މާލޭގައި ރޭ ބާރު ސްޕީޑްގައި ސައިކަލު ދުއްވުމުން މަޑުކުރަން ކުރަން ފުލުހުންގެ އެންގުމުން، މަޑުނުކޮށް ބާރު ސްޕީޑެއްގައި ދުއްވަނިކޮށް އެހެން ދެ ސައިކަލާއި އެކްސިޑެންޓްވުމަށްފަހު ފިލަން އުޅުނު މީހާގެ ބަންދަށް ކްރިމިނަލް ކޯޓުން 10 ދުވަހުގެ މުއްދަތެއް ޖަހައިފިއެވެ.

ފުލުހުންގެ މީޑިއާ އޮފިޝަލް މިއަދު ވިދާޅުވީ، ރޭ މާލެ ތެރެ ޕެޓްރޯލް ކުރަމުން ދިޔައިރު 1:30 ކަންހާއިރު ގަޑިބުރު ކައިރިން ބާރު ސްޕީޑްގައި ދުއްވާފައި ދިޔަ ސައިކަލަކަށް މަޑުކުރުމަށް ފުލުހުން އަންގާފައިވާ ކަމަށެެވެ.
ނަމަވެސް ފުލުހުންގެ އެންގުމަށް މަޑުނުކޮށް ބާރު ސްޕީޑްގައި ދުއްވާފައި ދިޔުމުން ނަލަހިޔާ ކައިރިން އިތުރު ދެ ސައިކަލްގައި ޖެހި އެކްސިޑެންޓް އެއްވެސް ހިނގައިފައިވާ ކަމަށެވެ. 

މީގެ އިތުރުން، އެކްސިޑެންޓްވުމުންވެސް ސައިކަލް މަޑުނުކޮށް ދާން މަސައްކަތް ކުރުމުންނާއި، ފުލުހުންގެ އަމުރަށް ނުކިޔަމަންތެރިވުމުގެ ސަބަބުން އެ ސައިކަލްގައި ތިބި ދެ މީހުން ވަނީ ފުލުހުންގެ ބެލުމުގެ ދަށަށް ގެންގޮސްފައިކަމަށް ފުލުހުން ބުނެފައިވެއެވެ. އަދި ސައިކަލު ދުއްވަން އިނީ ލައިސަންސް ނެތް މީހެއްކަމަށްވެސް ފުލުހުން މައުލޫމާތު ދެއްވާފައި ވެއެވެ.

Advertisement

މި މައްސަލާގައި ހައްޔަރު ކުރެވުނު އެކެއްގެ ބަންދު ކުރުމަށް ކްރިމިނަލް ކޯޓުން ނެރުނު އަމުރު ރިޕޯޓުން އެނގޭ ގޮތުގައި އެކްސިޑެންޓްވުމުން ފިލަން އުޅުނު މީހަކީ ހދ. ވައިކަރަދޫ ހުވަނދުމާގެ މުހައްމަދު ނިމާލްއެވެ. އޭނާއަކީ އުމުރުން 23 އަހަރުގެ ޒުވާނެކެވެ.