އެއް އަހަރުގެ އަންހެން ކުއްޖެއްގެ ސިކުނޑީގެ ތެރެއިން އެ ކުއްޖާއާއި އެއް މާބަނޑު ޓްވިންސް ނަގައިފިއެވެ. 

ސިކުނޑީގެ ތެރެއިން ޓްވިން ފެނުނު މި އެއް އަހަރުގެ އަންހެން ކުއްޖާ އަކީ، އުފެދުމުގައި ވެސް ހެލިފެލިވެ އުޅުން ދަތި، ނުކުޅެދުން ތެރިކަން ހުރި، ބޯ، އާދަޔާ ޚިލާފަށް ބޮޑު ކުއްޖެކެވެ. 

އެ ކުއްޖާގެ ސިކުނޑީގެ ތެރޭގައި އުފެދުނު "ޓްވިން"އާއި އޭނާ އަކީ އެ ކުދިންގެ މަންމަގެ ބަނޑުގައި އޮތް އިރު އެއް ޕްލެސެންޓާއެއް ނުވަތަ މަސްގަނޑެއް ހިއްސާ ކުރި ދެކުދިން ކަމަށް ޑޮކްޓަރުން ބުނެފައިވެއެވެ. އެހެންނަމަވެސް، ދެކުދިންވެސް ބޮޑު ވެފައިވަނީ ވަކި "އިނާ ސެކް" ނުވަތަ ކުދިން އަށަގަންނަ ދުލީގެ ތެރޭގައި ކަމަށް ޑޮކްޓަރުން ފާހަގަކޮށްފައިވެއެވެ.  

ބޮޑު އޮޕަރޭޝަނަކަށްފަހު އެއް އަހަރުގެ އަންހެން ކުއްޖާގެ ސިކުނޑީގެ ތެރެއިން އޭނާގެ ޓްވިން ނަގާފައިވާއިރު، އޭގެ މޫނު އޮތީ އިންސާނެއްގެ މޫނު އުފެދެން ފަށާއިރު އޮންނަ ގޮތަށެވެ. އަދި ދެއަތްވެސް އޮތެވެ. ސިކުނޑިން ނެގި އެ މަސްގަނޑުގެ ދިގުމިނުގައި ގާތްގަނޑަކަށް 10 ސެންޓިމީޓަރު ހުއްޓެވެ.   

މިފަދައިން އެއް ކުއްޖެއްގެ ހަށިގަނޑުގެ ތެރޭގައި އަނެއް ކުއްޖާ އުފެދުމަށް ސައިންސް ވެރިން ކިޔައި އުޅެނީ "ފީޓަސް-އިން-ފީޓު" އެވެ. މިއީ ވަރަށް ވަރަށް މަދުން ނޫނީ ނުވާ ކަމެކެވެ. 

މިފަދައިން އާއްމުކޮށް ދިމާވަނީ، ރަހިމުގެ ތެރޭގައި ކުއްޖާ ހެދިބޮޑުވުމުގެ މަރުހަލާ ތަކުގެ ތެރެއިން އުފެދޭ "ބްލާސްޓޯސިސްޓް" ވަކި ނުވެ އެ ޓުވިންސްގެ ބްލާސްޓޯސިސްޓް ގެ ތެރޭގައި އަނެއް ޓްވިންސްގެ ބްލާސްޓޯސިސްޓް އުފެދެން ފެށުމުންނެވެ. ބްލާސްޓޯސިސްޓް އަކީ ރަހިމުގެ ތެރޭގައި ކުއްޖާ އުފެދެމުން އަންނައިރު އުފެދޭ ސެލް ބޯޅައެކެވެ. އެ ބޯޅައިގެ ތެރޭގައި، ސެލްތައް ވަރަށް ބާރަށް އުފެދެއެވެ. އިންސާނާ އުފެދެނީވެސް އޭގެ ތެރޭގައި އުފެދެމުންދާ ސެލްތައް ތަރައްގީވަމުން އައިސްއެވެ. 

ޓްވިންސް ގެ ބްލާސްޓޯސިސްޓް ވަކި ނުވެ އެކަތީގެ ތެރޭގައި އަނެއް ބްލާސްޓޯސިސްޓް ހެދިބޮޑުވުމުގެ ސަބަބުން އެތެރޭގައި އޮންނަ ބްލާސްޓޯސިސްޓް އޭތި ހެދިބޮޑުވުމަށް ބޭނުންވާ މާއްދާތައް ހޯދަނީ އޭގެ ހޮސްޓް ނުވަތަ އަނެއް ބްލާސްޓޯސިސްޓް ގެ ޒަރީޢާއިންނެވެ. އެގޮތުގެ މަތިން ދެ ޓްވިންސް ހެދިބޮޑުވާއިރު، ބައެއްފަހަރު އެތެރޭގައި އޮންނަ "ކުއްޖާ" އުފެދެނީ އަނެއް ކުއްޖާގެ ސިކުނޑީގައި ނުވަތަ ހިތުގައި ނުވަތަ ބަނޑުގައި ނޫނީ އެހެން ގުނަވަނެއްގައެވެ. 

އަދި އެގޮތުން އުފެދޭ ކުދިން ދިރިހުރުމުގެ ޗާންސެއް ނޯވެއެވެ.