ފޮރެންސިކްގެ ބެލުމުގެ ދަށަށް ގެނެވޭ ހެއްކެއްގައި ހުންނަ އެއްވެސް މައުލޫމާތެއް ލީކު ނުވާނެ ކަމުގެ ފުރިހަމަ ޔަގީންކަން ފުލުހުންގެ ޚިދުމަތަށް އޮންނަ ކަމަށް އެ އިދާރާއިން ބުނެފިއެވެ. 

ފާއިތުވި އަހަރުގެ ފަހުކޮޅު މަސްތުވާތަކެތީގެ މައްސަލައެއްގައި ހައްޔަރު ކުރި ފިލްމީ ދާއިރާއަށް ނިސްބަތްވާ އަންހެނެއްގެ ފޯނު އެ މައްސަލަ އާއި ގުޅިގެން ހެއްކެއްގެ ގޮތުގައި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް އޭނާ ވަނީ މީސްމީޑިއާގައި ބުނެފައެވެ.  

އަދި މިދިޔަ އަހަރުގެ ނޮވެމްބަރު އަދި ޑިސެމްބަރު މަހުގައި އެ ފޯނު އޮތީ ފުލުހުންގެ ފޮރެންސިކް ޓީމުގެ ބެލުމުގެ ދަށުގައި ކަމަށާ، އެ ޓީމުގެ ތިން މެންބަރަކަށް އޭނާގެ ފޯނުގެ ޕާސްވޯޑް ދީފައިވާނީ ކޯޓު އަމުރެއްގެ ދަށުން ކަމަށްވެސް އޭނާ ބުންޏެވެ. 

Advertisement

އެހެން ނަމަވެސް، މިހާރު އެ ފޯނުގައި ހިމެނޭ ފޮޓޯތަކާއި ވީޑިއޯތައް މީސްމީޑިއާގައި ދައުރުވަމުންދާ ކަމަށާ، އެ މައްސަލަ ކޯޓަށް ހުށަހަޅައިގެން ވެސް އެކަން ކުރި ފުލުހުންނަށް ހައްގު އަދަބު ދޭން މަސައްކަތް ކުރާނެ ކަމަށް އޭނާ ބުނެފައިވެއެވެ. 

އެކަމާއި ގުޅިގެން "ވޮއިސް" އިން ކުރި ސުވާލަކަށް ޖަވާބު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، ފުލުހުންގެ ބެލުމުގެ ދަށަށް ހެކީގެ ގޮތުގައި ގެނެވޭ ތަކެތި ގެންގުޅުމާއި ބެލެހެއްޓުމުގައި ޢަމަލުކުރަނީ ގާނޫނުގައިވާ ގޮތުގެ މަތިން އަދި ބައިނަލްއަގުވާމީ ބެސްޓް ޕްރެކްޓިސްއާ އެއްގޮތަށް ކަމަށެވެ. 

"ފޮރެންސިކްގެ ބެލުމުގެ ދަށަށް ގެނެވޭ ހެއްކެއްގައި ހުންނަ އެއްވެސް މައުލޫމާތެއް ލީކު ނުވާނެ ކަމުގެ ފުރިހަމަ ޔަގީންކަން މިޚިދުމަތަށް އޮވޭ. ފޮރެންސިކް ލެބޯރަޓަރީގެ މަސައްކަތްތައް ތަރުތީބުކުރެވިފައި ހުންނާނީ ޕްރައިވެސީ ރައްކާތެރިކޮށްދެވޭ ގޮތަށް." ފުލުހުންގެ މީޑިއާ އޮފިޝަލް ވިދާޅުވި އެވެ.