ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ މި ސަރުކާރަކީ ރައްޔިތުންގެ ލޮލުގައި އަނދުން އަޅުވާ ސަރުކާރެއް ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަަޙްމަދު ޝިޔާމް ވިދާޅުވެއްޖެއެވެ.

އައްޑޫ އިންޓަނޭޝަނަލް ޕޯޓު ތަރައްޤީކުރުމުގެ މަސައްކަތް ހަލުއިކުރުމަށް ގޮވައިލާ ޤަރާރަކަށް ބަހުސްކުރައްވަމުން ޝިޔާމް ވިދާޅުވީ ދެކުނާއި އުތުރުގެ ވިޔަފާރި ކުރިއެރުވުމަށް އައްޑޫއާއި ކުޅުދުއްފުށީ ވިޔަފާރި ބަނދަރުތައް ތަރައްޤީކުރުމަކީ ކޮންމެހެން ކުރަންޖެހޭ ކަމެއް ކަމަށާ، އެއީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވައުދެއްވެސް ކަމަށެވެ. 

ކަން މިހެން ހުރި ނަމަވެސް އައްޑޫ ސީ ޕޯޓާއި، އެއާޕޯޓުގެ ތަރައްޤީއަށްވެސް އެއްވެސް މަސައްކަތެއް މި ސަރުކާރުން ނުކުރާ ކަމަށާ އަދި ކުޅުދުއްފުށީ ސީ ޕޯޓު އަދި ކުޅުދުއްފުށީގައި އެޅިފައި އޮތް އެއާޕޯޓު އަޕްގްރޭޑުކުރަން ނުވަތަ ތަރައްޤީ ކުރަން ވެސް މި ސަރުކާރުން އެއްވެސް ކަމެއް ނުކުރާ ކަމަށް ޝިޔާމް ވިދާޅުވި އެވެ. 

Advertisement

މިއާއެކު ޝިޔާމް ވަނީ ކުޅުދުއްފުށީގެ ޕޯޓަކީ ނަމުގައި އިންޓަނޭޝަނަލް ޕޯޓެއް ނަމަވެސް އެ ޕޯޓުގައި ބާޖު ހޭންޑުލްކުރަން ބޭނުންވާ ވަސީލަތްތަކާއި މުހިއްމު ކުރެއިނެއް ނެތްކަމަން ފާހަގަކުރައްވާފައެވެ.

އަދި ރާއްޖޭގެ ބޮޑުތިލަދުންމަތީގެ ރައްޔިތުންނަށް އަގުހެޔޮކޮށް މުދާ ލިބޭނެ ގޮތް ހެދުމުގެ ވާހަކަ މީގެ ކުރިން މަޖިލީހުގައި ދެއްކެވި ބޮޑުތިލަދުންމަތީގެ މެންބަރުން މިހާރު އެ ވާހަކަ ދައްކަވަން ލަދު ގަންނަވާ ކަމަށާ، އެ މެންބަރުންނަށްވެސް ސަރުކާރުން އޭރު އެޅުވީ އަނދުނެއް ކަމަށް މިހާރު އެނގިފައިވާ ކަމަށް ޝިޔާމް ވިދާޅުވި އެވެ.

"ބޮޑުތިލަދުންމައްޗަށް ނިސްބަތްވެވަޑައިގަންނަވާ ބައެއް މެންބަރުން ވެސް މިއަދު އެވާހަކަތައް ދައްކަވަން ތަންކޮޅެއް ލަދުވެތިކޮށް އެ ތިއްބެވީ. އެއީ އެކަންތައްތައް ނުވާތީވެ. އެ އަނދުން އެޅުނީ އޭރުގައި، އެޅުނީމާ އެ ބޭފުޅުންނަށް އެވާހަކަތައް ދެކެވުނީ. އެހެންނަމަވެސް މިއަދު އެ ވާހަކަތައް ދައްކަވާކަށް ބޭނުންފުޅެއް ނުވޭ. މިއަދު ތެދުވެ ވަޑައިގެން ދެއްކެވިއްޔާ ދައްކަވާނީ އޭރުގައި އެޅުވީ އެ އަނދުން ކަމަށް." 

"މި ސަރުކާރަކީ އަނދުން އަޅުވާ ސަރުކާރެއް. ކޮބައިތޯ އެ ކޮޗިން ފެރީ. ޗޮކުންނެއް ނޫންތޯ އެ ދިޔައީ އިއްޒަތްތެރި ރައީސް. އޮރެންޖު، އެއް ރުފިޔާ ބަޔަށް އޮރެންޖު ލިބޭނެ ކަމަށް މަކުނުދޫ ދާއިރާގެ އިއްޒަތްތެރި މެންބަރު ފަދަ ބޭބޭފުޅުން މިތަނުގައި ވިދާޅުވި. ރޯނު ވަށައިގެން ރޯނު ބޭރު ކުރާނެ ވާހަކައާއި، ބޮލި ހިލައިގެން ބޮލި އެ ފެރީގައި ބޭރު ކުރާނެ ވާހަކަ، ރައްޔިތުންގެ ޖީބު ތަނަވަސް ވާނެ ވާހަކަ، އޭރުގައި ދެކެވުނު. މާފް ކުރައްވާތި. މިއަދު އެބޭފުޅުން އެކަމު އެ ތިއްބެވީ އެވާހަކަތައް ތަކުރާރު ކުރައްވާކަށް ނޫން." ޝިޔާމް ވިދާޅުވި އެވެ.  

މިއާއެކު ޝިޔާމް ވަނީ އައްޑޫ ޕޯޓާއި އައްޑޫ އެއާޕޯޓްގެ ތަރައްގީއަށް ކުރަން ހުރި ހުރިހާ ކަމެއް އަވަސް ކޮށްދިނުމަށް ސަރުކާރަށް ގޮވާލާފައެވެ. 

ކޮޗިން ފެރީގެ ޚިދުމަތް ފެށުމާއެކު ރާއްޖެ އާއި ކޮޗިންއާ ދެމެދު މަހަކު 2-3 ދަތުރު ކުރާނެ ކަމަށް އެ ޚިދުމަތް ފަށަމުން ސަރުކާރުން ބުންޏެވެ. އަދި އެއާއެކު ރާއްޖޭގެ ވިޔަފާރިތައް އިތުރަށް ފުޅާވެ، އަތޮޅު ތެރޭގައިވެސް ވިޔަފާރީގެ އިތުރު ފުރުސަތުތައް ފަހިވެގެންދާނެ ކަންވެސް ފާހަގަކުރިއެވެ. އެހެންނަމަވެސް، އެކަން އެގޮތަށް ނުވެ އެ ފެރީގެ ކަންކަންވެސް "ޗޮކުން" ގޮސްފައިވާ ކަމަށް ބުނެ އިދިކޮޅުން މީގެ ކުރިންވެސް ވަނީ ގިނަ ފާޑުކިޔުންތަކެއް ސަރުކާރަށް އަމާޒު ކޮށްފައެވެ.