ދިވެހިރާއްޖޭގައި އެތައް ބޭންކެއް ހުންނައިރު ހަމައެކަނި، ބޭންކް އޮފް މޯލްޑިވްސް (ބީއެމްއެލް) އިން، ފައިސާ ގެއްލި، ސްކޭމް މައްސަލަތައް ފެންމަތިވަނީ ކީއްވެތޯ ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުالله (މޮސްޓާ) ސުވާލު ކުރައްވައިފިއެވެ. 

ބޭންކް އޮފް މޯލްޑިވްސް ގެ ކަސްޓަމަރުންގެ އެކައުންޓްތަކުން، ވާނުވާ ނޭނގުމު ފައިސާ ގެއްލޭ މައްސަލަ ފެންމަތިވަމުން ދާތީ މޮސްޓާ ވަނީ ކުއްލި މައްސަލައެއް މަޖިލީހަށް ހުށަހަޅާފައެވެ.

އެ މައްސަލަ އަށް ބަހުސް ކުރައްވަމުން މޮސްޓާ ވިދާޅުވީ، ރާއްޖޭގައި ގާތްގަނޑަކަށް 8 ބޭންކު ހުންނައިރު ހަމައެކަނި ބީއެމްއެލް އިން އެފަދަ މައްސަލަތައް ކުރިމަތިވަނީ ކީއްވެގެންތޯ ބަލަންޖެހޭ ކަމަށެވެ. 

މޮސްޓާ ވިދާޅުވީ، ދިވެހިންގެ ބޭންކުން ނަމުގައި އެތައް ބިލިއަނުން ފައިދާ ނަގައިގެން ދެރަ ނިކަމެތިންގެ ހައްގުތައް "ފެލާލަން" ބީއެމްއެލް އިން މަސައްކަތް ކުރަމުންދާތަން އެތައް ފަހަރަކު ފެންނަމުންދާ ކަމަށެވެ.

އެހެންކަމުން، ބީއެމްއެލްގެ އިސް ބޭފުޅުން މަޖިލީހަށް ގެނެސްގެން ނަމަވެސް، މަޖިލީހުގެ އިގްތިސާދީ ކޮމީޓިން އެ މައްސަލަ ހައްލު ކުރަންޖެހޭ ކަމަށް މޮސްޓާ ވިދާޅުވިއެވެ. އެހެން އެކަން ނުކޮށްފިނަމަ، ރާއްޖޭގެ ނިކަމެތި އެތައް ރައްޔިތުންގެ އަތުން ލައްކައެއްހާ ރުފިޔާ ކޮންމެ ދުވަހަކު ގެއްލިގެންދާނެ ކަމަށް މޮސްޓާ ވިދާޅުވިއެވެ. 

މޮސްޓާ އިތުރަށް ވިދާޅުވީ، ބީއެމްއެލްގެ އެތެރެއިން އެފަދަ މައްސަލަތައް ނުހިނގާ ކަމަށް އެއްދުވަހު ބުނާއިރު، އޭގެ އަނެއް ދުވަހު، އެފަދަ މައްސަލަތައް ތަހުގީގު ކުރަމުންދާކަމަށާ، އެކަމާއި ގުޅިގެން ދެ މުވައްޒަފުން ސަސްޕެންޑް ކޮށްފައިވާ ކަމަށް ބުނެ ބަޔާން ނެރޭ ކަމަށެވެ.

"ކަމެެއް ނުހިނގާ ކަމަށް ވާނަމަ މިކަމާއި ގުޅިގެން މީހަކު ސަސްޕެންޑް ކުރަންޖެހޭތޯ.؟" މޮސްޓާ ސުވާލު ކުރެއްވި އެވެ. 

މޮސްޓާ ވިދާޅުވީ، ސްކޭމް ތަކާއި ގުޅޭ ގޮތުން ހިނގަމުންދާ ކަންކަމާއި ގުޅޭ، ހަގީގަތްތައް ބީއެމްއެލް އިން ހާމަކުރަންޖެހޭ ކަމަށެވެ. އަދި ބީއެމްއެލް އަކީ ރައްޔިތުންގެ ބޭންކު ކަމުގައި ބުނާއިރު، އަބަދުވެސް ކަން ހިނގަނީ ނިކަމެތި ރައްޔިތު މީހާއަށް ގެއްލުންވާ ގޮތަށް ކަމަށްވެސް އޭނާ ވިދާޅުވި އެވެ.