ހަށިވިއްކާ ތަނުގައި ޖިންސީ ގުޅުން ހިންގަނިކޮށް ހައްޔަރު ކުރި ދިވެހި މީހާ، ކްރިމިނަލް ކޯޓުން ދޫކޮށްލައިފިއެވެ. 

މިމަހު 21 ވަނަ ދުވަހުގެ ރޭ ފުލުހުން މާލޭގައި ހިންގި އޮޕަރޭޝަނެއްގައި ހަށިވިއްކާ ކަމަށް ތުހުމަތު ކުރެވޭ މައްސަލަ އެއްގައި، "ރޯޅި ގެސްޓް ހައުސް" ބަލައި ފާސްކޮށް، ހަތަރު މީހުން ވަނީ ހައްޔަރުކޮށްފަ އެވެ. 

އެގޮތުން ހައްޔަރު ކުރެވުނީ 43 އަހަރުގެ ދިވެހި ފިރިހެނަކާއި، 43 އަހަރުގެ ބިދޭސީ ފިރިހެނަކާއި، 31 އަހަރުގެ ބިދޭސީ އަންހެނަކާއި، 36 އަހަރުގެ ބިދޭސީ އަންހެނެއް ކަމަށްވެސް ފުލުހުން ވިދާޅުވި އެވެ.  

އަދި މި ހަތަރު މީހުންގެ ތެރެއިން ދިވެހި ފިރިހެން މީހާ އާއި ބިދޭސީ އަންހެނަކު ހައްޔަރު ކޮށްފައިވަނީ ޖިންސީ ގުޅުން ހިންގަމުން ދަނިކޮށް ކަމަށްވެސް ފުލުހުން ބުނެފައިވެއެވެ. 

އެކަމާއި ބެހޭ އިތުރު މައުލޫމާތު ދެމުން ފުލުހުންގެ މީޑިއާ އޮފިޝަލް މިއަދު ވިދާޅުވީ، އެ ހަތަރު މީހުންގެ ބަންދާއި މެދު ގޮތެއް ނިންމަން ކްރިމިނަލް ކޯޓަށް ހާޒިރު ކުރުމުން، 43 އަހަރުގެ ދިވެހި ފިރިހެން މީހާ، ކޯޓުން ޝަރުތު ތަކެއް ކުރުމަށްފަހު ދޫކޮށްލާފައިކަމަށެވެ. 

އަދި 43 އަހަރުގެ ބިދޭސީ ފިރިހެން މީހާ ބަންދުގައި ބެހެއްޓުމަށް 15 ދުވަހުގެ މުއްދަތު ދީފައިވާއިރު ބިދޭސީ ދެ އަންހެނުން ބަންދުގައި ބަހައްޓަން ކޯޓުން ދީފައިވަނީ އެންމެ ދުވަހެއް ކަމަށް ފުލުހުން ބުނެފައިވެއެވެ.