އުރީދޫ މޯލްޑިވްސްއިން 2022 ވަނަ އަހަރުގެ ހިއްސާގެ ފައިދާގެ ގޮތުގައި ހިއްސާއަކަށް 3.04ރ. ބަހަން ފާސްކޮށްފިއެވެ.

އުރީދޫގެ ބޯޑުން ހިއްސާއަކަށް 3.04ރ ބަހަން ކަނޑައަޅައި އަހަރީ އާއްމު ޖަލްސާއަށް ހުށަހަޅަން ނިންމާފައިވަނީ މިދިޔަ މަހުގެ 3 ވަނަ ދުވަހު ބޭއްވި ބޯޑުގެ ބައްދަލުވުމުގައެވެ.

މި އަދަދު ފާސްކޮށްފައިވަނީ ރޭ ކްރޮސްރޯޑްސް މޯލްޑިވްސްގައި ބޭއްވި އެކުންފުނީގެ އަހަރީ އާންމު ޖަލްސާގައެވެ. މި ޖަލްސާގައި އެ ކުންފުނީގެ 125 ހިއްސާދާރުން ބައިވެރިވެފައިވެއެވެ.

ކޮންމެ ހިއްސާއަކަށް 3.04 ރުފިޔާ ބަހަން ނިންމާފައިވަނީ އެ ޖަލްސާގައި ބައިވެރިވެފައިވާ ހިއްސާދާރުންގެ 87 އިންސައްތަ ވޯޓުންނެވެ.

އުރީދޫގެ އަހަރީ އާންމު ޖަލްސާގައި އެ ކުންފުނީގެ އޮޑިޓް ރިޕޯޓުވެސް ފާސްކޮށްފައިވެއެވެ. އޮޑިޓް ރިޕޯޓުން ދައްކާގޮތުގައި މިދިޔަ އަހަރު އާމްދަނީގެ ގޮތުގައި 1.9 ބިލިއަން ރުފިޔާ އުރީދޫއަށް ލިބިފައި ވެއެވެ.

އުރީދޫއިން 2021 ވަނަ އަހަރުގެ ހިއްސާގެ ފައިދާގެ ގޮތުގައި ބަހާފައިވަނީ 2.70ރ. އެވެ.