ސައިބާރސްޕޭސް ގައި ކުރާ ކުށްތައް ތަހުގީގު ކުރުމުގައި ބޭރުގެ ފަރާތްތަކުގެ އެހީ ހޯދޭ ގޮތަށް ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނު އިސްލާހު ކުރުމަށް ސަރުކާރުން ހުށަހެޅި ބިލުގެ ފައިދާ ނަގާނީ ރާއްޖެތޯ ނޫނީ އެހެންޤައުމަކުންތޯ ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުހައްމަދު ސައީދު ސުވާލުއުފައްދައިފި އެވެ.
ސަރުކާރުގެ ފަރާތުން، މައްޗަންގޮޅި ދެކުނު ދާއިރާގެ މެންބަރު އަޙްމަދު ޚައިތަމް ހުށަހަޅުއްވާފައިވާ، ޤާނޫނު ނަންބަރު 2/2015 (ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނު) އަށް އިޞްލާޙު ގެނައުމުގެ ބިލާއި ގުޅިގެން ކަންބޮޑުވުން ފާޅުކުރައްވައި ސައީދު ކުރެއްވި ޓުވީޓެއްގައި ވިދާޅުވީ، އެ އިސްލާހުގެ ސަބަބުން ޤައުމީ ސަލާމަތުގެ ބާރުވެސް ދޫވެގެން ދާނެކަމަށެވެ.
އަދި އެ ބިލުގެ ފައިދާ ނަގާނީ ރާއްޖެތޯ ނޫނީ އެހެން ޤައުމަކުންތޯ ސުވާލު އުފައްދަވައި، ސައީދު ވިދާޅުވީ އެއީ ޖުމްލަކޮށް ދައުލަތް ވަކި ބަޔަކު ރުއްސަން ދޫކޮއްލުން ކަމަށެވެ.
"މިއީ ރޭވިގެން ދައުލަތުގެ ބާރުކަނޑުވާލުން. ދިވެހިންގެ ވިޔަފާރި، ބޭންކުތައް، މުއައްސަސާތައް. ޖުމްލަކޮށް ދައުލަތް ވަކިބަޔަކުރުއްސަން ދޫކޮއްލުން!" ސައީދު ވިދާޅުވި އެވެ.
ހައިތަމްގެ މި ބިލު ހުށަހެޅުއްވުމުގެ ބޭނުމެއް ކަމުގައި ވިދާޅުވެފައިވަނީ، ސައިބާރސްޕޭސް ގައި ކުރާ ކުށްތައް ރާއްޖޭގައި އިތުރު ވެގެންދިޔުމާއި، އެފަދަ ކުށްތައް ކުރާފަރާތްތަކުން އެ ކުށް ކުރަމުންދާގޮތް އެ ކުށުގެ އަމަލު ހިންގަމުންދާގޮތް، ޓެކްނޮލޮޖީގެ ވަސީލަތްތައް ބޭނުންކޮށްގެން އިތުރަށް ފުޅާކުރަމުންދާތީ، އެފަދަ ސައިބާރ ކްރައިމް ތަކާއި އެނޫންވެސް ކޮމްޕިއުޓަރ ސިސްޓަމް ބޭނުން ކޮށްގެން ކުރާ އެހެން ކުށްތަކާއި، އިލެކްޓްރޯނިކް ހެކި އެކުލެވިގެންވާ ކުށްތައް ހުއްޓުވައި ފިޔަވަޅު އެޅުމުގައި އެހެން ގައުމުތަކާއި އެކު، ގާނޫނީ އެހީތެރިކަން ބަދަލުކުރުމާއި ގުޅޭ ގޮތުން ކަނޑައަޅަންޖެހޭ އިޖުރާއަތުތައް ކަނޑައެޅުމެވެ.
Advertisement
This content is created and paid for by advertisers and does not involve Voice Journalists
