ރިޔާސީ އިންތިޚާބު ބޯމަތިވިއިރު ގައުމުގައި އޮތް އެންމެ ބޮޑު ހުސްކަމަކީ ވާދަވެރި ސިޔާސީ ޕާޓީއެއް ނުވަތަ އިދިކޮޅު ޕާޓީއެއް ނެތުންކަމަށް މަޖިލީހުގެ އިހަވަންދޫ ދާއިރާގެ މެމްބަރު މުޙައްމަދު ޝިފާއު ވިދާޅުވެއްޖެ އެވެ. 

ޝިފާއު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ. 

އެގޮތުން ޝިފާއު ވިދާޅުވީ ރިޔާސީ އިންތިޚާބު ބޯމަތިވެފައިވާއިރު އޮތް އެންމެ ބޮޑު މައްސަލައަކީ ސަރުކާރާއި ވާދަކުރާނެ އިދިކޮޅެއް ނެތުން ކަމަށެވެ. އަދި ވާދަކުރުމަށް ސަރުކާރު ޖަވާބުދާރީ ކުރުވުމޭ ކީ ނަމަވެސް އެކަން ކުރާނެ ޒިންމާދާރު އޮޕޮސިޝަނެއް (ވާދަވެރި ސިޔާސީ ޕާޓީއެއް) މިއަދު ނެތްކަމަށް އޭނާ ވިދާޅުވި އެވެ. 

ކުރިއަށް އޮތް ރިޔާސީ އިންތިޚާބު ކާމިޔާބުކުރާ ވާހަކަ ޕީޕީއެމުން ދައްކަމުންދާއިރު، ރިޔާސީ ކެންޑިޑޭޓެއް ކަނޑައެޅިފައި ނުވާކަމަށް އޭނާ ވިދާޅުވި އެވެ. 

ޝިފާއު މިފަދައިން ވިދާޅުވެފައިވާއިރު ޕީޕީއެމްގެ ރިޔާސީ ކެންޑިޑޭޓަކީ އެ ޕާޓީގެ ލީޑަރު ރައީސް އަބްދުالله ޔާމީން އަބްދުލްގައްޔޫމުކަމަށް އެ ޕާޓީން ވަނީ އިއުލާނުކޮށްފަ އެވެ. 

ރައީސް ޔާމީން މިވަގުތު ވ އާރަށުގެ މައްސަލައާއި ގުޅިގެން އެމަނިކުފާނުގެ މައްޗަށް އިއްވާފައިވާ ޖަލުހުކުމް ތަންފީޒު ކުރައްވަމުން ގެންދެވި ނަމަވެސް، އެ މައްސަލަ ހައިކޯޓުގައި އިސްތިއުނާފުކޮށްފައިވާއިރު، ހައިކޯޓުން މިނިވަންވެވަޑައިގަންނަވާނެ ކަމުގެ ޔަގީންކަން އޮތްކަމަށް އިދިކޮޅުން ވަނީ ބުނެފައެވެ. އަދި އެމަނިކުފާނުގެ ގާނޫނީ ވަކީލުންގެ ޓީމުންވެސް އެ ޔަގީންކަން ދެއްވައެވެ. 

އެކަން އެހެން އޮތް ނަމަވެސް މެމްބަރު ޝިފާއު ވިދާޅުވީ އިދިކޮޅަށް އަދި ރިޔާސީ ކެންޑިޑޭޓެއް ނުދެއްކޭ ކަމަށެވެ. އަދި ވިދާޅުވީ ރއީސް ޞާލިހުގެ ފަސް އަހަރު ރައްޔިތުން ދެކެނީ ރާއްޖެއަށް އައި އެންމެ އަމާން، އެންމެ ހިތްހަމަޖެހޭ ފަސް އަހަރުގެ ގޮތުގައި ކަމަށް ވުމުން، ރައްޔިތުން ރައީސް ޞާލިހަށް ދެވަނަ ދައުރެއް ދޭން ބޭނުންވާ ކަމަށެވެ.