އިންޑިޔާއަށް ބޭސްފަރުވާއަކަށް ގޮސްހުއްޓައި އެ ގައުމުގެ އިމްގްރޭޝަނުން ހިފެހެއްޓި ޢަބްދުޞަމަދު މިއަދު މާލެ އަތުވެއްޖެއެވެ.

ޞަމަދު އިންޑިޔާއަށް ގޮސްގެން އުޅުނީ ބޭސްފަރުވާއަކަށެވެ.

ރާއްޖެ އައިސް ވެލާނާ އިންޓަރނޭޝަނަލް އެއަރޕޯޓުގައި ހުރެ ޗެނަލް13 އަށް ދިން އިންޓަރވިއުއެއްގައި ބުނެފައިވަނީ މީގެ ތިންދުވަސް ކުރިން އެނާ އާއިލާއާއި އެކު އިންޑީޔާއަށް ދިޔައީ ބޭސްފަރުވާއަކަށް ކަމަށާއި، އިންޑިޔާގެ އިމިގްރޭޝަން އޮފިސަރުން އޭނާ ހިފެހެއްޓީ މަނިޕާލް ހޮސްޕިޓަލުން ކަމަށެވެ.

Advertisement

ޞަމަދު ބުނެފައިވަނީ އިންޑިޔާ އިމިގްރޭޝަނުން އޭނާގެ އާއިލާއަށް ދޮގުހެދި ކަމަށާއި، ހިފެހެއްޓި ސަބަބެއް ކަމަށް އާއިލާ އަށް އެންގީ އިނގިލީގެ ނިޝާނުގެ މައްސަލައެއް އުޅުން ކަމަށެވެ. އިމިގްރޭޝަން އޮފީހަށް ގެންގޮސް 18 ގަޑިއިރުވަންދެން އެއްވެސް ސުވާލެއް ކުރުމެއްނެތި އެތަނުގައި ބެހެއްޓީކަމަށެވެ.

ވީ ގޮތަކާއި މެދު ސުވާލު ކުރުމުން ކުށްވެރި ވެފައި ހުރިކަމަށް ބުނިކަމަށާއި، އިންޑިޔާ ތެރޭގައި އުޅުން ޞަމަދު އަށް މަނާ ކަމަށް ބުނިކަމަށާއި، އިންޑިޔާ އެއް އެރުން މަނާވާނެ ކަމަށާއި ދެން އިންޑިޔާއަށް އެތެރެވެއްޖެނަމަ ޖަލަށް ލާނެ ކަމަށް ބުނި ކަމަށް ވެސް އޭނާ ބުނެފައިވެއެވެ.

އިތުރު ވާހަކަ ދެއްކުމަށް ފުރުޞަތު ނުދީ އޭނާގެ ފޯނު އަތުލިކަމަށާއި އާއިލާއަށް ގުޅައިދޭން އެދުމުން އެކަމަށް އިޖާބައެއް ދީފައިނުވާކަމަށް ޞަމަދު ބުނެފައިވެއެވެ.

ޞަމަދު ބުނީ އޭނާ ބަހައްޓާފައިވަނީ އެއަރޕޯޓުގެ ފިނިގަދަ ކޮޓަރިއެއް ގައި ކަމަށާއި ފިނިން ސަލާމަތްވުމަށް ރަޖައެއްވެސް ދީފައި ނުވާކަމަށެވެ. އަދި ކާއެއްޗެއްވެސް ދީފައިވަނީ ކާއެއްޗަކަށް އެދުނުތާ ވަރަށް ގިނަ އިރުވީފަހުން ކަމަށެވެ. ފިނިން ސަލާމަތްވުމަށް ބޭނުންކުރީ އެތަނުގައި އޭރުހުރި ސައުތްއެފްރިކާ މީހާ ދިއުމުން އޭނާ ބޭނުންކުރި ރަޖާކަމަށެވެ.

އަދި އޭނާ އަކީ ހިތުގެ ބަލި، ލޭ މައްޗަށް ދިއުން އަދި ކޮލެސްޓްރޯލް ވެސް ހުންނަ މީހެއް ކަމަށާއި، ބޭސް ނުލިބި މިދިޔައީ ހަތަރު ދުވަސްކަމަށެވެ. ނަފްސާނީ ގޮތުންނާއި ޖިސްމާނީ ގޮތުން ލިބުނު ބަދަލު އިންޑިޔާ ސަރުކާރުން ހޯދަން ބޭނުންވާކަމަށެވެ.

ޞަމަދު ބުނީ އޭނާގެ ހަމައެކަނި ކުށަކީ ރައީސް ޔާމިނަށް ތާއީދު ކުރުން ކަމަށެވެ. ޞަމަދު އަކީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ހުޅުމާލެ ދާއިރާގެ ރައީސް އެވެ.