އެމަނިކުފާނަކީ އިސްލާމީ ޢިލްމުގެ ޝެއިޚެއް ނޫން ނަމަވެސް އިސްލާމީ ތާރީޚާއި ސަގާފަތް އެނގިވަޑައިގަންނަވާ ކަމަށް ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ވަނީ މާފަންނު ހުޅަނގު ދާއިރާގެ މެންބަރު އިބްރާހީމް ރަޝީދު (ބޮންޑޭ)، ޒަކާތު ފަންޑުން ޚަރަދު ކުރަނީ ކޮންކޮން ބަޔަކަށްތޯ އަހައި ލިޔުމުން ޖަވާބު ހޯއްދެވުމަށް އިސްލާމިކު މިނިސްޓަރު ޑރ އަހުމަދު ޒާހިރު ޢަލީ އާއި ކުރެއްވި ސުވާލުގެ ޖަވާބު އިއްވާފައެވެ.
އެ ސުވާލުގެ ޖަވާބުގައި ޑރ. ޒާހިރުވަނީ އެ ފަންޑުން ޚަރަދު ކުރަނީ އިސްލާމީ ޝަރީއަތުގައި ޒަކާތުގެ ބެހެނިވެރިންގެ ގޮތުގައި ބަޔާން ކޮށްފައިވާ ފަރާތްތަކަށް ކަމަށް ވިދާޅުވެފައެވެ.
ޒާހިރުގެ ޖަވާބު އިއްވައި ނިމުމުން ބޮންޑޭ ވަނީ ނިޒާމީ ނުކުތާ ނަންގަވައި، ގުރުޢާނުގައި ޒަކާތުގެ ބެހެނިވެރިންގެ ގޮތުގައި އަންގަވާފައިވާ ފަރާތްތައް އޭނާ އަށްވެސް އެނގިލައްވާ ކަމަށް ވިދާޅުވެފައެވެ. އެހެންނަމަވެސް، އިސްލާމިކު މިނިސްޓްރީން އެ ޒަކާތު ފަންޑުން ބަހަނީ އެގޮތަށް ނޫން ކަމަށް ވިދާޅުވެ ބޮންޑޭ ވަނީ ހައްޖުގެ އަޅުކަމަށް ގެންދާ މީހުންގެ އަތުން ފައިސާ ނަގާވަރަށްވުރެ ގިނަ ފައިސާ އެމީހުންނަށް ޚަރަދުކުރާ ކަމަށް ތުހުމަތު ކުރައްވާފައެވެ.
ބޮންޑޭގެ ވާހަކަ އާއި ގުޅިގެން ރިޔާސަތުގައި އިންނަވައި ނަޝީދު ވަނީ ޒަކާތުގެ ފައިސާ ބަހަންޖެހެނީ 8 ބަޔަކަށް ކަން ފާހަގަ ކުރައްވައި އެ ފަރާތްތަކަކީ ކޮބައިކަން ހާމަކޮށްދެއްވާފައެވެ. އަދި އޭގެ ތެރޭގައި ދަތުރުވެރިން ހިމެނޭކަންވެސް އެމަނިކުފާނު ފާހަގަ ކުރެއްވި އެވެ.
"ޒަކާތް މި ބަހަންޖެހެނީ 8 ބަޔަކަށް. އެ ބައިގެ ތެރެއިން 5 ބަޔަކީ މީހުން. އިންޑިވިޖުއަލް އިން. ދެން ހުރީ ޖަމާތް ޖަމާއަތަށް. އޭގެ ތެރޭގައި އިނަ ހިމެނޭ އިބްނު ސަބީލުން. ދަތުރު ފަތުރު ކުރުމާއި، އެއްތަނުން އަނެއް ތަނަށް ގޮސް އުޅުމާ, އެކަންކަމަށް އެހީވުމަށް." ރައީސް ނަޝީދު ވިދާޅުވި އެވެ.
މިއާއެކު ރައީސް ނަޝީދު ވިދާޅުވީ އެމަނިކުފާނަކީ ދީނީ ޢިލްމުވެރިއެއް ނޫން ނަމަވެސް ދީނީ ތަރީޚް ދިރާސާ ކުރައްވާ ކަމަށާ، ތަރީޚް ގެ ތެރެއިންވެސް ހައްޖުގެ އަޅުކަމަށްދާ މީހުންނަށް އެހީވުމުގެ ސަގާފަތް އޮންނަކަން އެނގޭ ކަމަށެވެ.
"ދެން އަޅުގަނޑު، އިސްލާމީ ޢިލްމުގެ ޝެއިޚެއް ނޫން. އެހެންނަމަވެސް، ސަގާފަތާއި ދީނީ ތަރީޚާއި އެކަންކަން އަޅުގަނޑުމެން އެންމެނަށްވެސް ސާފުވޭ. ހައްޖު ދަތުރުގައި އެހީތެރިވެ ދިނުމަކީ އިސްލާމީ ސަގާފަތުގެ ތެރޭގައި އޮންނަ ކަމެއް. އަދި ދަތުރު ވެރިންނަށް ޚާއްސަކޮށް އެހީތެރިވެ ދިނުމަކީ އިސްލާމީ ސަގާފަތުގައި އޮންނަ ކަމެއް. ދެން އެ ސަގާފަތް ދިރުވުމުގައި އޭގެ ތެރެއަށް އިތުރު އިޖުރާއަތުތައް ބައެއްފަހަރު ވަދެގެންދޭ. ތިޔަ ވިދާޅުވާހެން ވިޔަފާރީގެ މުޢާމަލާތްތައް މީގެ ތެރޭގައި އަބަދުވެސް ކުރެވިގެންދޭ. ކަރަވަން ތަކުގެ ތެރޭގައި ވިޔަފާރި ކުރެވެމުންދޭ. އެހެންވީމާ ވިޔަފާރި އަބަދުވެސް އޭގެ ތެރެއަށް ވަދެގެންދޭ." ރައީސް ނަޝީދު ވިދާޅުވި އެވެ
Advertisement
This content is created and paid for by advertisers and does not involve Voice Journalists
