާގެ މެމްބަރު އަހުމަދު ހައިތަމް ކުރެއްވި ސުވާލަަށް ޖަވާބު ދެއްވަމުންނެވެ.
ހައިތަމްގެ ސުވާލަށް ޖަވާބު ދެއްވަމުން މިނިސްޓަރު ވަނީ ކޮވިޑްގެ ތެރޭގައި މަސްތުވާތަކެތި ބޭނުން ކުރާ މީހުން މިސްކިތްތަކުގައި ނިދައި އަދި އެތަނުގައި މަސްތުވާތަކެތި ބޭނުން ކުރާ މައްސަލަތައް ވަރަށް ބޮޑަށް ފެންމަތިވެގެން ގޮސްފައިވާ ކަމަށެވެ.
އެހެންނަމަވެސް، މިހާރު، މިސްކިތް ތަކުގައި މަސްތުވާތަކެތި ބޭނުންކުރާ މައްސަލަތައް މިނިސްޓްރީއަށް ހުށަނޭޅޭ ކަމަށާ، މީހުން ނިދާ މައްސަލަތައްވެސް ހުށަހެޅެނީ ވަރަށް މަދުން ކަމަށެވެ. އެގޮތުން މީހުން ނިދާ ކަމަށް މައްސަލަ ހުށަހެޅެނީ މާލޭގައި ދެ ފަންގިފިލާ އަށް ހަދާފައި ހުންނަ މިސްކިތް ތަކުގައި ކަން މިނިސްޓަރު ފާހަގަކުރެއްވިއެވެ.
”ކޮވިޑުގެ ތެރޭގައި އަޅުގަނޑުމެންނަށް ފާހަގަވި ބައެއް މީހުން މިސްކިތްތަކުގެ ތެރޭގައި ނިދައި، އަދި މަސްތުވާތަކެތި ބޭނުން ކުރާކަމަށް… ދެން އޭގެ ފަހުން އަޅުގަނޑުމެންނަކަށެއް ނެތް މަސްތުވާތަކެތި ބޭނުން ކުރާކަމަށެއް… މިސްކިތުގައި ބޭނުން ކުރާކަމަށާއި އަދި މިސްކިތުގައި ނިދާކަމަށް ވެސް އަޅުގަނޑުމެންނަށް ފާހަގަކުރެވިފައެއް.. ނަމަވެސް މަދު މަދުން ނަމަވެސް ދެބުރިއަށް ހެދިފައި ހުންނަ ތަންތަނުގައި މީހުން އެތަނުގައި ނިދާކަމުގެ ޝަކުވާ އަޅުގަނޑުމެންނަށް ލިބޭ“ އިސްލާމިކް މިނިސްޓަރު ޑރ. ޒާހިރު
މިނިސްޓަރު އިތުރަށް ވިދާޅުވީ އެ މައްސަލަ ހައްލު ކުރުމުގެ ގޮތުން، މާލެ ސިޓީ ކައުންސިލާއި ފުލުހުންނާއި އެކު ބައްދަލުވުންތަކެއް ބާއްވައި މަޝްވަރާ ކުރެވުނު ކަމަށާ، އަދި މިހާރުވެސް އެކަން ހައްލު ކުރުމަށް ސިޓީ ކައުންސިލާއި ގުޅިގެން މަސައްކަތް ކުރައްވަމުންގެންދަވާ ކަމަށެވެ.
Advertisement
This content is created and paid for by advertisers and does not involve Voice Journalists
