ޑިގްރީ ހަދާ ޓީޗަރުންގެ މުސާރަ ބޮޑު ކުރުމުގައި ގެންގުޅޭ އުސޫލާއި ގުޅިގެން ގިނަ ޝަކުވާ ތަކެއް ލިބެމުންދާ ކަމަށާ، އެހެން ނަމަވެސް އެ މައްސަލަ ހައްލު ކުރުމަށް އެކޮމިޝަނަށް ކުރެވޭނެ ކަމެއް ނެތް ކަމަށް ސިވިލްސާވިސް ކޮމިޝަނުން ބުނެފިއެވެ.
މުސާރައިގެ އާ އޮނިގަނޑަށް އަމަލުކުރަން ފެށިފަހުން ޑިގްރީ ހާސިލްކުރާ ޓީޗަރުން އެއް ސްކޫލެއްގައި މަސައްކަތްކުރާ ނަމަ މުސާރަ ބޮޑު ކުރުމަށް، ދެ އަހަރުވަރު މަޑުކުރަން ޖެހެއެވެ. ނަމަވެސް ހަމަ އެ ޓީޗަރު އެ ސުކޫލުގެ އެ މަގާމުން އިސްތިއުފާ ދީ، އަލުން ކުރިމަތިލައިފި ނަމަ، ނުވަތަ، އެހެން ސުކޫލެއްގެ ހަމަ އެ މަގާމާއި ކުރިމަތި ލައި، ވަޒީފާއަށް ހޮވިއްޖެ ނަމަ އައު މުސާރަ (ބޮޑު މުސާރަ) ލިބެއެވެ.
އެކަމާއި ގުޅޭގޮތުން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި އިއްޔެވަނީ މަޝްވަރާތަކެއް ކުރެވިފައެވެ.
ޕޭ ކޮމިޝަނާއި ސިވިލް ސާވިސް ކޮމިޝަނުންވެސް ބައިވެރިގެން ކުރިއަށް ގެންދިޔަ މި ބައްދަލުމުގައި މިނިވަން މުއައްސަސާތަކާ ބެހޭ ކޮމިޓީގެ މުގައްރިރު އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވަނީ އަދިވެސް ޓީޗަރުންގެ މުސާރައިގައި ކަންބޮޑުވާން ޖެހޭ ގިނަ ކަންތައްތަކެއް ހުރިކަމަށް އެ ކަމުގެ ޝަކުވާތައް އަދިވެސް ލިބެމުން އަންނަކަމަށެވެ.
"މިސާލަކަށް ޑިގްރީ ހެދީމާ ޓީޗަރުންނަށް ލިބޭ ކުރިއެރުން، މި ކަންކަމުގެ މައުލޫމާތު ތި ބޭފުޅުންނަށް އަޅުގަނޑުމެންނަށް އެ ދެވޭނީ ބޮޑަށް އެ ހުރި ގޮތެއް. އަޅުގަނޑުމެން ކަންބޮޑުވާ ގޮތަކަށް އެ ބޭފުޅުންގެ ފަރާތުން އަޅުގަނޑުމެންނަށް މައުލޫމަތު ލިބެނީ،"
"މި ދައްކަނީ އޭނާގެ ކިޔަވައިގެން ހުންނަ ލެވަލް އެއަށްވުރެ މައްޗަށް ދިޔައީމަ އޭނާ ސީނިއީ އިންގްލިޝް ޓީޗަރަކަށް ހަދަނީކީއެއް ނޫން. ނުވަތަ އޭނާ ލީޑިން ޓީޗަރަކަށް ބަދަލުވާ ވާހަކައެއް ނޫން މި ދައްކަނީ. އަޅުގަނޑުމެން މި ދައްކަނީ ކިޔަވައިގެން އެ މައްޗަށް ދިޔައީމަ ކީއްވެގެންތޯއޭ އަނެއް ސްކޫލުގައި ހުންނަ ޓީޗަރުގެ މުސާރަ އޭނާ ވެސް ޑިގްރީ ހެދީމަ އަނެއް ސްކޫލުގައި ހުންނަ ޑިގްރީ ޓީޗަރަށް ނުލިބެންވީ. އޭނާ އެހެން ސްކޫލަކަށް އަނެއްކާ އެ ކަން ކުރަން ދާން ޖެހެނީ،" ރޮޒައިނާ ފާހަގަކުރެއްވިއެވެ.
ކޮމިޓީގައި މެންބަރު ރޮޒައިނާ ވާހަކަ ދައްކަވަނީ:ފޮޓޯ/ މަޖިލިސް
ރޮޒައިނާގެ ވާހަކަތަކާއި ގުޅިގެން ސިވިލް ސާވިސް ކޮމިޝަންގެ ނައިބު ރައީސް އިބްރާހިމް ރަޝީދުވެސް ވަނީ އެ މައްސަލަ ތަކުރާރުކޮށް އެ ކޮމިޝަނަށް ހުށަހަޅަމުން އަންނަ ކަމަށާ އެކަމާއި ގުޅިގެން އެޑިއުކޭޝަން މިނިސްޓްރީއާއި ޕޭ ކޮމިޝަނާއެކު ވެސް ބައްދަލުވުމެއް ބޭއްވިކަމަށެވެ.
އިބްރާހީމް ރަޝީދު ވިދާޅުވީ، މުސާރައަށް ބަދަލު ގެނެވޭނީ ޕޮލިސީއަކު ކަމަށާ، މުސާރަތައް ހަމަހަމަކުރުމުގެ މަސައްކަތްކުރިއަށްގެންދަނީ ޕޭ ކޮމިޝަނުންކަމަށެވެ.
އެހެންކަމުން މިކަމުގައި ސިވިލް ސާރވިސް ކޮމިޝަނަށް ކުރެވޭނެ ކަމެއް ނެތްކަމަށް އޭނާ ވިދާޅުވިއެވެ.
"އަޅުގަނޑުމެންނަށް ޕޭ ކޮމިޝަނާއިއެކު ބައްދަލުވުންތައް ބޭއްވޭ. އެހެންކަމުން މިހާރު އަޅުގަނޑުމެން މިމައްސަލައިގައި މެއި 1 ގެ ކުރިން ޑިގްރީ ހަދާފައި ތިބި ބޭފުޅުންނަށް މައްސަލަ ހައްލުކުރުމަށް އަޅުގަނޑުމެން އެޑިއުކޭޝަނަށް ޓީޗަރުންގެ ލިސްޓެއް ނެގުމަށް މިހާރު ވާނި ފޮނުވާފައި." އިބްރާހިމް ރަޝީދު ވިދާޅުވިއެވެ.
ޓީޗަރުންގެ މުސާރަ ބޮޑުކުރުމުގައި އަމަލުކުރާ މި އުސޫލު އިސްލާހު ކުރެވޭނެ ގޮތެއް ސިވިލްސާވިސް ކޮމިޝަނަށް ބުނެދެވިފައި ނުވާއިރު، ޕޭ ކޮމިޝަނުން ވެސް އެދެވޭ ޖަވާބެއް ދީފައެއް ނުވެއެވެ. އެ ކޮމިޝަނުން މި ކަމާއި ގުޅިގެން ބުނީ، ސްކޫލަތުގައި ހުންނަ ހުސް މަގާމުތަކަށް ކުރިމަތިލައި، އެ މަގާމަށް ހޮވިގެން އެ ކަން ހައްލުކުރަން ޓީޗަރުން މަސައްކަތް ކުރުމަކީ މިވަގުތު މައްސަލަ ހައްލު ކުރުމަށް ކުރެވިދާނެ ކަމެއް ކަމަށެވެ.
Advertisement
This content is created and paid for by advertisers and does not involve Voice Journalists
