ދިވެހިރާއްޖެއަށް މަސްތުވާތަކެތި އެތެރެކުރާ ބޭރު މީހުން ދޫކޮށްލެވޭ ގަވައިދެއް ހަދާ، އެ ގަވައިދު ގެޒެޓުކުރި އިރު ދިވެހިރާއްޖޭގެ ބަންޑާރަ ނައިބު ކޮބައިތޯ އައްސަވާ މަޖިލީހުގެ ވިލުފުށި ދާއިރާގެ މެމްބަރު ހަސަން އަފީފު ސުވާލުކުރައްވައިފި އެވެ.
ރާއްޖެއަށް މަސްތުވާތަކެތި އެތެރެކުރާ ބިދޭސީން އަނބުރާ ޤައުމަށް ފޮނުވައިލެވޭ ގޮތަށް ހަދާފައިވާ ޤަވާއިދު އިސްލާހުކުރުމަށް ގޮވައިލާ ރައްޔިތުންގެ މަޖިލީހަށް ހެންވޭރު ހުޅަނގު ދާއިރާގެ މެންބަރު ޙަސަން ލަތީފު ހުށަހެޅުއްވި ކުއްލި މައްސަލައަށް ބަހުސްކުރައްވަން ފައްޓަވަމުން އެންމެ ފުރަތަމަވެސް މެމްބަރު ހަސަން އަފީފު ވަނީ އެވަރުގެ ނުރައްކާތެރި ގަވައިދެއް ހެދިއިރު ސަރުކާރަށް ލަފާ ދެއްވާ ގާނޫނީ ވަކީލު ކޮބައިތޯ ސުވާލުކުރައްވާފަ އެވެ.
އަފީފު ވިދާޅުވީ އެފަދަ ގަވައިދެއް އެކުލަވާލުމުގެ ކުރިން އެ މައްސަލަ ދައުލަތުގެ ބަންޑާރަ ނައިބަށް ފޮނުވަން ޖެހޭ ކަމަށެވެ. އަދި ގަވައިދު އެކުލަވާލުމުގެ ކުރިން ބަންޑާރަ ނައިބުގެ ލަފާފުޅެއްވެސް ހޯއްދަވަން ޖެހޭނެ ކަމަށެވެ. އެހެންކަމުން އެ ގަވައިދު އެކުލަވާލުމުގައި އޭޖީގެ ދައުރު އޮތީ ކިހާ ހިސާބެއްގައި ތޯ ސުވާލު އުފެދޭކަމަށް އޭނާ ވިދާޅުވި އެވެ.
"އަޅުގަނޑުމެންގެ ރާއްޖެއަށް މިއަދު ދިމާވެފައި އޮތް އެންމެ ބޮޑު މައްސަލައަކީ މަސްތުވާތަކެތީގެ މައްސަލަ. ދިވެހިރާއްޖެއަށް މަސްތުވާތަކެތި އެތެރެކުރާ މީހުން ދޫކޮށްލާ ގަވައިދެއް މިއޮތީ ހަދާފަ، މި ގަވައިދުހަދާ ގެޒެޓު ކުރިއިރުގައި އަޅުގަނޑު ހިތަށް އަރާ ކޮބައިބާއޭ ސަރުކާރަށް ލަފާދޭ ގާނޫނީ ވަކީލު؟ ދިވެހި ދައުލަތުގެ އެޓާނީ ޖެނެރަލް؟ ހަމަޔަގީނުންވެސް އޭޖީއަށް މި މައްސަލަ ފޮނުވަން ޖެހޭނެ. އޭނަގެ ލަފާ ހޯދަން ޖެހޭނެ މިފަދަ ގަވައިދެއް އެކުލަވާލާއިރު. އެހެންވީމަ މި ގަވައިދު އެކުލަވާލިއިރު ކޮބައިތޯ އަޅުގަނޑު ހިތަށް މި އަރަނީ އޭޖީ؟ ކޮންތާކުތޯ ހުންނެވީ؟"
ވިލުފުށި ދާއިރާގެ މެމްބަރު ހަސަން އަފީފު
އަފީފު ވިދާޅުވީ މި މައްސަލައަކީ ދޫކޮށްލެވޭ ވަރަށްވުރެ ބޮޑު މައްސަލައެއް ކަމަށެވެ. ދިވެހިރާއްޖެ "ޑްރަގް ކާޓެއިލް" އަކަށް ވެގެންދާން ދޫކޮށްލައިގެން ތިބުމަކީ ބަލައިގަނެވޭނެ ކަމެއް ނޫންކަމަށް އޭނާ ވިދާޅުވި އެވެ.
މިފަދަ ގަވައިދެއްގެ ސަބަބުން ޑްރަގާއި ދެކޮޅަށް މަސައްކަތްކުރާ ގައުމުތަކުން ރާއްޖެއާއި ދޭތެރޭ ދެކޭގޮތް ބަދަލުވެ އެކިވަރުގެ ފިއްތުންތައް ކުރިމަތިވާނެކަން ފާހަގަކުރައްވާ އަފީފު ވަނީ ކަންބޮޑުވުން ފާޅުކުރައްވާފަ އެވެ.
އަދި އެފަދަ ހައްސާސް މައްސަލައެއް މަޖިލީހަށް ހުށައެޅުއްވުމުން، އެ މައްސަލަ ބޭރުކޮށްލުމަށް ސަރުކާރު ހިންގާ މައި ޕާޓީ އެމްޑީޕީގެ ޕީޖީ ގްރޫޕުން ވިލްލައިން ނެރުނީތީ ލަދުގަންނަ ކަމަށާއި، އެމްޑީޕީ ޕީޖީ ލީޑަޝިޕްގެ އެ އަމަލު ކުށްވެރިކުރާކަމަށް އަފީފު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
