އެމްއާރުއެމް ފިޔަވައި ރާއްޖޭގެ ސިޔާސީ އެހެން ޕާޓީތަކުން ކުރިއެރުން ހޯދަނީ ދޭތެރެ ޖައްސައިގެން، ފިތުނު އުފައްދައިގެން ކަމަށް އެމްއާރްއެމްގެ ރައީސް ފާރިސް މައުމޫން ވިދާޅުވެއްޖެ އެވެ. 

މިއަދު ޓުވީޓާގައި ހިއްސާކޮށްފައިވާ ވީޑިއޯއެއްގައި ފާރިޝް ވިދާޅުވީ، މިދުވަސްވަރު އެންމެ ގިނައިން ދެކެވޭ ވާހަކަ އަކީ އެބައެއްގެ ޕާޓީގެ މެންބަރުންނަށް ވަޒީފާ ހޯދައިދޭނެ ވާހަކަ ކަމަށާ އެފަދައިން ވާހަކަ ދެއްކުމުން، މިއީ ހަމައެކަނި ސިޔާސީ ޕާޓީތަކުގެ ގައުމެއް ހެން ހީވާ ކަމަށެވެ.

އެހެން ނަމަވެސް އެއީ ހަގީގަތެއް ނޫން ކަން ފާހަގަކުރައްވައި ފާރިސް ވިދާޅުވީ ރާއްޖޭގައި ވޯޓުލެވޭ މީހުންގެ ދެބައިކުޅަ އެއްބަޔާއި ގާތަށް ވެސް ޕާޓީތަކަށް މީހުން ސޮއި ނުކުރާ ކަމަށެވެ. އަދި އެމީހުން ސިޔާސީ ޕާޓީތަކަށް ސޮއި ނުކުރަނީ ސިޔާސީ ޕާޓީއެއްގައި އުޅެން ބޭނުން ނުވާތީ ކަމަށާ، އެމީހުންގެ ހައްގުތަށް ރައްކާތެރިކުރާނެ ޕާޓީއެއްވެސް ރާއްޖޭގައި އޮންނަން ޖެހޭ ކަމަށް ވިދާޅުވި އެވެ.

އެހެންކަމުން އެމްއާރްްއެމް އިން މަސައްކަތް ކުރަނީ އެމީހުންގެ ހައްގުތަށް ވެސް ރައްކާތެރިވާނެ ގޮތެއް ބަލައިގެން ކަމަށް އޭނާ ވިދާޅުވި އެވެ. 

"އެހެންވީމައި އަޅުގަނޑުމެން އަނެއްކާ ވެސް އެހެން ޕާޓީތަކުން ވާދަކުރާއިރު ތިމަންނަމެން 20،000 މީހުންނޭ 30،000 މީހުންނޭ ތިމަންނަމެން ޕާޓީ މީހުންނޭ ވަޒީފާ ދޭނީ، ތިމަންނަމެން ޕާޓީ މީހުން ބުނާ އެއްޗެއް އެކަންޏޭ އަޑު އަހާނީ. މިހެން ކިޔައިގެން އަޅުގަނޑުމެން ގައުމު ތަރައްގީއެއް ނުކުރެވޭނެ. އެހެން ޕާޓީތަކުން އެކުރާކަމެއް ވަރަށް ސާފުކޮށް ދަންނަވަފާނަން. އެކަކު ރައްޔިތުންގެ މެދުގައި ފިތުނު އުފައްދައިގެން އެކަކު އަނެކަކުގެ ޖައްސައިގެން ކުރިއަށް ހޯދަނީ. އެކަން ކުރާކަށް ނެތިން އަޅުގަނޑުމެން އެމްއާރްއެމް އިން." ފާރިސް ވިދާޅުވި އެވެ.

ފާރިސް އިތުރަށް ވިދާޅުވީ، ވަޒީފާ ލިބޭނީ އަދި މޮޅުގޮތްތަށް ހޯދައިދީ ފަހި ފުރުސަތު ހޯދައިދޭނީ ޕާޓީއަށް ސޮއިކުރީމައޭ ބުނާނެ ޕާޓީއަކަށް އެމްއާރްއެމް ނުވާނެ ކަމަށެވެ. އަދި އެމްއާރްއެމް ބޭނުންވަނީ ހުރިހާ ރައްޔިތުންނަށް ހަމަަހަމަ ފުރުސަތު ހޯދައިދީ ހައްގުތައް ރައްކާތެރިކުރުން ކަމަށާއި އެވަރުގެ ޕާޓީއެއް އަދި އަދަށްވެސް ނުފެންނަ ކަމަށެވެ. 

"އެވަރުގެ ޕާޓީއަކަށް ވާން އަޅުގަނޑުމެން ބޭނުންވަނީ. އަޅުގަނޑުމެން ކެރިގެން 3000 މެމްބަރުންނާއިއެކު މިތިބީ. މި ޕާޓީއަށް ވަދެއްޖެއްޔާ މޮޅު ގޮތްތަކެއް ވާނެއޭ ކިޔާގެން މެންބަރުން އިތުރުކުރާކަށް ބޭނުމެއް ނޫން." ފާރިސް ވިދާޅުވި އެވެ.

ފާރިސްގެ މިފަދަ ވީޑިއޯއެއް އާއްމުވެފައި މިވަނީ އަނެއްކާވެސް 3000 މެމްބަރުންގެ އަދަދު ހަމަނުވާ ޕާޓީ ތަކުގެ ތެރޭގައި އެމްއާރްއެމް ހިމެނިފައިވާ ދަނޑިވަޅެއްގައި ކަން ފާހަގަކޮށްލަންޖެހެއެވެ.