ކުރީ ސަރުކާރުގެ މަޝްރޫއުތައް އަމިއްލަކޮށް، އެ މަޝްރޫއުތަކުގެ ފުލް ކްރެޑިޓް ނެގުމަކީވެސް ކޮރަޕްޝަންކަމަށް މަޖިލީހުގެ ފަރެސްތޮޑާ ދާއިރާގެ މެމްބަރު ހުސެއިން މުހައްމަދު ލަތީފު (ސެންބެ) ވިދާޅުވެއްޖެ އެވެ. 

ސެންބެ މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަހަރުގެ ފުރތަމަ ދައުރުގެ 18 ވަނަ ޖަލްސާއަށް ރިޔާސަތުން ހުށައެޅި ގޯޕެކްގައި މަޖިލީހުން ބައިވެރިވުމާއި ގުޅޭ މައްސަލައަށް ބަހުސް ކުރައްވަމުންނެވެ. 

އެ މަޢުލޫއަށް ވާހަކަދައްކަވަމުން ސެންބެ ވިދާޅުވީ އެންމެ ގަދައަށް ކޮރަޕްޝަން ހިންގަނީ އަދަބުވެސް އެކަމާއި ދެކޮޅަށް އެންމެ އަޑުހަރުކޮށް ވަކާލާތު ކުރާ މީހުންކަން މި ސަރުކާރުގެ މަތީ ފަޑިން ފެށިގެން ތިރިއަށް ބަލާލުމުން ހާމަވެގެންދާ ކަމަށެވެ. 

Advertisement

ސަރުކާރުން ވައްކަން ކުރަމުންދަނީ ހަމައެކަނި ފައިސާއިން ނޫން ކަމަށާއި، އެމީހުންނަށް ނިސްބަތްނުވާ މަޝްރޫއުތަކުން ވެސް ވައްކަން ކުރަމުންދާކަމަށް އޭނާ ވިދާޅުވި އެވެ. 

އެގޮތުން ފަރެސްމާތޮޑާގެ އެއާޕޯޓަކީ ކުރީގެ ރައީސް އަބްދުالله ޔާމީން އަބްދުލްގައްޔޫމު ފައްޓަވާދެއްވި މަޝްރޫއެއްކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު 2018 ވަނަ އަހަރުގެ ރިޔާސީ އިންތިޚާބުގެ ކެމްޕޭނުގައި ވިދާޅުވުމަށްފަހު، އެ މަޝްރޫއު ނިމި އެއާޕޯޓު ހުޅުވަންވީމަ، މަޝްރޫއުގެ ހުރިހާ ކްރެޑިޓެއް އަމިއްލަފުޅަށް ނަންގަވާފައިވާކަމަށް ސެންބެ ވިދާޅުވި އެވެ. 

އެކަން ފާހަގަކުރައްވާ އޭނާ ވީދާޅުވީ އެއީވެސް ކޮރަޕްޝަން ކަމަށެވެ. 

ސެންބެ ވިދާޅުވީ ފަރެސްމާތޮޑާ އެއާޕޯޓުގެ މަޝްރޫއަށް ބޭނުންވާ ފަންޑު ހޯއްދަވާ އެއާޕޯޓާއި ގުޅޭ ހުރިހާ ޕްލޭނެއް އެކުލަވާލާފައިވަނީ ރައީސް ޔާމީންގެ ސަރުކާރުގައި ކަމަށެވެ.

އެއާއެކު ފަރެސް-މާތޮޑާ ދެ އަވަށުގެ ދެމެދުގައި އޮތް ހުސްތަން ހިއްކަވާދެއްވުމަށް އެމަނިކުފާނުގެ ޒައާމަތުގައި ބަޖެޓު ކުރެވިފައިވާކަން ވެސް އޭނާ ފާހަގަކުރެއްވި އެވެ. 

އެހެން ނަމަވެސް ވެރިކަން ބަދަލުވި ހިސާބުން އެ ފައިސާއަށް ވީ ނުވީއެއް ނޭނގި ގެއްލިފައިވާކަމަށް ސެންބެ ވިދާޅުވި އެވެ. އަދި ވިދާޅުވީ މިއީ މަޝްރޫއުތަކުން ވައްކަންކޮށް މި ސަރުކާރުން ކޮރަޕްޝަން ހިންގާކަން ދައްކުވައިދޭ ކުޑަ މިސާލެއް ކަމަށެވެ.