ޗައިނާ-ރާއްޖެ މިނިވަން ވިޔަފާރީގެ އެއްބަސްވުން ތަސްދީގުކޮށްފިނަމަ ވާދަވެރި އަގެއްގައި ޗައިނާއަށް މަސް ބޭރުކުރެވޭނެކަމަށް އެ ޤައުމުން ރާއްޖެއަށް ކަނޑައަޅާފައި ހުންނަވާ ސަފީރު ވަންގް ލިޝިން ވިދާޅުވެއްޖެއެވެ.
ޗައިނާ ސަފީރު މިއަދު ކުރެއްވި ޓުވީޓުގައި ވިދާޅުވީ ރާއްޖޭގެ މަސް ކާރުޚާނާއަކަށް ވަޑައިގެން މަސް ބަންދުކުރާ ގޮތް ބައްލަވައިލެއްވި ކަމަށެވެ. އަދި ރޯ މަސް ބަންދުކުރުމުގައި މަހުގެ ކޮލިޓީ ދެމެހެއްޓުމަށް އެ ކާރުޚާނާގައި ހިފަހައްޓާ ހަރުކަށި މިންގަނޑުތަށް ވަރަށް ކަމުދާ ފާހަގަކުރައްވައި ސަފީރު ވިދާޅުވީ، އެފަދަ މަހަކީ ޗައިނާގެ މާކެޓުގަައި ވަރަށް މަގުބޫލު މަހެއް ކަމަށެވެ.
އެއާއެކު ސަފީރު ވިދާޅުވީ ދިވެހި ސަރުކާރުން މިނިވަން ވިޔަފާރީގެ އެއްބަސްވުން ތަސްދީގުކޮށް އަމަލުކުރަން ފަށައިފިނަމަ، ވާދަވެރި އަގެއްގައި ޗައިނާއަށް މަސް ބޭރުކުރެވޭނެކަމަށެވެ.
ޗައިނާއާ ރާއްޖޭގެ މެދުގައި މިނިވަން ވިޔަފާރީގެ އެއްބަސްވުމެއްގައި ސޮއިކުރީ ރައީސް ޢަބްދުالله ޔާމީން ޢަބްދުލްޤައްޔޫމުގެ ވެރިކަމުގައެވެ. އެއްބަސްވުން އެކުލަވައިލި މައިގަނޑު ސަބަބަކީ ރާއްޖެއިން ޔޫރަޕަށް ބޭރުކުރާ މަހުން ނަގާ ޑިއުޓީ ބޮޑުކުރުމުގެ ސަބަބުންނެވެ.
އެހެންނަމަވެސް އެ އެއްބަސްވުމުގައި ސޮއިކޮށް އަމަލުކުރަން ފެށުމުގެ ކުރިން ސަރުކާރު ބަދަލުވުމާއެކު ރައީސް އިބްރާހީމް މުޙައްމަދު ޞާލިޙުގެ ސަރުކާރުން ވަނީ އެއަށް އަމަލުކުރުން ހުއްޓާލާފައެވެ.
Advertisement
This content is created and paid for by advertisers and does not involve Voice Journalists
