ކުށްކުރުން ހުއްޓުވުމަށް ފުލުހުން ބޭނުންކުރަން ފަށާފައިވާ ޓޭޒަރ ގަން ބޭނުންކުރުން ހުއްޓާލުމަށް ގިނަ އަމިއްލަ ޖަމްއިއްޔާތަކަކުން ގޮވާލައިފިއެވެ.

ފުުލުހުން ޓޭޒަރ ގަން ބޭނުން ކުރަން ފަށާފައިވަނީ މިދިޔަ މަހުގެ 26 ވަނަ ދުވަހު އެވެ. 

އެހެން ނަމަވެސް، ޓޭޒަރ ބޭނުންކުރަން ނިންމި ނިންމުމުގައި ދެފުށްފެންނަ ގޮތެއް ނެތް ކަމަށް ބުނެ، އެ ނިންމުން ބަދަލު ކުރުމަށް ހޯމް މިނިސްޓަރު އިމްރާން އަބްދުالله އަދި ކޮމިޝަނާ އޮފް ޕޮލިސް މުހައްމަދު ހަމީދަށް ގޮވާލައި އެސޯސިއޭޝަން ފޯ ޑިމޮކްރަސީ އިން ދަ މޯލްޑިވްސް (އޭޑީއެމް)، ހޭންޑްސް ޓުގެދާ، މެންޓަލް ހެލްތު ސަޕޯޓް ގްރޫޕް (އެމްއެޗްއެސްޖީ)، ރައިސް އަޕް މޯލްޑިވްސް، އަދި ސޭވް މޯލްޑިވްސްއިން ވަނީ ބަޔާނެއް ނެރެފަ އެވެ. 

Advertisement

އެ ބަޔާނުގައި ބުނީ ޓޭޒަރ ބޭނުންކުރުމުން 'ޝޮކް' ލިބޭ ފަރާތަށް ނުރައްކާތެރި ގެއްލުން ލިބި ބައެއް ފަހަރު މަރާ ހަމައަށް ދާކަން 2016 ވަނަ އަހަރު އިނގިރޭސިވިލާތުގެ ސައިންޓިފިކް އެޑްވައިޒަރީ ކޮމިޓީ އޮން މެޑިކަލް އިމްޕްލިކޭޝަންސް އޮފް ލެސް ލީތަލް ވެޕަންސް އިން ބުނެފައިވާ ކަމަށެވެ. އަދި އެފަދައިން ޝޮކް ލިބޭ ފަރާތްތަކުގެ ހިތް ހުއްޓޭ ހާލަތްތައް ވެސް ކުރިމަތިވެފައިވާކަމަށް ބަޔާނުގައި ބުނެފައިވެއެވެ.

މީގެއިތުރުން ފުލުހުންގެ ނާގާބިލުކަމާއި، ހާލަތާ ނުބައްދަލު ބާރުގެ ބޭނުންކުރުމުގެ ސަބަބުން މީގެ ކުރިން ވެސް ރާއްޖޭގައި އެތައް ބަޔަކަށް ޖިސްމާނީ އަދި ނަފުސާނީ ގެއްލުން ލިބިފައިވާކަން  ބަޔާނުގައި ވަނީ ފާހަގަކޮށްފައެވެ.

އަދި ޓޭޒަރ ގަން ސަބަބުން މީހުންނަށް ދިގުމުއްދަތަކަށް ދެމިގެންދާފަދަ ބޮޑެތި ގެއްލުންތައް މީހުންނަށް ލިބިގެންދާނެ ކަމަށާ، ޚާއްސަކޮށް ނަފްސާނީ، އަދި ޖިސްމާނީ ގޮތުން ނުކުޅެދުން ތެރިކަން ހުންނަ މީހުންނަށް މީގެ ސަބަބުން ބޮޑެތި ގެއްލުންތައް ލިބިގެންދާނެ ކަމަށް ބުނެފައިވެއެވެ. 

މިއާއެކު އެ ބަޔާނުގައި މައިގަނޑު 4 ކަމަކަށް ގޮވާލާފައެވެ. އެއީ؛

1) ވަގުތުން ވަގުތައް ފުލުހުން ޓޭޒަރ ބޭނުންކުރުން ހުއްޓާލުން

2) ފުލުހުން ޓޭޒަރ ބޭނުންކުރަން ނިންމުމުގައި ބެލި ކަންކަން ހާމަކުރުން

3) ޓޭޒަރގެ ނާޖާއިޒު ބޭނުން ނުހިފޭނެކަން ކަށަވަރު ކުރުމަށް އެޅިފައިވާ ފިޔަވަޅުތައް ހާމަކުރުން

4) ފުލުހުން ޒިންމާދާރުކުރުމަށް ދީފައިވާ ޕަބްލިކް ފަންޑުތަކުގެ ރަނގަޅު ބޭނުންކޮށް ފުލުހުން ޕްރޮފެޝަނަލް ކުރުވުން