އިދިކޮޅު ޕީޕީއެމް/ޕީއެންސީ ކޯލިޝަނުން ސިލްސިލާކޮށް ކުރިއަށްގެންދާ މުޒާހަރާތައް ރޫޅާލުމުގައި ފުލުހުން ހާލަތާއި ނުބައްދަލު ބާރުގެ ބޭނުންކުރާ މައްސަލަ ބެލުމަށް ޓްރާންޕޭރެންސީ މޯލްޑިވްސް އިން ގޮވާލައިފި އެވެ. 

ޓްރާސްޕޭރެންސީ މޯލްޑިވްސް އިން މިފަދައިން ގޮވާލާފައިވަނީ އެ ޖަމިއްޔާއިން މިއަދު ކޮށްފައިވާ ޓުވީޓެއްގައެވެ. 

ޓްރާސްޕޭރެންސީ މޯލްޑިވްސް އިން ބުނީ، ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް 11 އަހަރަށް ޖަލަށް ލުމާއި ގުޅިގެން އެމަނިކުފާނު މިނިވަން ކުރުމަށް ގޮވާލައި އިދިކޮޅުން ކޮންމެ ރެއަކު ސިލްސިލާކޮށް ކުރިއަށް ގެންދާ ސުލްހަވެރި އިހްތިޖާޖު ގެ ތެރެއިން އިހްތިޖާޖުގެ ބައިވެރިންނާއި، އިހްތިޖާޖު ކަވަރު ކުރުމުގެ މަސައްކަތް ކުރަމުންދާ ނޫސްވެރިންނަށް އަމާޒުކޮށް ހާލަތާއި ނުބައްދަލު ބާރުގެ ބޭނުން ފުލުހުން ކުރަމުންދާ ކަމަށާ، އެކަން ހަރުކަށި އިބާރާތުން ކުށްވެރި ކުރާ ކަމަށެވެ. 

Advertisement

އިދިކޮޅުން ރޭގައި ކުރިއަށް ގެންދިޔަ ސުލްވެރި އިހްތިޖާޖު ގެ ވީޑިއޯތަކުންވެސް، އެ މުޒާހަރާ ރޫޅާލުމަށް ފުލުހުން ހާލަތާއި ނުބައްދަލު ބާރުގެ ބޭނުން ކޮށްފައިވާ ކަން ހާމަވެގެންދާކަމަށާ، އަދި ސުލްހަވެރިކަމާއިއެކު އިހްތިޖާޖު ކުރުމުގެ ހައްގު ނިގުޅައިގަނެ ރޭވެސް 12 މީހުން ހައްޔަރު ކޮށްފައިވާކަން ޓްރާސްޕޭރެންސީން ވަނީ ފާހަގަކޮށްފަ އެވެ. 

"ޚިޔާލު ފާޅުކުރުމުގެ މިނިވަންކަމާއި، ސުލްހަވެރި އިހްތިޖާޖަކީ އިންސާނީ ހައްގުތައް ކަށަވަރުކުރުމުގައި އެންމެ އިސް ދައުރެއް އަދާކުރާ ދެކަންތައް" ޓްރާންސްޕޭރަންސީން ބުނެފައިވެއެވެ. 

މީގެ އިތުރުން ޓްރާސްޕޭރެންސީން ބުނީ، ސުލްހަވެރިކަމާއި އެކު ކުރަމުންދާ އިހްތިޖާޖު ތައް، ރޫޅާލުމަށް ފުލުހުން ބާރުގެ ބޭނުން ކުރުމަކީ، ދިވެހިރާއްޖޭގެ ގާނޫނު އަސާސީއާއި، ދިވެހިރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާތަކާއިވެސް ޚިލާފް ކަމެއް ކަމަށެވެ. 

އެހެންކަމުން، ފުލުހުންގެ މި ޢަމަލުތައް ތަހުގީގުކޮށް، ޖިނާޢީ އިޖްރާއަތުގެ ގާނޫނުގެ ދަށުން، އެ މުވައްސަސާގެ މައްޗަށް އަޅަންޖެހޭ ފިޔަވަޅު އެޅުމަށް ޓްރާސްޕޭރެންސީން ވަނީ، ދިވެހިރާއްޖޭގެ ހިޔުމަންރައިޓްސް ކޮމިޝަނާއި، ނޭޝަނަލް އިންޓެގްރިޓީ ކޮމިޝަނަށް ގޮވާލާފައެވެ. 

"ދިވެހި ފުލުހުންގެ މުވައްސަސާ އާއި، އެ މުވައްސަސާގެ މުވައްޒަފުންނާއި ގުޅޭ ފުރިހަމަ ތަހުގީގެއް ވީއެންމެ އަވަހަށް ކުރަންޖެހޭ" ޕީޖީ އޮފީހާއި، ހިޔުމަންރައިޓްސް ކޮމިޝަނާއި ނޭޝަނަލް އިންޓެގްރިޓީ ކޮމިޝަން ޓެގްކޮށް ޓްރާސްޕޭރެންސީން ކޮށްފައިވާ ޓުވީޓުގައި ބުނެފައި ވެއެވެ. 

މިއާއެކު ޓްރާންޕޭރެންސީން ވަނީ މުޒާހަރާގެ ތެރެއިން ހައްޔަރު ކޮށްފައިވާ އެންމެހައި ފަރާތްތައް ވަގުތުން ވަގުތަށް ދޫކޮށްލައި، މުޒާހަރާ އާއި ގުޅިގެން ބަންދުކޮށްފައިވާ ނޫސްވެރިން މިނިވަން ކޮށް، އަމާން ކަމާއި އެކު މުޒާހަރާ ކުރުމުގެ ފުރުސަތު ހޯދައިދިނުމަށް ގޮވާލާފައެވެ. 

މީގެ އިތުރުން، ސުލްހަވެރި އިހްތިޖާޖެއް ކުރުމަށް ހުރަސްއެޅޭ ގޮތަށް، ބައިނަލްއަގުވާމީ އިންސާނީ ހައްގުތައް ހިމާޔާތްކުރާ ގާނޫނަށް ފުށުއަރާގޮތަށް ރާއްޖޭގައި ހެދިފައިވާ ގަވާއިދުތަށް އިތުރަށް ދިރާސާ ކުރުމަށް ސަރުކާރާއި ރައްޔިތުންގެ މަޖިލީސް ގުޅިގެން މަސައްކަތް ކުރުމަށް ވެސް ޓްރާސްޕޭރެންސީން ވަނީ ގޮވާލާފައެވެ. އޭގެތެރެއިން، އިހްތިޖާޖު ކުރުމުގެ ކުރިން ހުއްދަ ހޯދަންޖެހޭ ގޮތަށް އޮންނަ އޮތުން އެ ޖަމިއްޔާ އިން ވަނީ ފާހަގަކޮށްފަ އެވެ.