ސްޕާ ހިންގުމުގެ ގަވާއިދު ހަދައި، ކުރިން ހިންގި ތަންތަން ރަޖިސްޓްރީ ކުރަން އިކޮނޮމިކް މިނިސްޓްރީން އަންގައިފިއެވެ.

އިކޮނޮމިކް މިނިސްޓްރީން މިފަދަ ގަވާއިދެއް ހަދާފައި މިވަނީ، މަސާޖުކޮށްދޭ ތަންތަނުގައި ހަށިވިއްކުމާއި ބަދުއަހުލާގީ އަމަލު ހިންގުމާއި އެކަން އިސްތިހާރުކުރުމުގެ މައްސަލަ ބޮޑުވެފައިވަނިކޮށެވެ.

އެ ގަވާއިދުގައި ސްޕާ ހިންގާ ތަންތަނުގައި ހުންނަން ޖެހޭ މިންގަނޑުތަކާއި އެ ތަންތަނުގައި ދެވޭނެ ހިދުމަތްތައް ތަފްސީލުކޮށް ބަޔާންކޮށްފައި ވެއެވެ.

Advertisement

ގަވާއިދުގައި ވާގޮތުން ރާއްޖޭގައި ހިންގާ ސްޕާ އިން ހިދުމަތަކާ ބެހޭ މައުލޫމާތު ނުވަތަ ހިދުމަތެއްގެ ވީޑިއޯއާއި ފޮޓޯ، މިންގަނޑާ ހިލާފަށް ސޯޝަލް މީޑިއާގައި އިސްތިހާރުމަކީ މަނާކަމެކެވެ. ސްޕާގައި މަސައްކަތްކުރާ މީހުންގެ އަމިއްލަ ގޮތުން ވިޔަސް ފޮޓޯއާއި ވީޑިއޯ ސޯޝަލް މީޑިޔާގައި ހިއްސާކުރުން މަނާވާނެއެވެ.

އޭގެ އިތުރުން މުޖުތަމައުގެ އަދަބު އަހުލާގުގެ މިންގަނޑުކަމަށް އާންމުގޮތެއްގައި ގަބޫލުކުރާ މިންގަނޑުތަކާ ހިލާފަށް އިސްތިހާރުކުރުމާއި އިޖުތިމާއީ މިންގަނޑުތަކަށް ނުފެތޭ ބަސްމަގާއި އިޝާރާތާއި އަޑު އިސްތިހާރުގައި ބޭނުންކުރުން ނުވަތަ ދެއްކުން އަދި ސްޕާގެ ވިޔަފާރި ހަރަކާތް ހިންގާ ތަން އިސްތިހާރު ކުރުމުގައި އެއްވެސް މީހަކު ހިމެނުން ނުވަތަ ދެއްކުމަކީ ގަވައިދުގައިވާ ގޮތުން މަނާ ކަމެކެވެ.

ސްޕާގެ ވިޔަފާރި ހަރަކާތް ހިންގާ ތަނުގައި ބަދުއަހުލާގީ އަމަލު ހިންގުމަކީ މަނާކަމެއް ކަމަށް ގަވާއިދުގައިވެއެވެ.

ގަވާއިދުގައިވާ ކަންކަމާ ހިލާފަށް ސްޕާގެ އަމަލުތައް ހުރިނަމަ ފިޔަވަޅުއަޅައި، ޖޫރިމަނާ ކުރުމަށް ވަނީ ހަމަޖެހިފައެވެ.